காவல்துறையில் வெடிகுண்டு கண்டறிதல் பிரிவில் வேலை: யார் விண்ணப்பிக்கலாம்?

தமிழ்நாடு காவல்துறையின் வெடிகுண்டு கண்டறிதல் மற்றும் செயலிழக்கச் செய்யும் பிரிவுகளில் (BDDS) காலியாக உள்ள பல்வேறு பணியிடங்களுக்கான விண்ணப்பங்கள், முன்னாள் ராணுவ வீரர்கள் மற்றும் முன்னாள் துணை ராணுவப்படை வீரர்களிடமிருந்து வரவேற்கப்படுகின்றன. இது ஒரு வருட கால ஒப்பந்த அடிப்படையிலான பணி நியமனம் ஆகும்.

திறன் வாய்ந்த, அனுபவமிக்க வீரர்களைப் பயன்படுத்தும் நோக்கில் இந்தப் பணியிடங்கள் அறிவிக்கப்பட்டுள்ளன.

காலிப் பணியிடங்கள் விவரம்:

தமிழ்நாடு காவல்துறையின் வெடிகுண்டு கண்டறிதல் மற்றும் செயலிழக்கப் பிரிவுகளில் ஒப்பந்த அடிப்படையில் பணிபுரிய பின்வரும் மூன்று பதவிகளுக்கு ஆட்கள் தேவைப்படுகிறார்கள்:

எண்    பதவி (BDDS)    முன்னாள் ராணுவ/துணைப்படை பதவிக்கு நிகரானது    காலியிடங்கள்    ஊதிய அளவு 

(i)    ஆய்வாளர்    முன்னாள் சுபேதார் / சுபேதார் மேஜர்    2    ரூ.37,700 - ரூ.1,19,500

(ii)    உதவி ஆய்வாளர்    முன்னாள் நாயிப் சுபேதார்    14    ரூ.36,900 - ரூ.1,16,600

(iii)    தலைமைக் காவலர்    முன்னாள் ஹவில்தார் / நாயக்    43    ரூ.20,600 - ரூ.65,500

விண்ணப்பிப்பதற்கான தகுதிகள்:

இந்த ஒப்பந்தப் பணிக்கு விண்ணப்பிக்கும் முன்னாள் வீரர்கள் பின்வரும் முக்கியத் தகுதிகளைக் கொண்டிருக்க வேண்டும்:

வயது வரம்பு: 01.07.2025 தேதியன்று 50 வயதுக்குக் கீழ் இருக்க வேண்டும்.

கல்வித் தகுதி: குறைந்தபட்சம் எஸ்.எஸ்.எல்.சி. (10-ஆம் வகுப்பு) அல்லது அதற்குச் சமமான தேர்வில் தேர்ச்சி பெற்றிருக்க வேண்டும்.

தொழில்நுட்பத் தகுதி: CME (புனே), NSG அல்லது BCAS போன்ற அங்கீகரிக்கப்பட்ட நிறுவனங்களால் நடத்தப்படும், குறைந்தபட்சம் 6 வார BDD படிப்பில் (Bomb Detection and Disposal) தகுதி பெற்றிருக்க வேண்டும்.

அனுபவம்: ராணுவம் அல்லது துணை ராணுவப் படைகளில் குறைந்தபட்சம் 10 ஆண்டுகள் பணி அனுபவம் இருக்க வேண்டும். அத்துடன், இந்திய ராணுவத்தின் 261 அல்லது 262 CED பிரிவு, CME-இன் EDD பிரிவு, NSG-இன் BD பிரிவு, NBDC அல்லது விமான நிலையங்களின் BD பிரிவுகளில் ஏதேனும் ஒன்றில் நல்ல திறன் மற்றும் களப் பயிற்சி அனுபவம் அவசியம்.

கூடுதல் திறன்: தமிழ் மற்றும் ஆங்கிலம் ஆகிய இரு மொழிகளிலும் BDD குறித்துப் பயிற்சி அளிக்கும் திறன் பெற்றிருக்க வேண்டும்.

மருத்துவத் தகுதி: SHAPE-I என நிர்ணயிக்கப்பட்டிருக்க வேண்டும்.

விண்ணப்பிக்கும் முறை மற்றும் காலக்கெடு:

தகுதியுள்ள விண்ணப்பதாரர்கள், தங்கள் சுயவிவரங்கள் (Bio Data) மற்றும் தேவையான சான்றிதழ்களின் நகல்களுடன் (கல்விச் சான்றிதழ்கள், டிஸ்சார்ஜ் புத்தகம், ஓய்வூதிய ஆணை, BDD படிப்பு/அனுபவச் சான்றிதழ்கள்) கீழ்க்கண்ட முகவரிக்கு அஞ்சல் மூலம் அனுப்ப வேண்டும்:

முகவரி:

கூடுதல் காவல்துறை இயக்குநர்,
செயலாக்கம், மருதம், எண்.17,
போட் கிளப் சாலை, இராஜா அண்ணாமலைபுரம்,
சென்னை – 600 028.

கடைசி தேதி: விண்ணப்பங்கள் வந்து சேர வேண்டிய இறுதித் தேதி 31.10.2025 ஆகும்.

தேர்வு முறை:

தகுதியான விண்ணப்பதாரர்களுக்கு மட்டுமே தனிப்பட்ட அழைப்புக் கடிதங்கள் அனுப்பப்பட்டு, சான்றிதழ் சரிபார்ப்பு, எழுத்துத் தேர்வு மற்றும் நடைமுறைத் தேர்வுகள் உள்ளிட்ட தேர்வுச் சோதனைகளுக்கு அழைக்கப்படுவார்கள்.