மாணவர்களுக்கு அதிக அழுத்தம் ஏற்படலாம், நஷ்டத்தை சந்திப்போம்: புதிய வழிகாட்டுதல்கள் குறித்து பயிற்சி மையங்கள் கவலை

Vidheesha Kuntamalla , Abhinaya Harigovind

மாணவர்கள் மீதான கல்வி அழுத்தம் அதிகரிப்பு, பயிற்சி மையங்களுக்கான நிதி இழப்பு மற்றும் பல ஆசிரியர்களுக்கு வேலை இழப்பு அச்சுறுத்தல்; 16 வயதுக்குட்பட்ட மாணவர்களை பயிற்சி மையங்களில் சேர்க்க முடியாது என்று கல்வி அமைச்சகம் வெளியிட்டுள்ள சமீபத்திய வழிகாட்டுதல்கள் குறித்து டெல்லி-என்.சி.ஆர் முழுவதும் உள்ள பயிற்சி நிறுவனங்கள் எழுப்பிய சில கவலைகள் இவை.

ஆங்கிலத்தில் படிக்க: Students will face more pressure, we’ll face losses: Coaching centres on new guidelines

தனியார் பயிற்சி நிறுவனங்களை ஒழுங்குபடுத்துவதற்கான புதிய வழிகாட்டுதல்கள் சட்ட கட்டமைப்பின் தேவையை நிவர்த்தி செய்வதற்கும் அவற்றின் கட்டுப்பாடற்ற வளர்ச்சியை நிர்வகிப்பதற்கும் உருவாக்கப்பட்டுள்ளன. “எந்த ஒரு பயிற்சி மையமும் பட்டப்படிப்பை விட குறைவான தகுதிகளைக் கொண்ட ஆசிரியர்களை பணியமர்த்தக் கூடாது. மாணவர்களைச் சேர்ப்பதற்காக நிறுவனங்கள் தவறான வாக்குறுதிகளை அளிக்கவோ அல்லது ரேங்க் அல்லது நல்ல மதிப்பெண்களை பெற்றோருக்கு உத்தரவாதம் அளிக்கவோ கூடாது... பயிற்சி நிறுவனங்கள் 16 வயதுக்குட்பட்ட மாணவர்களைச் சேர்க்க முடியாது,” என்று புதிய வழிகாட்டுதல்கள் கூறுகின்றன.

நொய்டாவின் வித்யாமந்திர் பயிற்சி மையத்தின் அதிகாரிகள் கூறுகையில், “இந்த விதி JEE மெயின்ஸ் மற்றும் அட்வான்ஸ்டு தேர்வுகளுக்கு தயாராகும் மாணவர்களை கடுமையாக பாதிக்கும். பதினொன்றாம் வகுப்பில் படிக்கும் போது தான் பெரும்பாலான மாணவர்கள் 16 வயதை அடைகிறார்கள். ஒரு வருடத்தில் இவ்வளவு கடினமான தேர்வுக்கு மாணவர்களைப் பயிற்றுவிக்கலாம் என்று எப்படி எதிர்பார்க்க முடியும்? பெரும்பாலும், பன்னிரண்டாம் வகுப்பு படிக்கும் அல்லது தேர்ச்சி பெற்ற மாணவர்கள் JEE தேர்வில் பங்கேற்க தகுதியுடையவர்கள். அரசாங்கம், இந்த விஷயத்தில், மாணவர்கள் தேர்வு எழுதக் கூடிய முயற்சிகளின் எண்ணிக்கையை அதிகரிக்க வேண்டும்,” என்று கூறினர்.

"இந்த விதி நடைமுறைக்கு வர வேண்டும் என்றால், அனைத்து நிறுவனங்களும் ஒன்பதாம் மற்றும் பத்தாம் வகுப்பு மாணவர்களுக்கான பயிற்சியை நிறுத்த வேண்டும். இது ஆசிரியர்களையும் மோசமாக பாதிக்கும், ஏனெனில் அவர்கள் வேலை இழக்க நேரிடும்,” என்று அந்த அதிகாரி கூறினார்.

வி.எம்.சி.,யின் நொய்டா கிளையில், தற்போது, ​​இந்த நிறுவனத்தில் சேர்ந்துள்ள மொத்த மாணவர் எண்ணிக்கையில் சுமார் 30% பேர் 16 வயதுக்குட்பட்ட மாணவர்கள் என்று அதிகாரி கூறினார்.

ஐ.ஐ.டி மற்றும் நீட் தேர்வாளர்களுக்கு பயிற்சி அளிக்கும் கலு சராய் பயிற்சி மையமான ஸ்டூடண்ட்ஸ் ஹெல்ப்பரின் நிர்வாகத் தலைவர் ராகுல் குப்தா, “மாணவர்கள் மீதான உளவியல் அழுத்தத்தைக் குறைக்க அமைச்சகம் இதைச் செய்தால், இந்த முயற்சி பின்வாங்கக்கூடும் என்று நான் பயப்படுகிறேன். இரண்டு வருடங்களில் இந்த அதிக போட்டித் தேர்வுகளுக்கு மாணவர்களைத் தயார்படுத்துவது மிகவும் கடினம். இந்த போட்டித் தேர்வுகளின் கடுமையை பள்ளி பாடத்திட்டம் பூர்த்தி செய்யாததால் மாணவர்கள் ஒன்பதாம் வகுப்பிலிருந்து தயாராகத் தொடங்க வேண்டும். இது மாணவர்களின் வருகையை மோசமாக பாதிக்கும், மேலும் நிறுவனங்களின் வணிகத்தை பாதிக்கலாம்,” என்று கூறினார்.

ராகுல் குப்தா தனது நிறுவனத்தில் சேர்ந்துள்ள மாணவர்களில் சுமார் 40% பேர் 16 வயதுக்குட்பட்டவர்கள், 9 மற்றும் 10 ஆம் வகுப்பு படித்து வருகின்றனர் என்று கூறினார்.

ராகுல் குப்தா மேலும் கூறுகையில், “வசதியான குடும்பத்தில் இருந்து வரும் மாணவர்கள் வீட்டில் கூடுதல் பயிற்சிக்காக தனியார் கல்வியை வாங்க முடியும். ஆனால் அவர்களின் மருத்துவம் மற்றும் பொறியியல் கனவுகளுக்குத் தயாராவதற்கு சிறிய கிராமங்களிலிருந்து டெல்லி வரை உதவித்தொகையில் வரும் மாணவர்களைப் பற்றி என்ன? இந்த விதியை அமல்படுத்துவது மேலும் சிக்கல்களை உருவாக்கத்தான் போகிறது” என்று கூறினார்.

பஸ்சிம் விஹாரில் உள்ள டர்னிங் பாயின்ட் கோச்சிங் இன்ஸ்டிட்யூட் நிர்வாக இயக்குனர் டி.என் சௌத்ரி கூறுகையில், “பயிற்சி மையம் இல்லையென்றால், அவர்கள் டியூஷனுக்கு செல்லலாம் அல்லது ஆன்லைனில் ஏற்பாடுகளை செய்யலாம். பயிற்சி நிறுவனங்கள் 7 அல்லது 8 ஆம் வகுப்பிலிருந்து மாணவர்களை அழைத்துச் செல்கின்றன. இளைய வகுப்புகளுக்கு, 6-8 வகுப்பு, மாணவர்கள் சில நேரங்களில் உயர் வகுப்புகளுக்கு கணிதப் பயிற்சிக்கு வருவார்கள். ஒன்பதாம் வகுப்பு மற்றும் பத்தாம் வகுப்பு மாணவர்கள் நீட் மற்றும் ஜே.இ.இ அடிப்படை பயிற்சிக்கு வருகிறார்கள். எங்களிடம் சேர்ந்த மாணவர்களில் சுமார் 10% முதல் 20% பேர் 16 வயதுக்கு குறைவானவர்களாக இருப்பார்கள்,” என்று கூறினார்.

மாணவர்கள், பெற்றோர் கூறுவது என்ன?

2023ல் நீட் தேர்வில் தேர்ச்சி பெற்று, தற்போது டெல்லி எய்ம்ஸ் மருத்துவமனையில் படித்து வரும் பரிதாபாத்தைச் சேர்ந்த தேவ் பாட்டியா கூறுகையில், “நான் 14 வயதில் ஒன்பதாம் வகுப்பில் பயிற்சி எடுக்க ஆரம்பித்தேன். என் தம்பி எட்டாம் வகுப்பு படிக்கும் போது ஒரு கோச்சிங் சென்டரில் சேர்ந்தான், அவன் இப்போது பத்தாம் வகுப்பு படிக்கிறான். அது என்னுடைய நீட் தேர்வுக்கு உதவியாக இருந்தது என்று சொல்லலாம். சமீபத்தில், கோட்டாவில் தற்கொலைகள் பற்றிய செய்தி வந்தது. எனவே, கூடுதல் அழுத்தத்தைத் தவிர்ப்பது அர்த்தமுள்ளதாக இருக்கும். ஆனால் அது நபரைப் பொறுத்தது, அது மாறுபடும்,” என்று கூறினார்.

கடந்த ஆண்டு நீட் தேர்வு எழுதிய பிரகதா கோஷ், டெல்லி எய்ம்ஸில் படித்து வருகிறார், அவர் 14 வயதில் ஒரு பயிற்சி மையத்தில் சேர்ந்ததாக கூறினார். மேலும், செய்ய முடிந்த மாணவர்களுக்கு, ஒலிம்பியாட்ஸ் போன்ற கூடுதல் வேலைகளை வழங்குகிறார்கள். ஆனால் பிடிக்காதவர்கள் விட்டுவிடலாம். பள்ளி மட்டத்தில் கூடுதல் வழிகாட்டுதல் இருக்கலாம். இந்த கட்டுப்பாடு தேவையில்லை என்று நான் நினைக்கிறேன், ”என்றும் அவர் கூறினார்.

மாணவர்கள் மீதான அழுத்தத்தை குறைக்கும் அரசின் நல்ல நடவடிக்கை இது என்று அகில இந்திய பெற்றோர் சங்கத்தின் தலைவர் அப்ரஜிதா கவுதம் கூறினார். "ஆனால் அமைப்பில் ஒரு சரிபார்ப்பு மற்றும் சமநிலை இருக்க வேண்டும். வழிகாட்டுதல்களை நடைமுறைப்படுத்துவதில் சிக்கல் அடிக்கடி எழுகிறது, மேலும் மாணவர்களை சுமையாக மாற்றுவதில் தீவிரமாக பங்களிக்கும் பிரச்சினைகளை அரசாங்கம் அடையாளம் காணும் என்று நம்புகிறேன்,” என்று அவர் கூறினார்.

கவுதம் மேலும் கூறுகையில், டெல்லியில் உள்ள தனது சொந்த மகள் நீட் தேர்வில் தேர்ச்சி பெற பயிற்சி எடுத்துள்ளார், மேலும் "நமது அமைப்பு மற்றும் பாடத்திட்டம் கூடுதல் பயிற்சி தேவையில்லை என்பதை உறுதிப்படுத்தும் அளவுக்கு வலுவாக இருக்க வேண்டும்" என்று மீண்டும் வலியுறுத்தினார். “இந்தப் போட்டித் தேர்வுகளில் பள்ளிப் பாடத்திட்டத்தின் மூலம் மட்டுமே மாணவர்கள் தேர்ச்சி பெறுவதை உறுதிசெய்யும் அளவுக்கு நமது கல்வி முறையை வலுப்படுத்த வேண்டும்,” என்றும் அவர் கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“