எம்.ஜி.ஆர் பல்கலை நடத்திய மாபெரும் மருத்துவ ஹேக்கத்தான்... 1,858 கண்டுபிடிப்பாளர்கள் பங்கேற்பு

தமிழ்நாட்டில் முதல்முறையாக தமிழ்நாடு டாக்டர் எம்.ஜி.ஆர். மருத்துவப் பல்கலைக் கழகம் ஏற்பாடு செய்த மருத்துவ ஹேக்கத்தான் (Healthcare Hackathon) நிகழ்வு, மக்கள் நல்வாழ்வுத் துறை அமைச்சர் மா. சுப்பிரமணியன் தலைமையில் நடைபெற்றது. இந்த பல்கலைக்கழகத்தின் சார்பில் கிடைத்த தகவலின்படி, 6 மாதங்களாக நடந்த இந்த ஹேக்கத்தான் நிகழ்வில், ஆயிரத்து 858 கண்டுபிடிப்பாளர்கள் கலந்துகொண்டு, மருத்துவத் துறையில் மாற்றத்தை ஏற்படுத்தும் தீர்வுகளை உருவாக்கினர். அவர்களுக்கு வழிகாட்ட 150-க்கும் மேற்பட்ட துறை வல்லுநர்களும், 200 வழிகாட்டிகளும் (mentors) ஈடுபடுத்தப்பட்டனர்.

இந்த ஹேக்கத்தான் நிகழ்வுக்கு 19 மாநிலங்களில் இருந்து ஆயிரத்து 858 விண்ணப்பங்கள் குவிந்தன. இதில் ஆயிரத்து 447 மாணவர்கள், 157 ஸ்டார்ட்-அப்கள், 174 மருத்துவ நிபுணர்கள், 64 ஆய்வாளர்கள் (Research Scholars) மற்றும் 16 தொழில் வல்லுநர்கள் உட்பட பல்வேறு பிரிவினர் பங்கேற்றனர். பங்கேற்பாளர்கள் தங்கள் கண்டுபிடிப்புகளை நிபுணர் குழுவின் முன் சமர்ப்பித்தனர், விரிவான கருத்துக்களை பெற்றனர், மேலும் வழிகாட்டிகள் மற்றும் சகாக்களுடன் தொடர்பு கொண்டனர். இதன் மூலம், மிகவும் நம்பிக்கைக்குரிய திட்டங்கள் மட்டுமே இறுதிச் சுற்றுக்கு முன்னேறுவது உறுதி செய்யப்பட்டது.

இறுதிச் சுற்றில் முன்னணி 30 கண்டுபிடிப்பாளர்களும் 18 ஸ்டார்ட்-அப் நிறுவனங்களும் தங்கள் சுகாதாரத் தீர்வுகளை காட்சிப்படுத்தினர். இதில் நேரடி முன்மாதிரி செயல்விளக்கங்கள் (live prototype demonstrations), உருவகப்படுத்துதல்கள் (simulations) மற்றும் நிகழ்நேர பயன்பாட்டுச் சூழல்கள் மூலம் நீதிபதிகளும் பார்வையாளர்களும் இந்த கண்டுபிடிப்புகளை நேரடியாக அனுபவிக்க வாய்ப்பு கிடைத்தது.

விழாவில் சிறப்புரையாற்றிய அமைச்சர் மா. சுப்பிரமணியன், முதல்வர் மு.க. ஸ்டாலின் ஆட்சியில் தமிழகம் மருத்துவ சேவையில் மற்ற மாநிலங்களுக்கு முன்மாதிரியாக உருவாகியுள்ளது என்றார். இந்தாண்டு நிகழ்வின் மைல்கல் என்னவென்றால், பல்வேறு சுகாதார துறைகளைச் சேர்ந்த மாணவர்கள் இதில் ஒருங்கிணைக்கப்பட்டனர். இது பன்முகத் துறையிலான ஆராய்ச்சி (interdisciplinary research) மற்றும் தற்போதைய சிகிச்சை சவால்களுக்கு நவீன தீர்வுகளை ஊக்குவிக்கிறது என்று அவர் கூறினார்.

வெற்றியாளர்களுக்கு விருதுகள் வழங்கப்பட்டபோது, மருத்துவ ஆராய்ச்சியில் செயற்கை நுண்ணறிவு (AI) போன்ற வளர்ந்து வரும் தொழில் நுட்பங்களை மாணவர்கள் பயன்படுத்திக்கொள்ள வேண்டும் என்றும், அதன் மூலம் மாநிலத்தின் சுகாதார அமைப்பை மேலும் மேம்படுத்த வேண்டும் என்றும் அமைச்சர் வலியுறுத்தினார்.