இந்திய தொழில்நுட்பக் கழகம் (ஐ.ஐ.டி மெட்ராஸ்) எலக்ட்ரானிக் சிஸ்டம்ஸில் (Electronic Systems) புதிய நான்கு ஆண்டு ஆன்லைன் இளங்கலை அறிவியல் (பி.எஸ்) படிப்பைத் தொடங்கியுள்ளது. ஆர்வமுள்ள விண்ணப்பதாரர்கள் இப்போது இந்த புதிய திட்டத்திற்கு அதிகாரப்பூர்வ ஐ.ஐ.டி மெட்ராஸ் இணையதளத்தில் விண்ணப்பிக்கலாம் — http://study.iitm.ac.in/es/
இந்த புதிய படிப்பை மத்திய கல்வி அமைச்சர் தர்மேந்திர பிரதான் தொடங்கி வைத்தார். தற்போது 17,000க்கும் மேற்பட்ட மாணவர்கள் படிக்கும் டேட்டா சயின்ஸ் மற்றும் அப்ளிகேஷன்ஸில் பி.எஸ் பட்டப்படிப்பைத் தொடர்ந்து ஐ.ஐ.டி., சென்னையில் இது இரண்டாவது ஆன்லைன் பி.எஸ் படிப்பாகும்.
இதையும் படியுங்கள்: 2023-ம் மருத்துவ மாணவர் சேர்க்கை: புதிய இடங்களை ஒதுக்குவதில் சிக்கல்
இந்தியாவில் எலக்ட்ரானிக்ஸ் மற்றும் உட்பொதிக்கப்பட்ட (Embedded) உற்பத்தித் துறையில் திறமையான பட்டதாரிகளுக்கான குறிப்பிடத்தக்க மற்றும் வளர்ந்து வரும் தேவையை பூர்த்தி செய்யும் வகையில் இந்தப் படிப்பு வடிவமைக்கப்பட்டுள்ளது.
கல்வி கட்டணம்
பி.எஸ் எலக்ட்ரானிக் சிஸ்டம்ஸ் படிப்பிற்கான கட்டணம் கட்டுப்படியாகக் கூடியதாக இருக்கும் என்றும், எஸ்.சி/எஸ்.டி/ மாற்றுத்திறனாளி பிரிவைச் சேர்ந்த மாணவர்களுக்கும், குடும்ப வருமானம் ரூ.5 லட்சத்துக்கும் குறைவாக உள்ளவர்களுக்கும் கூடுதல் உதவித்தொகை வழங்கப்படும் என்றும் ஐ.ஐ.டி சென்னை கூறியுள்ளது.
தகுதி
இந்த படிப்பை, வயது வித்தியாசமின்றி, எலக்ட்ரானிக் சிஸ்டம்களில் ஆர்வமுள்ள யாரும் படிக்கலாம், விண்ணப்பதாரர் 12 ஆம் வகுப்பின் (அல்லது அதற்கு சமமான) ஒரு பகுதியாக கணிதம் மற்றும் இயற்பியலைப் படித்திருக்க வேண்டும் என்பதே ஒரே தகுதி அளவுகோலாகும்.
இந்த படிப்பில் சேர விண்ணப்பதாரர்களுக்கு JEE மதிப்பெண் தேவைப்படாது, மேலும் உள்ளமைக்கப்பட்ட நான்கு வார தகுதிச் செயல்முறை மூலம் இடத்தைப் பெறலாம். விண்ணப்பிப்பவர்களுக்கு ஐ.ஐ.டி மெட்ராஸ் ஆசிரியர்களால் கற்பிக்கப்படும் நான்கு வார உள்ளடக்கத்திற்கான அணுகல் வழங்கப்படும் மற்றும் தகுதித் தேர்வு இந்த உள்ளடக்கத்தின் அடிப்படையில் மட்டுமே இருக்கும். “இந்த காலகட்டத்தில் விண்ணப்பதாரர்களுக்கு விவாத அரங்கங்கள் மற்றும் நேரடி அமர்வுகள் வடிவில் போதுமான ஆதரவு வழங்கப்படும்” என்று ஐ.ஐ.டி சென்னை கூறியது.
இந்தப் படிப்பில் இடங்களின் எண்ணிக்கையில் வரம்பு இல்லாததால், தகுதித் தேர்வில் தேவையான குறைந்தபட்ச மதிப்பெண்ணைப் பெற்ற அனைவரும் படிக்கலாம்.
2023 ஆம் ஆண்டில் 12 ஆம் வகுப்பு படிக்கும் மாணவர்களும் விண்ணப்பித்து சேர்க்கையைப் பெறலாம். இவர்கள் இந்த ஆண்டு வாரியத் தேர்வுகளை வெற்றிகரமாக முடித்த பிறகு திட்டத்தில் சேரலாம். தற்போது (தற்போதைய UGC விதிமுறைகளின்படி அனுமதிக்கப்பட்டுள்ளபடி) வேறு ஏதேனும் கல்வித் திட்டத்தைத் தொடரும் மாணவர்கள் அல்லது பணிபுரியும் வல்லுநர்களும் இந்தப் பகுதியில் விண்ணப்பிக்கலாம் மற்றும் தங்களை மேம்படுத்திக் கொள்ளலாம்.
பாடநெறி அமைப்பு
பாடநெறி உள்ளடக்கம் ஆன்லைன் பயன்முறையில் வழங்கப்படும் போது, வினாடி வினாக்கள் மற்றும் தேர்வுகள் நேரில் இருக்கும். தகுதித் தேர்வுகள், நாடு முழுவதும் 150க்கும் மேற்பட்ட நகரங்களிலும், வெளிநாடுகளிலும் நேரில் நடத்தப்படும் தேர்வாக இருக்கும்.
இந்தப் படிப்பானது ஐ.ஐ.டி மெட்ராஸ் ஆசிரிய மற்றும் தொழில் வல்லுநர்களால் கற்பிக்கப்படும் கோட்பாடு மற்றும் ஆய்வக படிப்புகளின் கலவையை உள்ளடக்கியது. பாடநெறிகளின் ஒரு பகுதியாக, பதிவுசெய்யப்பட்ட வீடியோ விரிவுரைகள், வாசிப்புப் பொருட்கள், வாராந்திர மதிப்பீடுகள், பயிற்சிகள் மற்றும் காணொலி வாயிலாக சந்தேகங்களைத் தீர்க்கும் அமர்வுகள் மாணவர்களுக்கு வழங்கப்படும், இவை அனைத்தும் ஆன்லைனில் செய்யப்படலாம். ஆய்வகப் படிப்புகளுக்கு மாணவர்கள் ஒவ்வொரு செமஸ்டருக்கும் சுமார் இரண்டு வாரங்களுக்கு ஐ.ஐ.டி மெட்ராஸில் நேரில் கலந்துக் கொள்ள வேண்டும்.
“இந்த சுற்றுச்சூழல் அமைப்பிற்கான உலகளாவிய ஹாட்ஸ்பாட்டை உருவாக்க பி.எல்.ஐ (உற்பத்தி இணைக்கப்பட்ட ஊக்கத் திட்டம்) போன்ற முன்முயற்சிகளுடன் இந்திய அரசு நல்ல கொள்கை சீர்திருத்தங்களுக்கு உதவுகிறது. ஐ.ஐ.டி மெட்ராஸின் இயக்குனர் எப்போதும் நேரத்திற்கு முன்னால் இருப்பவர் என்பதில் நான் நம்பிக்கையும், மகிழ்ச்சியும், பெருமையும் அடைகிறேன். இந்த ஆண்டு பட்ஜெட் இந்த டிஜிட்டல் சுற்றுச்சூழல் அமைப்பிற்கான அரசாங்கத்தின் உறுதிப்பாட்டின் அறிகுறியாகும்… இந்த பாடநெறி மற்ற அனைத்து முக்கிய நிறுவனங்கள் மற்றும் தொழில்துறையினருக்கும் ஒரு புதிய அளவுகோலை உருவாக்கப் போகிறது, ”என்று கல்வி அமைச்சர் தர்மேந்திர பிரதான் ஐ.ஐ.டி மெட்ராஸில் கூறினார்.
தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil
