மொழி சர்ச்சை... தமிழ்ப் பாடத்தில் 100-க்கு 93 மார்க்; தமிழக அரசுப் பள்ளியில் பயின்று சாதனை படைத்த பீகார் தொழிலாளி மகள்!

மொழிப்போர் பற்றிய விவாதங்களுக்கு இடையே நெஞ்சை நெகிழ வைக்கும் செய்தி ஒன்று இணைத்தில் அதிகம் பகிரப்பட்டு வருகிறது. பீகாரைச் சேர்ந்த தொழிலாளியின் மகள் தமிழக அரசுப் பள்ளியில் படித்து 10-ம் வகுப்பு அரசுப் பொதுத் தேர்வில் 100-க்கு 93 மதிப்பெண்கள் பெற்று அனைவரின் கவனத்தை ஈர்த்துள்ளார்.

"எனது தந்தை 17 வருடங்களுக்கு முன்பு கட்டுமான வேலைக்காக சென்னைக்கு குடிபெயர்ந்தார். பிறகு, தமிழ்நாட்டில் உள்ள அரசுப்பள்ளிகள் நன்றாக இருப்பதாக அவர் எங்களிடம் கூறினார். அதனால் நானும், எனது தாயும், தங்கைகளும் சென்னைக்கு வந்துவிட்டோம்" என்று 10-ம் வகுப்பில் 500-க்கு 467 மதிப்பெண்கள் பெற்ற ஜியா குமாரி கூறினார். இவர் ஆங்கிலம் மற்றும் சமூக அறிவியலில் 99 மதிப்பெண்கள் பெற்றுள்ளார்.

தமிழ்நாடு அரசின் கோட்டைபுரம் பெண்கள் மேல்நிலைப் பள்ளி மாணவி ஜியா தனது தோழிகள் மற்றும் ஆசிரியர்களுடன் பழகியதன் மூலம் தமிழை கற்றுக்கொண்டதாகக் கூறினார். "நிச்சயமாக இந்தியை விட தமிழ் கடினமாக இருந்தது, ஆனால் நீங்கள் தமிழை புரிந்துகொள்ள ஆரம்பித்தவுடன் எளிதாகிவிடும். இங்கே எல்லோரும் தமிழில்தான் பேசினார்கள், நானும் அவர்களுடன் அவ்வாறே பேசினேன். நீங்கள் எங்கு வசிக்கிறீர்களோ, அந்த மொழியைக் கற்றுக்கொள்வது அவசியம். அது சமூகத்துடன் எளிதாகப் பழகவும் உதவுகிறது," என்று டைம்ஸ் ஆப் இந்தியாவுக்கு அளித்த பேட்டியில் ஜியா குமாரி கூறி உள்ளார்.