கேந்திரிய வித்யாலயா மாணவர் சேர்க்கை ஐந்தாண்டுகளில் சரிவு: மக்களவையில் அமைச்சர் தகவல்

Abhinaya Harigovind

மக்களவையில் ஒரு கேள்விக்கு பதிலளித்து மத்திய அரசு சமர்ப்பித்த தரவுகளின்படி, கேந்திரிய வித்யாலயாக்களில் (KVs) சேர்ந்த புதிய மாணவர்களின் எண்ணிக்கை 2024-25 ஆம் ஆண்டில் ஐந்து ஆண்டுகளில் இல்லாத அளவுக்குக் குறைந்துள்ளது.

இந்தச் செய்தியை ஆங்கிலத்தில் படிக்க கிளிக் செய்யவும்

2020-21 ஆம் ஆண்டில் 1.95 லட்சமாக இருந்த புதிய மாணவர் சேர்க்கை 2021-22 ஆம் ஆண்டில் 1.83 லட்சமாகவும், 2022-23 ஆம் ஆண்டில் 1.58 லட்சமாகவும் குறைந்துள்ளது. இந்த எண்ணிக்கை 2023-24 ஆம் ஆண்டில் 1.75 லட்சமாக உயர்ந்து, 2024-25 ஆம் ஆண்டில் 1.39 லட்சமாகக் குறைந்தது.

இந்த காலகட்டத்தில் கேந்திரிய வித்யாலயாக்களில் படிக்கும் மொத்த மாணவர்களின் எண்ணிக்கையும் குறைந்துள்ளது, 2020-21 ஆம் ஆண்டில் கிட்டத்தட்ட 13.88 லட்சத்திலிருந்து 2024-25 ஆம் ஆண்டில் 13.5 லட்சமாகக் குறைந்துள்ளது என்று எம்.பி.க்கள் பி.கே. பார்த்தசாரதி மற்றும் சுதா ஆர் ஆகியோரின் கேள்விக்கு பதிலளித்த கல்வி அமைச்சர் தர்மேந்திர பிரதான் வழங்கிய தரவுகள் தெரிவிக்கின்றன.

நாட்டில் மொத்தம் 1,280 கேந்திரிய வித்யாலயாக்கள் இயங்கி வருகின்றன. இந்தப் பள்ளிகள் இடமாற்றத்திற்கு உட்பட்ட மத்திய அரசு ஊழியர்களின் குழந்தைகளுக்கு சேவை செய்கின்றன.
கடந்த ஆண்டு டிசம்பரில் 85 புதிய கேந்திரிய வித்யாலயாக்களைத் திறக்க மத்திய அரசு ஒப்புதல் அளித்தபோதும், மாணவர் சேர்க்கையில் சரிவு ஏற்பட்டுள்ளது.

”நாடு முழுவதும் சிவில்/பாதுகாப்புத் துறையின் கீழ் 85 புதிய கேந்திரிய வித்யாலயாக்களைத் திறக்கவும், கர்நாடகாவின் சிவமோகாவில் ஏற்கனவே உள்ள ஒரு கேந்திரிய வித்யாலயாவில் அனைத்து வகுப்புகளிலும் இரண்டு கூடுதல் பிரிவுகளைச் சேர்த்து விரிவுபடுத்தவும் மத்திய அரசு ஒப்புதல் அளித்துள்ளது, இதற்காக ரூ. 5,872.08 கோடி மதிப்பிடப்பட்டுள்ளது” என்று அமைச்சர் தர்மேந்திர பிரதான் கூறினார்.

தர்மேந்திர பிரதான் வழங்கிய தரவுகளின்படி, கேந்திரிய வித்யாலயா சங்கதனுக்கு (கே.வி.எஸ்) ஒதுக்கப்பட்ட நிதி கடந்த ஆண்டில் நிலையான உயர்வைக் கண்டுள்ளது, இது 2020-21 இல் ரூ. 6,437.68 கோடியிலிருந்து 2024-25 இல் ரூ. 8,727 கோடியாக அதிகரித்துள்ளது.

இந்த ஆண்டின் தொடக்கத்தில், பி.எம் போஷன் (PM-POSHAN - மதிய உணவு) திட்டத்தின் கீழ் செயல்திறன், திட்டம் மற்றும் பட்ஜெட் குறித்து விவாதிக்க மாநிலங்கள் மற்றும் யூனியன் பிரதேசங்களுடனான சந்திப்புகளின் போது, 2024-25 ஆம் ஆண்டில் 23 மாநிலங்கள்/ யூனியன் பிரதேசங்களில் உள்ள தொடக்க மற்றும் உயர்நிலைப் பள்ளிகளில் அரசுப் பள்ளி சேர்க்கையில் ஏற்பட்ட வீழ்ச்சியைக் கல்வி அமைச்சகம் கண்டறிந்து, அதற்கான காரணங்களைக் கண்டறிந்து அறிக்கைகளை சமர்ப்பிக்குமாறு கேட்டுக் கொண்டது.