முக்கிய பாடங்களுக்கு குறைவான இடைவெளி: சி.பி.எஸ்.இ. 2026 தேர்வு அட்டவணையில் சிக்கல்- மாணவர்களுக்கு அதிகரிக்கும் நெருக்கடி?

மத்திய இடைநிலைக் கல்வி வாரியம் (சிபிஎஸ்இ), 2026ஆம் ஆண்டுக்கான 10 மற்றும் 12ஆம் வகுப்பு பொதுத் தேர்வு அட்டவணையை வெளியிட்டுள்ளது. ஏழு வாரங்களுக்கு மேல் நடைபெறும் இந்தத் தேர்வுகள், முதல் பார்வையில் முறையாகத் திட்டமிடப்பட்டதாகத் தோன்றினாலும், சில முக்கியப் பாடங்களுக்கு இடையே போதுமான இடைவெளி இல்லை என்று மாணவர்கள், பெற்றோர் மற்றும் ஆசிரியர்கள் மத்தியில் கவலை எழுந்துள்ளது.

10ஆம் வகுப்பு மாணவர்களுக்கு நேர நெருக்கடி

10ஆம் வகுப்பு மாணவர்களில், பிப்ரவரி 24 அன்று உருது, பஞ்சாபி, பெங்காலி, தமிழ், மராத்தி, குஜராத்தி, மணிப்பூரி மற்றும் தெலுங்கு போன்ற மொழிப் பாடங்களைத் தேர்வு எழுதுபவர்களுக்கு, அடுத்த நாளே (பிப்ரவரி 25) அறிவியல் தேர்வு இருப்பதால், அதற்கு ஒரு நாள் கூட இடைவெளி இல்லை.

அதேபோல், சிந்தி, மலையாளம், ஒடியா, அசாமி, கன்னடம் போன்ற பாடங்களுக்கு அடுத்த நாளே சமூக அறிவியல் தேர்வு வைக்கப்பட்டுள்ளது. அறிவியல் மற்றும் சமூக அறிவியல் போன்ற முக்கியப் பாடங்களுக்குத் தயார் செய்ய போதிய அவகாசம் இல்லாதது மாணவர்களைக் கவலையடையச் செய்துள்ளது. இதனால், மற்ற மாணவர்களைக் காட்டிலும் தங்களுக்கு ஒரு பின்னடைவு ஏற்படும் என அவர்கள் கருதுகின்றனர்.

12ஆம் வகுப்பு மாணவர்களின் மன அழுத்தம்

12ஆம் வகுப்புத் தேர்வு அட்டவணையும் விமர்சனத்துக்குள்ளாகியுள்ளது. இயற்பியல் போன்ற கடினமான பாடத்துக்கு முன்பு, உடல் கல்வி (Physical Education) தேர்வு வைக்கப்பட்டுள்ளது. இதனால், மாணவர்கள் ஒரு பாடத்தில் இருந்து மற்றொரு பாடத்திற்கு மாறுவதற்கு மிகக் குறைந்த நேரமே கிடைப்பதாக உணர்கின்றனர்.

இது குறித்து குவஹாத்தியைச் சேர்ந்த மாணவி ஒருவர், “உடல் கல்விக்குப் பிறகு உடனடியாக இயற்பியல் தேர்வு இருப்பது மிகப்பெரிய மன அழுத்தத்தை ஏற்படுத்துகிறது. இயற்பியலுக்குத் தனிக் கவனம் தேவை. ஒரு நாள் இடைவெளி கிடைத்திருந்தால் கூட உதவியாக இருந்திருக்கும்” என்று தெரிவித்துள்ளார்.

மேலும், மொழிப் பாடத்துக்கு அடுத்த நாளே பொருளாதாரப் பாடமும் இருப்பதால், அதற்கு ரிவிஷன் செய்ய அவகாசம் இல்லை. இதன் காரணமாகப் பொருளாதாரத் தேர்வு எழுதுவதற்கும் கூடுதல் சிரமம் இருப்பதாக மாணவர்கள் கூறுகின்றனர்.

நிபுணர்களின் கருத்து என்ன?

கல்வித் துறை நிபுணர்கள், சிபிஎஸ்இ-யின் இந்தத் தேர்வு அட்டவணை, மாணவர்களின் மன அழுத்தத்தை அதிகரிக்கும் என எச்சரிக்கின்றனர். “அறிவியல், சமூக அறிவியல், இயற்பியல், பொருளாதாரம் போன்ற முக்கியப் பாடங்களுக்கு இடையே இடைவெளி இல்லாதது மாணவர்களின் தேர்ச்சி விகிதத்தைப் பாதிக்கலாம். ஒரு நாள் இடைவெளி கூட மிகப் பெரிய மாற்றத்தை ஏற்படுத்தும்” என்று கொல்கத்தாவைச் சேர்ந்த பள்ளி முதல்வர் ஒருவர் கூறுகிறார்.

அதே சமயம், இந்தத் தேர்வு அட்டவணை அனைத்து மாணவர்களுக்கும் ஒரே மாதிரியான தாக்கத்தை ஏற்படுத்துவதில்லை. அஜ்மீரைச் சேர்ந்த மாணவர் ஆதித்யா பஞ்சல், "எனது பாடங்களுக்கு இடையே போதுமான இடைவெளி உள்ளது. முக்கியப் பாடங்களுக்குத் தயாராக நல்ல நேரம் கிடைக்கிறது" என்று கூறுகிறார்.

சிபிஎஸ்இ வாரியம், தேர்வு அட்டவணையைத் திட்டமிடும்போது, பல்வேறு காரணிகளைக் கருத்தில் கொள்வதாகக் கூறியுள்ளது. ஆனாலும், மாணவர்களின் கவலைகளைப் புரிந்துகொண்டு, அதில் மாற்றங்கள் செய்யப்படுமா என்பதைப் பொறுத்திருந்துதான் பார்க்க வேண்டும்.

முன்கூட்டியே தயாராகுங்கள்

தேர்வு அட்டவணை வெளியிடப்பட்டபோதிலும், மாணவர்கள் முன்கூட்டியே தயாராகி, தேர்வு இடைவெளிகளை மட்டும் நம்பி இருக்க வேண்டாம் என்று ஆசிரியர்கள் அறிவுறுத்துகின்றனர். “மாணவர்கள் தொடர்ந்து திருப்புதல் செய்வதில் கவனம் செலுத்த வேண்டும். தேர்வு இடைவெளிகள் குறித்து கவலைப்படுவதைவிட, நீண்ட காலத் தயாரிப்பு உத்திகளில் கவனம் செலுத்துவது நல்லது” என்று மேகாலயாவைச் சேர்ந்த லோபா பசிஸ்தா என்ற ஆசிரியர் கூறியுள்ளார்.

2026ஆம் ஆண்டுத் தேர்வுகளில், இந்தியா மற்றும் வெளிநாடுகளில் இருந்து சுமார் 45 லட்சம் மாணவர்கள் பங்கேற்பார்கள் என எதிர்பார்க்கப்படுகிறது.

இந்த செய்தியை ஆங்கிலத்தில் வாசிக்க இந்த இணைப்பை கிளிக் செய்யவும்.