மத்திய உள்துறை அமைச்சகத்தின் I4சி பயிற்சி: இன்றே விண்ணப்பிக்க கடைசி நாள்!

மத்திய உள்துறை அமைச்சகத்தின் (MHA) கீழ் இயங்கும் இந்திய சைபர் குற்ற ஒருங்கிணைப்பு மையம் (I4C), சைபர் பாதுகாப்பு மற்றும் டிஜிட்டல் தடயவியல் துறைகளில் ஆர்வமுள்ள இளங்கலை மற்றும் முதுகலை பட்ட மாணவர்களுக்கான குளிர்காலப் பயிற்சித் திட்டம் 2025 (Winter Internship Programme 2025) அறிவித்துள்ளது. இந்த திட்டத்தில் சேர விண்ணப்பிப்பதற்கான கடைசி நாள் இன்று (அக்டோபர் 17, 2025) ஆகும். I4C குளிர்காலப் பயிற்சித் திட்டத்திற்கு விண்ணப்பிக்க கல்விப் பின்னணி கொண்ட மாணவர்கள் தகுதியுடையவர்கள் ஆவர்.

பொறியியல் மற்றும் தொழில்நுட்பம்: கணினி அறிவியல், தகவல் தொழில்நுட்பம்,சி.எஸ்.இ, மின் அல்லது மின்னணுத் தொடர்பு பொறியியல் (ECE), சைபர் செக்யூரிட்டி, தகவல் பாதுகாப்பு, சைபர் தடயவியல், செயற்கை நுண்ணறிவு (AI), இயந்திர கற்றல் (ML), மற்றும் தரவு பகுப்பாய்வு (Data Analytics).

இந்த செய்தியை ஆங்கிலத்தில் படிக்க

சட்டம் மற்றும் சமூக அறிவியல்: எல்.எல்.பி. அல்லது எல்.எல்.எம் படித்த சட்ட மாணவர்கள், மற்றும் குற்றவியல் (Criminology) அல்லது சமூகவியல் (Sociology) பயிலும் மாணவர்களும் விண்ணப்பிக்கலாம்.

திறன் சார்ந்த சிறப்புப் பிரிவுகள்: பிளாக்செயின் தொழில்நுட்பம், டார்க் வெப் நிபுணத்துவம், நெறிமுறை ஹேக்கிங் சான்றிதழ், API அல்லது மென்பொருள் மேம்பாடு, ஆட்டோமேஷன், மால்வேர் பகுப்பாய்வு மற்றும் ரிவர்ஸ் இன்ஜினீயரிங்.

ஊடகம் மற்றும் தொடர்பு: இதழியல் (Journalism), மக்கள் தொடர்பு (Mass Communication), புதிய ஊடகம் அல்லது டிஜிட்டல் இதழியலில் BA அல்லது MA படிக்கும் மாணவர்கள்; டிஜிட்டல் மீடியா, உள்ளடக்க எழுத்து, கிராஃபிக் வடிவமைப்பு அல்லது வீடியோ எடிட்டிங்கில் டிப்ளோமா அல்லது பட்டம் பெற்றவர்கள்.

நிர்வாகம்: தரவு பகுப்பாய்வில் கவனம் செலுத்தும் பி.பி.ஏ அல்லது எம்.பி.ஏ. மாணவர்கள்.

இந்தக் கட்டணமில்லாப் பயிற்சித் திட்டம், பங்கேற்பாளர்களுக்குச் சைபர் குற்ற விசாரணை, டிஜிட்டல் தடயவியல் மற்றும் தேசியப் பாதுகாப்பு நடவடிக்கை ஆகியவற்றில் நேரடிக்கள அனுபவத்தை பெற வாய்ப்பளிக்கிறது. மேலும், அனுபவம் வாய்ந்த நிபுணர்களுடன் இணைந்து பணிபுரிந்து பொதுப் பாதுகாப்பிற்குப் பங்களிக்க முடியும். வெற்றிகரமான நிறைவுக்குப் பிறகு, I4C-இடமிருந்து அதிகாரப்பூர்வச் சான்றிதழ் வழங்கப்படும்.

விண்ணப்பிக்கும் முறை (இன்று கடைசி நாள்)

விண்ணப்பதாரர்கள் விண்ணப்பிக்கும் நேரத்தில் தேவையான அனைத்து ஆவணங்களையும் பதிவேற்றுவது கட்டாயமாகும். ஆவணங்கள் முழுமையாகவும் சரிபார்க்கப்பட்டதாகவும் இருப்பதை வைத்தே தேர்வர்கள் இறுதி செய்யப்படுவார்கள்.

படி 1: அதிகாரப்பூர்வ இணையதளத்திற்குச் செல்லவும்: i4c.mha.gov.in.

படி 2: "What’s New" (புதியது என்ன?) பிரிவில் கிளிக் செய்யவும்.

படி 3: விண்ணப்பப் படிவம் மற்றும் உறுதிமொழிப் பத்திரம் (Undertaking) அடங்கிய Internship SOP-ஐப் பதிவிறக்கவும்.

படி 4: படிவத்தை நிரப்பி, தேவையான அனைத்து ஆவணங்களையும் பதிவேற்றவும்.

படி 5: SOP-யில் கொடுக்கப்பட்டுள்ள கூகிள் படிவ (Google Form) இணைப்பு வழியாக உங்கள் விண்ணப்பத்தைச் சமர்ப்பிக்கவும்.

பட்டியலில் தேர்ந்தெடுக்கப்பட்ட விண்ணப்பதாரர்களுக்கு, விண்ணப்பக் காலக்கெடு முடிந்த 4 முதல் 5 வாரங்களுக்குள் I4C மூலம் தகவல் தெரிவிக்கப்படும். இந்தப் பயிற்சிக்கு ஊதியம் வழங்கப்படாது, மேலும் I4C அல்லது மாநில/யூனியன் பிரதேச காவல் துறையினரால் தங்குமிட வசதி அளிக்கப்படாது என்பதும் குறிப்பிடத்தக்கது.