TNPSC Group 4: டி.என்.பி.எஸ்.சி குரூப் 4 தேர்வு ரிசல்ட் இந்த மாதம் வெளியாகும்; முக்கிய தகவல்

டி.என்.பி.எஸ்.சி குரூப் 4 தேர்வு முடிவுகள் அக்டோபர் மாதத்தில் வெளியிடப்படும் என தேர்வாணையம் அறிவித்துள்ளது. தேர்வு முடிவுகள் வெளியிடப்பட்டதும், எப்படி தெரிந்துக் கொள்வது? என்பதை இப்போது பார்ப்போம்.

தமிழ்நாடு அரசுப் பணியாளர் தேர்வாணையம் அமைச்சு பணிகள், வாரியங்கள், வனப் பணி மற்றும் பொதுத் துறை நிறுவனங்களில் காலியாக உள்ள நான்காம் நிலை பணியிடங்களை நிரப்புவதற்கான குரூப் 4 தேர்வை ஜூலை 12 ஆம் தேதி நடத்தியது. இந்தத் தேர்வு மூலம் மொத்தம் 3935 பணியிடங்கள் நிரப்பப்பட உள்ளன. 

இந்த குரூப் 4 தேர்வு இரண்டு பகுதிகளாக நடைபெற்றது. முதல் பகுதி கட்டாய தமிழ் மொழித் தகுதித் தேர்வு. இதில் 100 கேள்விகள் இடம்பெற்றிருந்தன. இரண்டாம் பகுதியில் பொது அறிவில் 75 கேள்விகளும், திறனறி பகுதியில் 25 கேள்விகளும் இடம்பெற்றிருந்தன.

இந்த குரூப் 4 தேர்வு சற்று கடினமாக இருந்ததாக தேர்வர்களும் நிபுணர்களும் கருத்து தெரிவித்தனர். இதற்கிடையில், குரூப் 4 தேர்வுக்கான தற்காலிக விடைக்குறிப்புகள் தேர்வாணையத்தின் அதிகாரப்பூர்வ இணையதளத்தில் வெளியிடப்பட்டது. 

இந்தநிலையில் குரூப் 4 தேர்வு முடிவுகள் எப்போது வெளியாகும் என்ற அறிவிப்பை டி.என்.பி.எஸ்.சி வெளியிட்டுள்ளது. அதாவது தேர்வாணையத்தின் தேர்வு அட்டவணை பகுதியில் குரூப் 4 தேர்வுக்கான முடிவுகள் அக்டோபர் மாதத்தில் வெளியிடப்படும் என குறிப்பிடப்பட்டுள்ளது.

தேர்வு முடிவுகளை தெரிந்துக் கொள்வது எப்படி?

தேர்வு முடிவுகள் வெளியிடப்பட்டதும், தேர்வாணையத்தின் முதன்மை பக்கத்தில் முடிவுகளை தெரிந்துக் கொள்வதற்கான இணைப்பு வழங்கப்படும். அந்த இணைப்பை கிளிக் செய்தால், புதிய பக்கத்திற்குச் செல்லும்.

புதிய பக்கத்தில் உங்கள் பதிவெண், பிறந்த தேதி மற்றும் கேப்சா கேள்விக்கான பதில் ஆகியவற்றை உள்ளிட வேண்டும்.

இப்பொழுது உங்கள் தேர்வு முடிவுகள் திரையில் காண்பிக்கப்படும். அதில் உங்கள் பதிவெண் மற்றும் மதிப்பெண்கள் இடம்பெற்றிருக்கும். குறிப்பாக தமிழ் மற்றும் பொது அறிவில் பெற்ற மதிப்பெண்களுடன் உங்கள் மொத்த மதிப்பெண் இடம்பெற்றிருக்கும்.

மேலும், உங்களுக்கான ரேங்க் வரிசையும் இடம்பெற்றிருக்கும். இதில் பொது மற்றும் இடஒதுக்கீட்டு பிரிவு வாரியான தரவரிசை இடம்பெற்றிருக்கும். கூடுதலாக நீங்கள் தகுதி பெற்ற ஒவ்வொரு பதவிகளுக்கான தரவரிசையும் இடம்பெற்றிருக்கும்.