எம்.பி.பி.எஸ் மாணவர் சேர்க்கை தாமதம்: மருத்துவ இடங்கள் அதிகரிப்பால் புதிய சிக்கல்! கலந்தாய்வு எப்போது?

தமிழகத்தில் உள்ள 10-க்கும் மேற்பட்ட சுயநிதி மருத்துவக் கல்லூரிகள், 2-ம் கட்ட கலந்தாய்வில் 50 முதல் 150 எம்.பி.பி.எஸ். இடங்களை சேர்க்க உள்ளன. இத்துடன், 4 நிகர்நிலை பல்கலைக் கழகங்களும் தலா 100 இடங்களை சேர்க்க வாய்ப்புள்ளது. இதன் மூலம், மாநிலத்தில் கூடுதலாக ஆயிரத்து 750 மருத்துவ இடங்கள் உருவாகும் என எதிர்பார்க்கப்படுகிறது. இது மாணவர்களுக்கும் பெற்றோர்களுக்கும் மகிழ்ச்சியான செய்தி என்றாலும், கல்வியாளர்கள் மத்தியில் இது கவலையை ஏற்படுத்தி உள்ளது. நடப்பு கல்வியாண்டுக்கான மாணவர் சேர்க்கை தேதி குறிப்பிடப்படாமல் ஒத்திவைக்கப்பட்டுள்ளதால் இந்நிலை ஏற்பட்டுள்ளது.

தேசிய மருத்துவ ஆணையம் ஆய்வு

மருத்துவக் கல்வியை ஒழுங்குபடுத்தும் உச்ச அமைப்பான தேசிய மருத்துவ ஆணையம், நாடு முழுவதும் உள்ள கல்லூரிகளுக்கான விண்ணப்பங்களை ஆய்வு செய்து வருகிறது. இதனால், மருத்துவ அறிவியல் இயக்குநரகத்தின் கீழ் செயல்படும் மருத்துவ கலந்தாய்வுக் குழுவிடம் மாணவர் சேர்க்கையை நிறுத்தி வைக்குமாறு கோரியுள்ளது.

ஆக.23-ஆம் தேதி, வெளியிட்ட அறிவிப்பில், "தேசிய மருத்துவ ஆணையத்திடமிருந்து பெறப்பட்ட தகவலின்படி, 2025-ஆம் கல்வி ஆண்டுக்கான எம்.பி.பி.எஸ் இடங்களை அதிகரிக்கும் பணி நடந்து வருகிறது. புதிதாக அங்கீகரிக்கப்பட்ட எம்பிபிஎஸ் இடங்களை 2-ம் கட்ட கலந்தாய்வில் சேர்க்கும் நோக்கில், கலந்தாய்வை ஆக.29 முதல் தொடங்க தகுந்த அதிகாரம் கொண்ட குழு முடிவு செய்துள்ளது. 2-ம் கட்ட கலந்தாய்வுக்கான திருத்தப்பட்ட கால அட்டவணை விரைவில் வெளியிடப்படும்" என கூறப்பட்டுள்ளது.

இதன்பிறகு எந்த அறிவிப்பும் வெளியாகவில்லை. மாநிலத் தேர்வுக் குழு அதிகாரிகள், மத்திய குழுவிடம் இருந்து தகவல் வராமல் திருத்தப்பட்ட கால அட்டவணையை வெளியிட முடியாது என தெரிவித்துள்ளனர். மத்திய குழுவானது, அரசு கல்லூரிகளில் உள்ள 15% இடங்களுக்கும், மத்திய நிறுவனங்கள் மற்றும் நிகர்நிலைப் பல்கலைக்கழகங்களில் உள்ள அனைத்து இடங்களுக்கும் மாணவர்களை ஒதுக்குகிறது. "மாநில கலந்தாய்வு எப்போதும் மத்திய குழுவின் கலந்தாய்வைத் தொடர்ந்துதான் நடக்கும்" என்று தேர்வு குழுவின் மூத்த அதிகாரி ஒருவர் டைம்ஸ் ஆஃப் இந்தியா நாளிதழுக்கு அளித்த பேட்டியில் தெரிவித்தார்.

புதிய மாணவர்களுக்கான வகுப்புகள் தொடங்கும் நாள் செப்.5-ஆம் தேதிக்கு பதிலாக, ஒத்திவைக்கப்பட்டுள்ளதாக மத்திய குழு மாநிலத்திற்கு தெரிவித்துள்ளது. கல்லூரி தொடங்கும் முதல் நாள் செப்.20-ஆம் தேதிக்கு பிறகு இருக்கும் என்றும், நான்கு கட்ட கலந்தாய்வும் முடிவடைய ஒரு மாதம் ஆகும் என்றும் அதிகாரிகள் கூறுகின்றனர்.

"மாணவர் சேர்க்கை தாமதமாகும் போது, பாடத்திட்டத்தை சரியான நேரத்தில் முடிக்க, படிப்பு விடுமுறைகள் மற்றும் பிற விடுமுறைகள் குறைக்கப்பட்டு, வகுப்புகள் அவசரமாக நடத்தப்படுகின்றன" என்று அரசு மருத்துவக் கல்லூரி பேராசிரியர் ஒருவர் கூறுகிறார்.

ஏற்கனவே விரிவான பாடத்திட்டம் கொண்ட இந்த படிப்பு, அவசர வகுப்புகளால் புதிய மாணவர்களுக்கு கூடுதல் அழுத்தத்தை ஏற்படுத்துகிறது என்றார் அவர். மேலும், "இறுதியாண்டு தேர்வுக்கான நேரம் நிர்ணயிக்கப்பட்டிருப்பதால், பாடத்திட்டத்திற்கான கால அவகாசத்தை மாற்றியமைக்க முடியாது. இறுதி ஆண்டு தேர்வுகள் தாமதமானால், முதுகலை படிப்பு சேர்க்கையிலும் மாணவர்கள் சிக்கல்களை எதிர்கொள்ள நேரிடும்" என்றும் அவர் குறிப்பிட்டார்.