ஆதரவு குழு, உறவினர்களுடன் வளாகத்தில் தங்கும் வசதி; பின்தங்கிய மாணவர்களுக்கு கைகொடுக்கும் ஐ.ஐ.டி டெல்லி

தீவிர நிகழ்வுகளில் தற்கொலை வரை செல்லும், படிப்பில் போராடும் மாணவர்கள் மீதான அழுத்தத்தைக் குறைக்க, டெல்லியில் உள்ள இந்திய தொழில்நுட்பக் கழகம் (IIT Delhi) “மோசமான கல்வி நிலை”யுடன் உள்ள தனது இளங்கலை மாணவர்களுக்கு உதவ ஆசிரியர்கள் மற்றும் மாணவர்களைக் கொண்ட குழுவை உருவாக்கியுள்ளது, "விதிவிலக்கான சந்தர்ப்பங்களில்" ஒரு சில மாணவர்கள் வளாகத்தில் ஒரு குடும்ப உறுப்பினருடன் தங்கவும் அனுமதி வழங்கப்பட்டுள்ளது, என இந்தியன் எக்ஸ்பிரஸ்ஸூக்கு தெரிய வந்துள்ளது.

ஆங்கிலத்தில் படிக்க: IIT-Delhi lends hand to students: Support panel, campus stay with kin for some

"சில விதிவிலக்கான சந்தர்ப்பங்களில், கூடுதல் ஆதரவு தேவை என்று அவர்கள் நம்பும் குறைந்தபட்சம் மூன்று மாணவர்களை துறைகள் அடையாளம் கண்டுள்ளன மற்றும் அவர்கள் ஒரு குடும்ப உறுப்பினருடன் தங்க அனுமதிக்கப்பட்டுள்ளது. இதுபோன்ற சந்தர்ப்பங்களில், மாணவர் வளாகத்தில் குடும்ப உறுப்பினருடன் வாழ அனுமதிக்கப்படுகிறார், மேலும் விடுதியில் தனியாக வசிக்க வேண்டாம் என்று அறிவுறுத்தப்படுகிறார்கள். இதுபோன்ற சந்தர்ப்பங்களில் மாணவர்கள் வளாகத்தில் உள்ள தனி விடுதி வசதியைப் பயன்படுத்தலாம், அதில் உணவு சமைக்கும் வசதியும் உள்ளது,” என்று கல்வி முன்னேற்றக் குழுவின் உறுப்பினர் (APG) தி இந்தியன் எக்ஸ்பிரஸிடம் கூறினார்.

தகவல் அறியும் உரிமைச் சட்டத்தின் மூலம் தி இந்தியன் எக்ஸ்பிரஸ் அணுகிய ஆவணங்களின்படி, APG நிறுவனத்தில் இதுவரை 192 இளங்கலை மாணவர்களை “கல்வியில் பின்தங்கியவர்கள்” என்று அடையாளம் கண்டுள்ளது, இந்த மாணவர்களுக்கு கல்வி உதவி தேவை என்பதை வலியுறுத்துகிறது.

கடந்த ஆண்டு செப்டம்பரில், அனில் குமார் என்ற மாணவர் தனது விடுதி அறையில் தற்கொலை செய்து கொண்டதை அடுத்து, APG உருவாக்கப்பட்டது. உத்தரபிரதேச மாநிலம் பண்டா மாவட்டத்தைச் சேர்ந்த அனில் குமார், கணிதத்தில் பி-டெக் படித்து வந்தார்.

இந்த ஆண்டு, இந்தியா முழுவதும் உள்ள ஐ.ஐ.டி.,களில் ஐந்து மாணவர்கள் தற்கொலை செய்துள்ளனர், ஐ.ஐ.டி-கான்பூரில் இரண்டு மற்றும் டெல்லி, ரூர்க்கி மற்றும் பி.ஹெச்.யூ.,வில் தலா ஒன்று. குழு அமைப்பது குறித்த அதிகாரப்பூர்வ அறிவிப்பில் கூறியிருப்பதாவது: “இது (APG) கல்விப் பிரிவுகள் மற்றும் விடுதிகளை ஒருங்கிணைக்கவும், தேவைக்கேற்ப தலையிடவும் அதிகாரம் அளிக்கப்படும். தேவைப்படும் கொள்கை மாற்றங்களையும் குழு பரிந்துரைக்கும்.”

அதிகாரப்பூர்வ பதிவுகளின்படி, எட்டு உறுப்பினர் குழுவில் இரண்டு மாணவர் உறுப்பினர்களைச் சேர்த்து APG இன் அரசியலமைப்பு மார்ச் 5 அன்று திருத்தப்பட்டது.

APG இதுவரை தகுதிகாண் மற்றும் பின்னடைவு குறித்த இளங்கலை மாணவர்களின் கல்விப் பதிவுகளை ஆய்வு செய்து, பல மாணவர்களுடன் கலந்துரையாடி, நிறுவனத்தில் மாற்றங்களுக்கான பரிந்துரைகளை வழங்கியுள்ளது.

பரிந்துரைகள் இரண்டு பிரிவுகளாக வகைப்படுத்தப்பட்டுள்ளன: "உடனடியாக செயல்படுத்துதல்" மற்றும் "பரந்த விவாதம்" தேவைப்படுபவை.

உடனடியாக செயல்படுத்துதல் பிரிவில், "ஒன்பது செமஸ்டர்களுக்கு பின்னர் ஹாஸ்டல் தங்கும் வசதி இல்லாததே பின்தங்கிய மாணவர்களின் பட்டப்படிப்புத் தேவைகளைப் பூர்த்தி செய்ய முடியாததற்கு ஒரு முக்கிய காரணம்" என்று APG அடையாளம் கண்டுள்ளது. “ஒன்பது செமஸ்டர்களுக்கு பின்னர் பின்தங்கிய மாணவர்களுக்கு 30 விடுதி இடங்கள் ஒதுக்கப்பட வேண்டும் என்று பரிந்துரைக்கப்படுகிறது. விரிவுரைகள், பயிற்சிகள் மற்றும் ஆய்வக அமர்வுகளில் 75% வருகைக்கு உட்பட்டு தங்குமிடம் வழங்கப்படும். ஹாஸ்டல் தங்குவதற்கான பரிந்துரைகள் ஏ.பி.ஜி மூலம் செய்யப்படும்,” என்று விதிகள் கூறியுள்ளது.

மாணவர் நல வாரியம் (BSW) மற்றும் மாணவர்களின் டீன் ஆகியோரால் நடத்தப்படும் தற்போதைய பயிற்சி முறையின் செயல்திறனை அதிகரிக்கவும் APG பரிந்துரைத்துள்ளது.

மாணவர் நல வாரியம் முதன்மையாக ஒவ்வொரு விடுதியிலிருந்தும் மாணவர் பிரதிநிதிகள் மற்றும் சில ஆசிரிய உறுப்பினர்களைக் கொண்டுள்ளது. இன்ஸ்டிட்யூட்டின் இணையதளத்தின்படி, மாணவர் நல வாரியத்தின் கல்வி வழிகாட்டல் திட்டத்தின் நோக்கம் "கல்வியில் வலிமையான இரண்டாம் ஆண்டு மாணவர்களால் நடத்தப்படும் ஹாஸ்டல் அமர்வுகள் மூலம் இளங்கலை முதல் ஆண்டு மாணவர்களுக்கு அவர்களின் கல்வியில் உதவுவதாகும்".

இதை வலுப்படுத்தும் வகையில், ஏ.பி.ஜி., “ஆன்லைன் போர்டல் உருவாக்கப்பட வேண்டும், இது தேவைப்படும் மாணவர்களுக்கு பயிற்றுநர்களை அடையாளம் காண உதவும். நான்காம் மற்றும் ஐந்தாம் ஆண்டு மாணவர்களுக்கும் பயிற்றுநர்கள் இருக்க வேண்டும். மாணவர்களின் பங்கேற்பை மேம்படுத்த, ஆசிரியர்களுக்கான ஊக்கத்தொகை அதிகரிக்கப்பட வேண்டும்,” என பரிந்துரைத்துள்ளது.

"பல மாணவர்கள் தனிப்பட்ட பயிற்சிக்காக வந்துள்ளனர். இந்த மாணவர்களுக்கு நாங்கள் தனிப்பட்ட பயிற்றுநர்களை வழங்கியுள்ளோம், ”என்று பெயர் வெளியிட விரும்பாத APG உறுப்பினர் கூறினார்.

மற்ற பரிந்துரைகளில் இன்ஸ்டிட்யூட்டின் வருகை முறையை சரிசெய்வது ஒன்று, ஏனெனில் APG "டிம்பிள் வருகை அமைப்பில் உள்ள ஓட்டைகளை பல மாணவர்கள் பயன்படுத்திக் கொள்கிறார்கள், இது இறுதியில் அவர்களின் கல்வி செயல்திறனை பாதிக்கிறது" என்று கூறியுள்ளது.

டிம்பிள் என்பது வகுப்பறைகளில் காகிதமில்லா வருகையைக் குறிக்கும் ஒரு எண்ட்-டு-எண்ட் அமைப்பு. முக்கியமாக, ஒவ்வொரு வகுப்பறைக்கும் அருகாமையில் ஒரு டிம்பிள் சாதனம் உள்ளது, இது அனைத்து ஸ்மார்ட்போன்களுடனும் வயர்லெஸ் முறையில் தொடர்பு கொள்கிறது, இதனால் மாணவர்கள் அந்தந்த வகுப்பறைகளின் அருகாமையில் இருந்தாலே வருகையைக் குறிக்க அனுமதிக்கிறது.

"சில நேரங்களில், மாணவர்கள் வருகையைக் குறிக்க முனைகிறார்கள், ஆனால் வகுப்புகளைத் தவிர்க்கிறார்கள்" என்று APG உறுப்பினர் கூறினார்.

ஒன்று அல்லது அதற்கு மேற்பட்ட முதல் ஆண்டு இளங்கலைப் படிப்புகளில் தோல்வியடைந்ததே தாமதமான பட்டப்படிப்புக்கான முக்கியக் காரணம். கோடை கால செமஸ்டரின் போது சில முதல் ஆண்டு படிப்புகள் நடத்தப்படும் போது, “இது போன்ற அனைத்து படிப்புகளையும் குறிப்பிடத்தக்க பின்னடைவுடன் நடத்துவதற்கு முயற்சிகள் மேற்கொள்ளப்பட வேண்டும். மேலும், பின்தங்கிய மாணவர்கள் கோடைகாலப் படிப்புகளுக்குப் பதிவு செய்வதை உறுதிசெய்ய நடவடிக்கை எடுக்கப்பட வேண்டும்..." என்று APG பரிந்துரைத்துள்ளது.

"பரந்த விவாதத்திற்கான" பரிந்துரைகளின் கீழ், APG நிறுவனத்தில் மாணவர்கள் தற்போது தரப்படுத்தப்படும் விதத்தில் பல கொள்கை மாற்றங்களை பரிந்துரைத்துள்ளது.

உதாரணமாக, அனைத்து படிப்புகளின் கணக்கிடப்பட்ட ஜி.பி.ஏ.,வான டிகிரி கிரேடு பாயின்ட் ஆவரேஜை (DGPA) அகற்றும்படி குழு பரிந்துரைத்துள்ளது.

தற்போது, ஐ.ஐ.டி.,யில் பி டெக் பட்டம் பெறுவதற்கு குறைந்தபட்ச டி.ஜி.பி.ஏ 5 தேவைப்படுகிறது, ஆனால் ஒவ்வொரு பாடத்திற்கும் தேர்ச்சி தரம் டி (இது 10க்கு 4 புள்ளிகள்).

APG இன் பரிந்துரையின்படி, ஒரு மாணவர் ஒவ்வொரு பாடத்திலும் குறைந்தபட்சம் 10க்கு 4 மதிப்பெண்களைப் பெற்றிருந்தால், ஒவ்வொன்றிலும் தனித்தனியாக தேர்ச்சி பெற்று இருந்தால், DGPA 5 வரை சேர்க்கவில்லை என்றாலும், அந்த மாணவனை இன்னும் தேர்ச்சி பெற்றதாக அறிவித்து அவருக்கு பட்டம் வழங்கப்பட வேண்டும். .

கல்வி விவகாரங்கள் தொடர்பான பரிந்துரைகள் நிறுவனத்தின் செனட்டால் விவாதிக்கப்பட்டு நிறைவேற்றப்பட வேண்டும், இது நிறுவனத்தில் பயிற்றுவிப்பு, கல்வி மற்றும் தேர்வுகளின் தரங்களைப் பராமரிப்பதற்கு பொறுப்பாகும்.

இந்தியன் எக்ஸ்பிரஸ் டெல்லி ஐ.ஐ.டி.,யை தொடர்பு கொண்டு இந்த விஷயத்தில் கருத்து கேட்கப்பட்டது ஆனால் எந்த பதிலும் வரவில்லை.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“