தேசிய மருத்துவ ஆணையத்தின் இளங்கலை மருத்துவக் கல்வி வாரியத்தின் 2023-ஆம் ஆண்டுக்கான விதிமுறைகள், மக்கள் தொகை அடிப்படையில் ஒரு மாநிலத்தில் உள்ள மருத்துவ இடங்களின் எண்ணிக்கையைக் கட்டுப்படுத்துவது, குறைந்தது இரண்டு ஆண்டுகளுக்கு ஒத்திவைக்கப்படலாம் என்பதால், மாநில சுகாதாரத் துறை புதிய மருத்துவக் கல்லூரிகளுக்கு அழுத்தம் கொடுக்கும்.
ஆகஸ்ட் 16 அன்று இந்திய அரசிதழில் வெளியிடப்பட்ட ‘புதிய மருத்துவ நிறுவனங்களின் கீழ் இளங்கலைப் படிப்புகளுக்கான வழிகாட்டுதல்கள், இரண்டு முக்கிய முடிவுகளைக் கொண்டிருந்தன.
முதலாவதாக, ஒரு கல்லூரியில் MBBS இடங்களின் எண்ணிக்கை 150 ஆகக் குறைப்பது. இரண்டாவதாக, அந்த மாநிலம் அல்லது யூனியன் பிரதேசத்தில் உள்ள 10 லட்சம் மக்களுக்கு 100 எம்பிபிஎஸ் இடங்கள் என்ற விகிதத்தைப் பின்பற்றுமாறு கல்லூரிகள் கேட்டுக் கொள்ளப்பட்டன.
அதாவது 8 கோடிக்கும் சற்று அதிகமான மக்கள்தொகை மற்றும் 70க்கும் மேற்பட்ட மருத்துவக் கல்லூரிகளில் 10,000-க்கும் அதிகமான இடங்களைக் கொண்ட தமிழ்நாடு, அதிக கல்லூரிகளுக்கு விண்ணப்பிக்க முடியாது.
மாநிலங்களின் எதிர்ப்பிற்குப் பிறகு, வழிகாட்டுதல்கள் 2025 முதல் செயல்படுத்தப்படும், என்று தேசிய மருத்துவ ஆணையம் கூறியது.
"புதிய விண்ணப்பங்களுக்கான திறப்பு மிகவும் குறுகியதாக இருந்தது. இது குறைந்தது இரண்டு ஆண்டுகளுக்கு ஒத்திவைக்கப்படும் என்று எங்களிடம் கூறப்பட்டதும், நாங்கள் புதிய விண்ணப்பங்களைத் தயாரிக்கத் தொடங்கினோம், ”என்று ஒரு மூத்த தமிழக மருத்துவக் கல்வி இயக்குனரக அதிகாரி டைம்ஸ் ஆஃப் இந்தியா நாளிதழுக்கு அளித்த பேட்டியில் கூறினார்.
2022 ஆம் ஆண்டில், தமிழ்நாடு 11 புதிய மருத்துவக் கல்லூரிகளைத் திறந்தது, ஆனால், கடந்த இரண்டு ஆண்டுகளாக, எந்தப் புதிய நிறுவனத்தையும் திறக்கவில்லை. ஏற்கனவே உள்ள அரசு மருத்துவக் கல்லூரிகளில் அதிக இடங்களை சேர்க்கவில்லை.
இப்போது, சுகாதாரத் துறை அதிகாரிகள் கூறுகையில், ஒவ்வொரு மாவட்டத்திலும் குறைந்தபட்சம் ஒரு புதிய மருத்துவக் கல்லூரியாவது இருக்க வேண்டும் என்ற கொள்கையில் தமிழகம் ஆர்வமாக உள்ளது. தென்காசி, மயிலாடுதுறை, திருப்பத்தூர், பெரம்பலூர், ராணிப்பேட்டை, காஞ்சிபுரம், கள்ளக்குறிச்சி ஆகிய இடங்களில் புதிய கல்லூரிகளுக்கு விரைவில் அரசு விண்ணப்பிக்கும்.
“ஏற்கனவே சில மாவட்டங்களில் நிலங்கள் அடையாளம் காணப்பட்டுள்ளன. தேசிய மருத்துவ ஆணையம் அனுமதிக்கு விண்ணப்பிப்பதற்கு முன், நிதித் துறையின் ஒப்புதலுக்கு விண்ணப்பிப்போம்,” என்று மூத்த சுகாதாரத் துறை அதிகாரி ஒருவர் தெரிவித்தார். ஓரிரு ஆண்டுகளில் இந்தக் கல்லூரிகள் தொடங்குவதற்கான விண்ணப்பங்கள் அனுப்பப்படும்.
இந்திய மருத்துவ சங்கம் மற்றும் தமிழ்நாடு அரசு மருத்துவர்கள் சங்கம் உள்ளிட்ட மூத்த மருத்துவர்கள் மற்றும் மருத்துவர்களின் அமைப்பு, தமிழ்நாடு ஏற்கனவே மருத்துவர்-நோயாளி விகிதத்தை அடைந்துவிட்டதாக தேசிய மருத்துவ ஆணையத்தை ஆதரித்த நிலையில், சுகாதார செயலாளர் ககன்தீப் சிங் பேடி முன்பு டைம்ஸ் ஆஃப் இந்தியா பத்திரிக்கைக்கு அளித்த பேட்டியில், மருத்துவர்கள் மற்றும் மூன்றாம் நிலை பராமரிப்பு வசதிகளை சமமாக விநியோகிக்க ஒவ்வொரு மாவட்டத்திலும் ஒரு மருத்துவக் கல்லூரியை நிறுவுவது அரசின் கொள்கை என்று கூறியிருந்தார்.
“மேலும், நாம் ஏன் தமிழ்நாடு தரவுகளை மட்டும் பார்க்க வேண்டும்? நாட்டுக்கு அதிகமான மருத்துவர்கள் தேவை. இந்தியாவின் மற்ற பகுதிகளுக்கு சென்னை ஒரு மருத்துவ மையமாக சிறப்பாக செயல்பட்டால், இங்கிருந்து வரும் மருத்துவர்கள் மற்ற மாநிலங்களிலும் பணியாற்ற முடியும். எங்களிடம் வசதிகள் மற்றும் தேவைகள் இருக்கும்போது புதிய வசதிகளைத் தொடங்க அனுமதிக்க வேண்டும், ”என்று அவர் கூறினார்.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“