தமிழ்நாடு அரசு சார்ந்த பணியிடங்களுக்கு தமிழ்நாடு அரசு பணியாளர் தேர்வாணையம் (TNPSC) மூலம் தேர்வு நடத்தப்பட்டு ஆட்சேர்ப்பு நடைபெறுகிறது. பல்வேறு அரசு துறை வேலைகளுக்கு குரூப் 1, குரூப் 4 என மொத்தம் 8 வகைகளில் தேர்வு நடத்தப்படுகிறது.
அந்த வகையில் குரூப் 1 தேர்வு துணை ஆட்சியர். மாவட்ட காவல்துறை துணை கண்காணிப்பாளர் எனப் பல்வேறு உயர் பதவிகளுக்கு தேர்வு நடத்தப்படுகிறது. முதல்நிலைத் தேர்வு, முதன்மைத் தேர்வு, நேர்காணல் என மூன்று பிரிவு அடிப்படையில் ஆட்கள் தேர்வு செய்யப்படுவர். அந்த வகையில் குரூப் 1 பிரிவில் காலியாக இருந்த 92 பணியிடங்களை நிரப்புவதற்கான தேர்வு கடந்த ஆண்டு நவம்பர் 11-ம் தேதி தமிழகம் முழுவதும் நடைபெற்றது. 92 பணியிடங்களுக்கு சுமார் 2 லட்சம் பேர் தேர்வு எழுதினர்.
இந்த தேர்வு முடிவுகள் நேற்று முன்தினம் வெளியானது. 2 லட்சம் பேர் தேர்வு எழுதியதில் 2,162 பேர் தேர்வு செய்யப்பட்டனர். இவர்களுக்கு ஆகஸ்ட் மாதம் 10-ம் தேதி முதல் 13-ம் தேதி வரை முதன்மை தேர்வு நடைபெறும் என அறிவிக்கப்பட்டுள்ளது.
இந்நிலையில், சென்னை முன்னாள் மேயர், மனித நேயம் ஐ.ஏ.எஸ் அகாடமி தலைவர் சைதை துரைசாமி மாணவர்களை ஊக்குவிக்கும் வகையில் அறிவிப்பு ஒன்றை வெளியிட்டுள்ளார். அதில், “டிஎன்பிஎஸ்சி குரூப் I முதல்நிலைத் தேர்வில் தேர்ச்சி பெற்ற 100 பேருக்கு மாதம் ரூ.10,000 உதவித்தொகை மற்றும் மே இரண்டாவது வாரம் முதல் ஆகஸ்ட் முதல் வாரம் வரை 3 மாத காலம் முதன்மைத் தேர்வுக்கு தயராவதற்கான சிறப்பு பயிற்சி வழங்கப்படும்” என அறிவித்துள்ளார்.
மனித நேயம் ஐஏஎஸ் அகாடமி வெளியிட்டுள்ள அறிவிப்பில், “100 பேர் தேர்வுக் குழு மூலம் தேர்வு செய்யப்பட்டு, 3 மாத காலம் மெயின்ஸ் தேர்வுக்கு தயாராவதற்கான இலவசப் பயிற்சி அளிக்கப்படும். முதன்மைத் தேர்வுக்கான இலவசப் பயிற்சி மே இரண்டாவது வாரத்தில் தொடங்கி ஆகஸ்ட் முதல் வாரத்தில் முடிவடையும். விவரங்களுக்கு 044-24358373, 044-24330095, 9940069739 என்ற எண்ணில் தொடர்பு கொள்ளலாம்” என அதில் தெரிவிக்கப்பட்டுள்ளது.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
