பெரிய நிறுவனங்களில் குறைந்த வேலை வாய்ப்புகள்; இந்திய ஸ்டார்ட் அப்களில் கவனம் செலுத்தும் ஐ.ஐ.டி.,கள்

Deeksha Teri , Neeti Nigam

ஐ.ஐ.டி வேலை வாய்ப்புகள் 2024: ஐ.ஐ.டியின் (IIT) வேலைவாய்ப்புக்கான முதல் அமர்வு டிசம்பரில் முடிவடைந்தது. ஆனால் கடந்த ஆண்டுகளைப் போலல்லாமல், ஐ.ஐ.டி.,கள் முதல் கட்ட தரவுகளைப் பகிர்ந்து கொள்வதில் முற்றிலும் தயக்கம் காட்டுகின்றன. இந்த ஆண்டு வேலை வாய்ப்புத் தரவுகளில் ரகசியத்தன்மைக்கு வழிவகுத்தது என்ன?

ஆங்கிலத்தில் படிக்க: IIT Placements 2024 see less offers from big companies; Plan B is to focus on Indian start-ups

சில மாணவர்கள் மற்றும் வல்லுனர்கள் இந்த ஆண்டு ஐ.ஐ.டி.,கள் மெதுவாக பணியமர்த்தல் சந்தையைக் கண்டதே இதற்குக் காரணம் என்று கூறுகின்றனர். IIT களில் உள்ள ஆதாரங்கள் வேலை வாய்ப்பு அமர்வின் முதல் கட்டம் எதிர்பார்த்த அளவு இல்லை என்றும், இப்போது IIT கள் அதிக எண்ணிக்கையிலான காலியிடங்களுடன் அதிக நிறுவனங்கள் களமிறங்கும் என்ற நம்பிக்கையுடன் இரண்டாவது அமர்வுக்கு தயாராகி வருகின்றன என்றும் தெரிவிக்கின்றன.

“இத்தனை ஆண்டுகளில், வேலை வாய்ப்பு 15 நாட்களுக்குள் முடிந்துவிடும். இருப்பினும், ஒரு சில நிறுவனங்களின் வேலைவாய்ப்பு இந்த முறை போதுமான ஊக்கமளிக்கவில்லை. எங்கள் நிறுவனத்தில், முதல் அமர்வு டிசம்பர் 20 அன்று முடிந்தது. கடந்த ஆண்டுடன் ஒப்பிடுகையில், சில சிறந்த நிறுவனங்களின் சலுகைகளை நாங்கள் குறைவாகவே கண்டுள்ளோம். ஆனால் அடுத்த கட்டம் ஜனவரியில் தொடங்கும் என்று நாங்கள் நம்புகிறோம்,” என்று ஒரு உயர் ஐ.ஐ.டி.,யின் பெயர் வெளியிட விரும்பாத பேராசிரியர் கூறினார்.

ஐ.ஐ.டி வேலைவாய்ப்புகள் இரண்டு கட்டங்களாக நடத்தப்படுகின்றன, முதல் கட்டம் டிசம்பரில் மற்றும் இரண்டாம் கட்டம் ஜனவரி மற்றும் ஜூன் மாதங்களுக்கு இடையில் நடைபெறும்.

இந்த ஆண்டு, வேலைவாய்ப்பு பெற்ற மாணவர்களின் எண்ணிக்கையில் சரிவு காணப்பட்டது.

வேலை வாய்ப்பு சீசனின் முதல் கட்டத்தில், முன் வேலை வாய்ப்புகள் உட்பட மாணவர்கள் 1,050 வேலை வாய்ப்புகளை பெற்றுள்ளதாக ஐ.ஐ.டி டெல்லி கூறுகிறது. இதில், முதல் கட்டமாக சுமார் 1,000 மாணவர்கள் தனித்துவமாக தேர்வு செய்யப்பட்டனர்.

இருப்பினும், இது கடந்த ஆண்டு 1,300 க்கும் மேற்பட்ட வேலை வாய்ப்புகளில் இருந்து சரிவாகும், இதில் 1,150 க்கும் மேற்பட்ட மாணவர்கள் முதல் கட்ட வேலைவாய்ப்பில் தனித்துவமாக தேர்ந்தெடுக்கப்பட்டனர். கடந்த ஆண்டு, தனித்தன்மை வாய்ந்த தேர்வுகள் மற்றும் முன் வேலை வாய்ப்புகளின் எண்ணிக்கையில் 10 சதவீதம் அதிகரிப்பை நிறுவனம் தெரிவித்திருந்த நிலையில், இந்த ஆண்டு அதை அடைய ஐ.ஐ.டி டெல்லி தவறிவிட்டது.

இருப்பினும், ஐ.ஐ.டி ஆசிரிய உறுப்பினர்கள் இது கோவிட் தொற்றுநோயின் டோமினோ விளைவு காரணமாக இருப்பதாக நம்புகிறார்கள், மேலும் “நிறுவனங்கள் ஐ.ஐ.டிகள் மீதான நம்பிக்கையை இழந்துவிட்டதால் அல்ல” என்று ஐ.ஐ.டி டெல்லியின் உதவி பேராசிரியர் லட்சுமி நாராயண் ராமசுப்ரமணியன் indianexpress.ccom இடம் கூறினார்.

ஐ.ஐ.டி.,கள் முழுவதும், குறிப்பாக புதிய ஐ.ஐ.டி.,களில் வேலைவாய்ப்பு மெதுவாக உள்ளது.

indianexpress.com ஆல் அணுகப்பட்ட தரவு, வேலை வாய்ப்பு பருவத்தின் முதல் அமர்வில், IIT திருப்பதியில் 83 மாணவர்கள் மட்டுமே வேலை வாய்ப்புகளைப் பெற முடிந்தது, CTC ஆண்டுக்கு ரூ. 6.5 லட்சத்திலிருந்து ஆண்டுக்கு ரூ. 41.68 லட்சம் வரை. சில பெரிய நிறுவனங்கள் இந்த ஆண்டு செயல்முறையைத் தவிர்த்துவிட்டன அல்லது இந்த ஆண்டு மூன்றாம் தலைமுறை IIT களில் இருந்து ஐந்துக்கும் குறைவான மாணவர்களை வேலைக்கு அமர்த்தியுள்ளனர். அதிக சம்பள பேக்கேஜ் 2022ல் ஆண்டுக்கு ரூ.69 லட்சத்தில் இருந்து 2023ல் ரூ.46 லட்சமாக குறைந்துள்ளது, இது ​​கடந்த ஆண்டு காணப்பட்ட போக்கோடு ஒத்துப்போகிறது.

இந்த ஆண்டு, ஐ.ஐ.டி மெட்ராஸில் இதுவரை சுமார் 50 சதவீத மாணவர்கள் வேலை வாய்ப்பு பெற்றுள்ளனர், மேலும் முதல் கட்டத்தில் நிறுவனங்கள் வழங்கிய அனைத்து சலுகைகளின் சராசரி சம்பளம் ரூ 19 லட்சத்திற்கும் அதிகமாக இருந்தது.

இருப்பினும், முன்பு வெளியிடப்பட்ட தரவுகளின்படி, 2021-22 ஆம் ஆண்டிற்கான வளாக வேலைவாய்ப்புகளின் போது ஐ.ஐ.டி மெட்ராஸ் மாணவர்கள் பெற்ற சராசரி சம்பளம் ஆண்டுக்கு ரூ. 21.48 லட்சமாகும், அதிகபட்ச சம்பளம் ரூ. 2 கோடி.

கடந்த ஆண்டு, வளாக வேலைவாய்ப்புகளின் I மற்றும் II கட்டங்களில் 380 நிறுவனங்களிடமிருந்து மொத்தம் 1,199 வேலை வாய்ப்புகள் கிடைத்தன, இதன்மூலம் IIT மெட்ராஸ் ஒரு கல்வியாண்டில் அதிக வேலை வாய்ப்புகளை பதிவு செய்தது. ஆனால், ஒவ்வொரு ஆண்டும் போலவே இடம் பெற்ற மாணவர்களின் சரியான புள்ளிவிவரங்கள், மொத்த சலுகைகள் மற்றும் பங்கேற்கும் நிறுவனங்களின் எண்ணிக்கையைப் பகிர்ந்து கொள்வதில் இருந்து ஐ.ஐ.டி மெட்ராஸ் விலகி உள்ளது.

இதேபோல், IIT கான்பூரில், 2023-24 வேலை வாய்ப்பு பருவத்தின் முதல் கட்டத்தின் முடிவில் 989 சலுகைகள் பதிவாகியுள்ளன, இது கடந்த ஆண்டு 1,128 வேலை வாய்ப்புகளில் இருந்து சரிவு ஆகும், இதில் 208 முன் வேலை வாய்ப்பு சலுகைகள் (PPOs). சர்வதேச சலுகைகளின் எண்ணிக்கையும் 2022 இல் 74 ஆக இருந்து இந்த அமர்வில் 22 ஆக குறைந்துள்ளது.

முன்னாள் ஐ.ஐ.டி டெல்லி இயக்குநரும், பிட்ஸ் பிலானியின் துணைவேந்தருமான வி.ராம்கோபால் ராவ் indianexpress.com இடம் கூறினார், அவரைப் பொறுத்தவரை, உலகளாவிய பொருளாதார மந்தநிலை காரணமாக இந்த ஆண்டு வேலை வாய்ப்பு புள்ளிவிவரங்களில் ஒட்டுமொத்தமாக 20-30 சதவீதம் சரிவு ஏற்பட்டுள்ளது.

"கோவிட் காலத்தில் நிறைய பணியமர்த்தல்கள் நடந்தன, இந்த நேரத்தில் அவர்கள் அனைவரும் கொஞ்சம் மெதுவாக செல்கிறார்கள். பொருளாதாரத்தில் மந்தநிலை மற்றும் சில தேக்கநிலைகள் காரணமாக இருக்கலாம் என்று அவர்கள் நினைக்கிறார்கள். எனவே, கடந்த ஆண்டை விட தற்போது 20 முதல் 30 சதவீதம் வரை குறைந்துள்ளது. ஆனால், இந்தியப் பொருளாதாரம் மிகச் சிறப்பாகச் செயல்பட்டு வருவதால், அதில் எந்தப் பிரச்சினையும் இல்லை என்பதால், விஷயங்கள் முன்னேறும் என்று நான் நம்புகிறேன்,” என்று ராம்கோபால் கூறினார்.

சில மாணவர்கள் ஐ.ஐ.டி.,கள் பெயரைக் காப்பாற்ற அல்லது மீதமுள்ள வேலை வாய்ப்பு பருவத்தில் மாணவர்கள் மன உறுதியை இழக்காமல் இருப்பதை உறுதிசெய்ய வேலை வாய்ப்பு தரவை அதிகப்படுத்திக் கூறுவதாகவும் குற்றம் சாட்டியுள்ளனர்.

“இம்முறை இணையதளங்களில் காட்டப்படும் அல்லது மீடியாக்களுக்கு வழங்கப்பட்ட எண்ணிக்கை உயர்த்தப்பட்டுள்ளது. போன வருடமும் நடந்தது. இந்த முறை ஐ.ஐ.டி.,க்கு வரும் நிறுவனங்களின் எண்ணிக்கையில் சரிவு ஏற்பட்டுள்ளது மற்றும் வருகை தரும் நிறுவனங்களில் காலியிடங்கள் குறைவாக உள்ளன. இது நிச்சயமாக உள்வரும் உலகப் பொருளாதார மந்தநிலையின் விளைவுதான்,” என்று பெயர் வெளியிட விரும்பாத மூன்றாம் தலைமுறை ஐ.ஐ.டி மாணவர் ஒருவர் கூறினார்.

85க்கும் மேற்பட்ட மாணவர்களுக்கு ரூ.1 கோடிக்கும் அதிகமான சம்பளப் பேக்கேஜ்கள் வழங்கப்பட்டுள்ளன என்று அறிவித்த பிறகு, ஐ.ஐ.டி பாம்பே அந்தத் தரவைத் திரும்பப் பெற்று, ரூ.1 கோடிக்கு மேலான சலுகைகளை 22 ஆக மாற்றியது.

ஆதாரங்களின்படி, சமீபத்திய அனைத்து ஐ.ஐ.டி.,களின் வேலை வாய்ப்புக் குழு கூட்டத்தில் மற்ற ஐ.ஐ.டி.,கள் எண்ணிக்கை குறித்து கவலை தெரிவித்ததை அடுத்து இந்த திருத்தம் நடந்துள்ளது.

“இதுபோன்ற தவறான தகவல்கள் மற்ற ஐ.ஐ.டி.,களுக்கு இடையே பிரச்சினைகளையும் தேவையற்ற போட்டியையும் உருவாக்குகின்றன. மேலும், இந்த மிகைப்படுத்தப்பட்ட/வளைந்த சம்பளத் தரவு மாணவர்களுக்கு மேலும் அழுத்தத்தை சேர்க்கிறது,” என்று பெயர் வெளியிட விரும்பாத பழைய ஐ.ஐ.டி.,யின் ஆசிரியர் ஒருவர் கூறினார், இந்த முறை எந்த ஐஐடியும் இதுபோன்ற எண்ணிக்கையை அடையவில்லை என்றும் அவர் கூறினார்.

ஸ்டார்ட்-அப்கள் பக்கம் யூ-டர்ன்

லக்ஷ்மி நாராயண் ராமசுப்ரமணியன் மேலும் கூறுகையில், பெரிய நிறுவனங்களில் இருந்து பணியமர்த்தப்பட்டவர்களில் சிலர் தனித்துவமான சலுகைகளை விட முன் வேலைவாய்ப்புகள் பெற்றவர்கள் என்று கூறினார்.

"ஒரு மந்தநிலை ஏற்பட்டுள்ளது மற்றும் அமேசான் மற்றும் ஐ.பி.எம் போன்ற சில பெரிய நிறுவனங்கள் பங்கேற்கவில்லை அல்லது ஐ.ஐ.டி.,களில் இருந்து இந்த ஆண்டு அதிகம் பணியமர்த்தவில்லை. பணியமர்த்தப்பட்டவர்கள் முக்கியமாக முன் வேலைவாய்ப்புகள் மூலம் வந்தவர்கள், ஆனால் இந்த முறை நிறைய ஸ்டார்ட்-அப்களும் பணியமர்த்தியுள்ளன,” என்று அவர் கூறினார்.

கடந்த ஆண்டு வரை, ஐ.ஐ.டி.,யின் வேலை வாய்ப்புத் தாளில் குறைவான ஸ்டார்ட் அப்கள் காணப்பட்டன, ஏனெனில் ஸ்டார்ட்-அப்களுக்கு CTC உயர்த்தப்பட்ட வாக்குறுதியுடன் சலுகைக் கடிதங்கள் வழங்கப்பட்டாலும், அவர்கள் சலுகைக் கடிதத்தை சேரும் தேதியாக மாற்றத் தவறிவிட்டதாக மாணவர்கள் புகார் கூறினர். .

"சில மாணவர்கள் கடந்த ஆண்டு சில ஸ்டார்ட்-அப்களில் சேர்க்கப்பட்டனர், ஆனால் அமெரிக்காவில் நிலவும் பொருளாதார நெருக்கடி மற்றும் உலகளாவிய தகவல் தொழில்நுட்ப பணிநீக்கங்கள் காரணமாக, அவர்கள் சேரும் தேதியை இன்னும் பெறவில்லை. ஓரிரு நிறுவனங்கள் தங்கள் சலுகைகளை ரத்து செய்தன, ஆனால் சில நிறுவனங்கள் திரும்பப் பெறவில்லை அல்லது சேரும் தேதியை வழங்கவில்லை,” என்று IIT-BHU இன் பயிற்சி மற்றும் வேலை வாய்ப்பு பிரிவின் நான்காம் ஆண்டு மாணவியும் முக்கிய குழு உறுப்பினருமான மேகலா பவ்யா கடந்த ஆண்டு indianexpress.com உடன் பகிர்ந்து கொண்டார்.

“ஆஃபர் லெட்டருக்கு உத்தரவாதம் அளிக்காததால், புத்தாக்க நிறுவனங்கள் முன்னதாகவே ஊக்குவிக்கப்படவில்லை, மேலும் பல மாணவர்கள் பாதிக்கப்படுகிறார்கள். எனது வகுப்பில் உள்ள சில மாணவர்களையும் நான் அறிவேன், அவர்கள் பெரிய CTC இல் பணியமர்த்தப்பட்டுள்ளனர், ஆனால் ஒருபோதும் சேருவதற்கான கடிதம் வழங்கப்படவில்லை. இருப்பினும், IIT டெல்லியின் தொழில் சேவைகள் அலுவலகம், எந்த நிறுவனங்கள் தங்கள் வார்த்தையைக் கடைப்பிடிக்கின்றன, எந்தெந்த நிறுவனங்களை மாணவர்கள் வளாகத்தில் பார்க்க விரும்புகிறார்கள் என்பதைத் திரையிட்டுள்ளது. எனவே முந்தைய ஸ்டார்ட்-அப்கள் நல்ல சாதனைப் பதிவு இல்லாவிட்டால் ஊக்கமளிக்கவில்லை,” என்று அவர் விளக்கினார்.

இருப்பினும், இந்த ஆண்டு இந்த போக்கு மாறுவது போல் தெரிகிறது, மேலும் பலர் இப்போது இந்தியாவில் ஸ்டார்ட்-அப் சுற்றுச்சூழல் அமைப்பு இந்த முறை சாத்தியமான மாற்றாக இருப்பதாக நம்புகிறார்கள்.

“கிட்டத்தட்ட அனைத்து ஐ.ஐ.டி.,களிலும் வேலை வாய்ப்புப் புள்ளிவிவரங்கள் குறைவாகவே உள்ளன. தற்போதைய உலகப் பொருளாதார நிலைமையை எங்கள் மாணவர்கள் அறிந்திருக்கிறார்கள், எனவே, முந்தைய ஆண்டை விட உள்நாட்டு சலுகைகளை நோக்கி திரும்பியுள்ளனர். இரண்டாம் கட்டமாக, புதிய நிறுவனங்கள் மற்றும் ஸ்டார்ட்-அப்களை அழைக்க நாங்கள் திட்டமிட்டுள்ளோம்,” என்று ஐ.ஐ.டி-காரக்பூரில் உள்ள தொழில் வளர்ச்சிக் குழுவின் தலைவர் ரஜிப் மைதி கூறினார்.

வி.ராம்கோபால் ராவ் மேலும், அனைத்து ஸ்டார்ட்-அப்களையும் ஒரே லென்ஸ் மூலம் மதிப்பீடு செய்ய முடியாது என்றும், அவற்றில் பல முறையான மற்றும் உறுதியான நிதியைக் கொண்டிருப்பதால், குறிப்பாக எதிர்காலத்தில் தொழில்முனைவோராக மாற விரும்பும் மாணவர்களுக்கு நல்ல கற்றல் வளைவை வழங்க முடியும் என்றும் நம்புகிறார்.

"பல மாணவர்கள் இப்போது ஸ்டார்ட்அப்களுக்காக வேலை செய்ய விரும்புகிறார்கள், ஏனென்றால் மிகப் பெரிய நிறுவனத்தில் சேருவதை விட இங்கு கிடைக்கும் அனுபவம் தங்களுக்கு உதவும் என்று அவர்கள் நினைக்கிறார்கள். எனவே சில நேரங்களில், நிறுவனங்களுக்கு ஸ்டார்ட்அப் வேலைகள் நிலையானதாக இருக்காது என்ற கவலை உள்ளது, ஆனால் ஒரு நிறுவனத்தைத் தொடங்கும் லட்சியம் காரணமாக ஸ்டார்ட்அப்களில் வேலை செய்ய விரும்பும் மாணவர்கள் அதிகமாக உள்ளனர், மேலும் பயிற்சி பெற இது ஒரு சிறந்த வழியாகும்," என்று அவர் கூறினார்.

பிட்ஸ் பிலானி உட்பட நிறைய பொறியியல் கல்லூரிகள் இப்போது வேலை வாய்ப்பு பருவத்தின் இரண்டாவது அமர்வுக்கு முன்னாள் மாணவர் சமூகத்தை சென்றடைகின்றன என்றும் அவர் கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“