சி.பி.எஸ்.இ 2026: தேர்வுகளில் புதிய புரட்சி - இனி ஆண்டுக்கு 2 பொதுத் தேர்வுகள்!

மத்திய இடைநிலைக் கல்வி வாரியம் (CBSE), 2026-ம் ஆண்டு நடைபெறவுள்ள 10-ம் வகுப்பு மற்றும் 12-ம் வகுப்பு பொதுத் தேர்வுகளில் பல்வேறு புதிய மாற்றங்களை அறிவித்துள்ளது. இந்த மாற்றங்கள் மாணவர்கள், ஆசிரியர்கள் எதிர்காலத் தேர்வுகளுக்குத் தங்களைத் தயார்படுத்திக் கொள்ள உதவும் வகையில் உள்ளன. சி.பி.எஸ்.இ அறிவித்துள்ள முக்கிய மாற்றங்கள் பற்றிய செய்தியின் வடிவம் இங்கே கொடுக்கப்பட்டுள்ளது.

புதிய தேர்வு விதிமுறைகள் மற்றும் கொள்கைகள்

இரு தேர்வுக் கொள்கை: 2026-ம் ஆண்டு முதல் 10ம் வகுப்புக்கு இரு தேர்வுகள் நடத்தப்படும். முதல் 'முக்கிய' பொதுத் தேர்வு 2026 பிப்ரவரி நடுப்பகுதியில் நடைபெறும், அதைத் தொடர்ந்து 2-வது தேர்வு 2026 மே மாதத்தில் நடைபெறும்.

கட்டாய வருகை: 2025-26ஆம் கல்வியாண்டு முதல், 10 மற்றும் 12-ம் வகுப்பு பொதுத் தேர்வில் கலந்துகொள்ளும் மாணவர்களுக்கு 75% வருகைப் பதிவு கட்டாயம் என சிபிஎஸ்இ அறிவித்துள்ளது.

திறந்த புத்தகத் தேர்வுகள் (Open-Book Assessments): 2026-27ஆம் கல்வியாண்டு முதல் 9-ம் வகுப்பு மாணவர்களுக்கு திறந்த புத்தகத் தேர்வுகள் அறிமுகப்படுத்தப்பட உள்ளன. இதன் மூலம், மனப்பாடம் செய்வதைத் தவிர்த்து, புரிந்துகொள்ளும் திறன் மேம்படுத்தப்படும் என எதிர்பார்க்கப்படுகிறது.

கூடுதல் பாடப்பிரிவு நீக்கம்: 2026ஆம் ஆண்டு முதல், தனித் தேர்வர்களாக (private candidates) கூடுதல் பாடப்பிரிவு தேர்வு எழுதும் வசதி ரத்து செய்யப்பட்டுள்ளது.

விளையாட்டு வீரர்களுக்கு சிறப்பு சலுகை: தேசிய அல்லது சர்வதேச விளையாட்டுப் போட்டிகள் அல்லது ஒலிம்பியாட்களில் பங்கேற்கும் 10-ம் வகுப்பு மாணவர்களுக்கு, மே மாதத்தில் நடைபெறும் 2வது தேர்வில் மட்டும் சிறப்பு தேர்வு எழுத அனுமதிக்கப்படுவார்கள். 12-ம் வகுப்பு மாணவர்களுக்கு, தேர்வு தேதிக்கும் விளையாட்டு நிகழ்ச்சிக்கும் முரண்பாடு ஏற்பட்டால், முக்கியத் தேர்வுகள் முடிந்த பிறகு மறுதேர்வு நடத்தப்படும்.

பல்லடுக்கு கல்விமுறை: சிபிஎஸ்இ 10-ம் வகுப்பு மாணவர்களுக்கு அறிவியல் மற்றும் சமூக அறிவியல் பாடங்களை 'அடிப்படை' மற்றும் 'மேம்பட்ட' என 2  நிலைகளில் வழங்கியதைத் தொடர்ந்து, 2026-27 கல்வியாண்டு முதல் பதினொன்றாம் வகுப்பில் STEM பாடங்களுக்கும் இந்த முறையை விரிவுபடுத்த திட்டமிட்டுள்ளது.

தாய்மொழி வழி கல்வி: பள்ளிகளில் மழலையர் பள்ளி முதல் 2-ம் வகுப்பு வரை தாய்மொழி அல்லது பிராந்திய மொழியில் கற்பிக்க வேண்டும் என சிபிஎஸ்இ அறிவுறுத்தியுள்ளது. மேலும், மாணவர்களின் தாய்மொழியைப் பதிவு செய்ய பள்ளிகளுக்கு உத்தரவிட்டுள்ளது.

கண்காணிப்பு கேமராக்கள்: சிபிஎஸ்இ அதன் அங்கீகாரம் பெற்ற பள்ளிகளின் அனைத்து முக்கியப் பகுதிகளிலும் உயர்தர சிசிடிவி கேமராக்களை நிறுவுமாறு புதிய விதிமுறைகளை வெளியிட்டுள்ளது. இந்த கேமராக்கள் ஒலி மற்றும் ஒளி பதிவு செய்யும் திறன் கொண்டவையாக இருக்க வேண்டும்.

'சுகர் வாரியங்கள்' (Sugar Boards): மாணவர்களிடையே அதிகப்படியான சர்க்கரை நுகர்வைக் குறைக்கும் விழிப்புணர்வை ஏற்படுத்த, அனைத்துப் பள்ளிகளிலும் பிரத்யேக 'சுகர் வாரியங்களை' நிறுவ வேண்டும் என சிபிஎஸ்இ அறிவுறுத்தியுள்ளது.

கல்விசார் ஆடியோ மற்றும் டிஜிட்டல் உள்ளடக்கம்: மாணவர்கள், பெற்றோர்கள் மற்றும் பள்ளிகளுக்கு வழிகாட்டுதல் மற்றும் விழிப்புணர்வை வழங்க, கல்வி மற்றும் ஆலோசனைகள் தொடர்பான ஆடியோ மற்றும் டிஜிட்டல் உள்ளடக்கத்தை சிபிஎஸ்இ உருவாக்கி வருகிறது.