3 அரசு பொறியியல் கல்லூரிகளில் மின்சார வாகன தொழில்நுட்ப ஆய்வகம்; எங்கெங்கு தெரியுமா?

திருநெல்வேலி, தர்மபுரி மற்றும் ஈரோடு ஆகிய மூன்று அரசு பொறியியல் கல்லூரிகளில் நவீன மின்சார வாகன தொழில்நுட்ப ஆய்வகங்களை நிறுவ உயர்கல்வித் துறை முடிவு செய்துள்ளதாக டி.டி நெக்ஸ்ட் செய்தி வெளியிட்டுள்ளது.

வளர்ந்து வரும் மின்சார வாகன தொழில்நுட்பத்திற்கு முக்கியத்துவம் அளிக்கும் வகையில், அரசு பொறியியல் கல்லூரிகளில் ஆய்வகங்களை நிறுவ உயர்கல்வித் துறை முடிவு செய்துள்ளது. அந்த வகையில் நெல்லை, ஈரோடு, தருமபுரி ஆகிய 3 அரசு பொறியியல் கல்லூரிகளில் இந்த ஆய்வகங்கள் நிறுவப்பட உள்ளன. 

இந்த மின்சார வாகன (EV) தொழில்நுட்ப ஆய்வகங்கள், மின்சார வாகனத் துறையில் திறமையான நிபுணர்களுக்கான வளர்ந்து வரும் தேவையைப் பூர்த்தி செய்யும் வகையில் அமைக்கப்பட உள்ளது. ஒவ்வொரு ஆய்வகத்திலும் மின்சார வாகன வேலை செய்யும் பெஞ்ச், கட்டுப்பாட்டு அமைப்புடன் கூடிய ஹப் மோட்டார் அமைப்பு, மின்சார வாகன மோட்டார் சோதனை பெஞ்ச், EV பேட்டரி சோதனை பெஞ்ச், EV சரிபார்ப்புக்கான இணையம் (IoT) அமைப்பு, EV சர்வீசிங் மற்றும் சரிசெய்தல் மற்றும் அனைத்து சமீபத்திய உபகரணங்களுடன் கூடிய இயந்திர பட்டறை உள்ளிட்ட மாணவர்களுக்கான சமீபத்திய மற்றும் நவீன வசதிகள் இருக்கும் என்று உயர்கல்வித் துறை தரப்பில் தெரிவிக்கப்பட்டுள்ளது.

”நெல்லை, தர்மபுரி மற்றும் ஈரோடு ஆகியவை மின்சார வாகன உற்பத்திக்கு சாத்தியமான பகுதிகளாக உள்ளன. இந்த ஆய்வகங்கள் நேரடி பயிற்சி, ஆராய்ச்சி வாய்ப்புகள் மற்றும் தொழில்துறை ஒத்துழைப்புகளை வழங்குகின்றன, பேட்டரி மேலாண்மை, பவர்டிரெய்ன் மேம்பாடு மற்றும் வாகனக் கட்டுப்பாட்டு வழிமுறைகள் போன்ற மின்சார வாகன தொழில்நுட்பத்தின் பல்வேறு அம்சங்களில் கவனம் செலுத்துகின்றன,” என்று உயர்கல்வித் துறையின் மூத்த அதிகாரி ஒருவர் தெரிவித்தார்.

“ஒவ்வொரு ஆய்வகத்திலும் செயல்பாடுகளைப் புரிந்துகொள்வதற்கான சார்ஜிங் ஸ்டேஷன் வேலை பெஞ்சும் இருக்கும். இது கல்லூரிகளில் ஓரிரு மாதங்களில் அமைக்கப்படும், மேலும் EV இரு சக்கர வாகனம் மற்றும் நான்கு சக்கர வாகனம் இரண்டும் தொடர்பாக மாணவர்களுக்கு கற்பிக்கப்படும். ஆய்வகங்கள் அமைக்கப்பட்டவுடன், மாணவர்களுக்கு நடைமுறைச் செயல்பாடுகளுடன் ஆஃப்லைன் வகுப்பறை திட்டங்கள் இரண்டும் இருக்கும். EV ஆய்வகத்தில் நேரடிப் பயிற்சி பெற்ற பிறகு, மாணவர்களுக்கு வேலை வாய்ப்புகள் மேம்படும். பயிற்சிக்குப் பிறகு மாநிலம் முழுவதும் EV துறையில் தங்கள் சொந்தத் தொழிலைத் தொடங்க மாணவர்கள் ஊக்குவிக்கப்படுவார்கள். தொழில்முனைவோர் மின்சார வாகன துறையில் சில புதுமைகளைச் செய்தால், தொடக்க நிறுவனங்களுக்கு கடன்களை வழங்குவது உட்பட மாநில அரசு முழு ஆதரவையும் வழங்கும்” என்றும் அந்த அதிகாரி கூறினார்.