/indian-express-tamil/media/agency_attachments/33Ho9XHwZawzDekwDLnu.png)
Follow Us/indian-express-tamil/media/media_files/2025/10/11/university-of-western-australia-2025-10-11-07-42-53.jpg)
“காலப்போக்கில், இந்தியா சுற்றியுள்ள பகுதிகளைச் சேர்ந்த மாணவர்களுக்கு ஒரு ‘சர்வதேச இலக்காக’ மாறக்கூடும்” என்றும் லிட்டில்ஃபேர் கூறினார்.
UWA India education plan: வெஸ்டர்ன் ஆஸ்திரேலியப் பல்கலைக்கழகம் (University of Western Australia - UWA) முதல் ஆண்டில் சில நூறு மாணவர்களுடன் தொடங்கி, ஒரு பத்தாண்டு காலத்திற்குள் 10,000-க்கும் மேற்பட்ட மாணவர்களாக வளர்ச்சி அடைய இலக்கு வைத்துள்ளது என்று கல்வி மற்றும் மாணவர் அனுபவத்திற்கான துணைவேந்தர் கய் லிட்டில்ஃபேர் தெரிவித்தார்.
வெஸ்டர்ன் ஆஸ்திரேலியப் பல்கலைக்கழகம் (யு.டபிள்யூ.ஏ - UWA) இந்தியாவில் இரண்டு வளாகங்களை நிறுவத் திட்டமிட்டுள்ளது. அதில் ஒன்று சென்னையில் ஸ்டெம் (அறிவியல், தொழில்நுட்பம், பொறியியல் மற்றும் கணிதம் - STEM) பாடங்களில் கவனம் செலுத்தும். மற்றொன்று மும்பையில் வணிகம் தொடர்பான படிப்புகளில் கவனம் செலுத்தும் என்று கல்வி மற்றும் மாணவர் அனுபவத்திற்கான துணைவேந்தர் கய் லிட்டில்ஃபேர் தெரிவித்துள்ளார்.
பெரும்பாலான வெளிநாட்டுப் பல்கலைக்கழகங்கள் இந்தியாவில் ஒரே ஒரு வளாகத்தை மட்டுமே திறக்கும் நிலையில், வெஸ்டர்ன் ஆஸ்திரேலியப் பல்கலைக்கழகம் 2 வளாகங்களை நிறுவ முடிவு செய்தது ஏன் என்று அவரிடம் கேட்கப்பட்டது. அதற்குப் பதிலளித்த லிட்டில்ஃபேர், “இந்தியாவின் வெவ்வேறு நகரங்களுக்கு வெவ்வேறு படிப்புகள் தேவை என்பதை நாங்கள் ஒரு பல்கலைக்கழகமாக உணர்ந்துள்ளோம்” என்று கூறினார்.
“மும்பை, ஒரு பெரிய பெருநகரம், இது இந்தியாவின் நிதி மையமாக உள்ளது. எனவே, அங்கு வணிகம், தொழில்முனைவோர் மற்றும் தொழில் நிறுவனங்கள் மீது அதிக கவனம் செலுத்தப்படும். தெற்கில், சென்னையில், ஸ்டெம் (STEM), பொறியியல் மற்றும் தொழில்நுட்பம், கணினி அறிவியல் ஆகியவற்றில் அதிகக் கவனம் செலுத்தப்படும்” என்று அவர் கூறினார்.
யு.ஜி.சி ஒப்புதல் மற்றும் இலக்குகள்
க்யூ.எஸ் உலகப் பல்கலைக்கழகத் தரவரிசையில் 77-வது இடத்தில் உள்ள வெஸ்டர்ன் ஆஸ்திரேலியப் பல்கலைக்கழகம், இந்தியாவில் இரண்டு வளாகங்களை அமைக்க, பல்கலைக்கழக மானியக் குழுவிடம் (யு.ஜி.சி) இருந்து ஜூன் மாதம் 'தீர்மானக் கடிதத்தைப்' பெற்றுள்ளது. 2026-ம் ஆண்டு ஆகஸ்ட் மாதத்திற்குள் இந்த வளாகங்களைச் செயல்பாட்டிற்குக் கொண்டுவர பல்கலைக்கழகம் இலக்கு நிர்ணயித்துள்ளது.
லிட்டில்ஃபேர், ஆஸ்திரேலியாவின் சிறந்த ஆராய்ச்சிப் பல்கலைக்கழகங்களைக் கொண்ட எட்டு குழுமம் (Group of Eight) அமைப்பின் பிரதிநிதிகள் குழுவில் ஒரு பகுதியாக இருந்தார். இவரது திட்டத்தில் டெல்லி மற்றும் மும்பையில் அரசு அதிகாரிகளைச் சந்திப்பது, வளாகங்களுக்கான இடங்களைத் தேடுவது, அத்துடன் மேற்கு ஆஸ்திரேலியாவின் தலைநகரான பெர்த் மற்றும் இந்தியாவிற்கு இடையேயான நேரடி விமானங்களுக்காகப் பங்குதாரர்களைச் சந்திப்பது ஆகியவை அடங்கும்.
விரிவான கல்வித் திட்டம்
இந்த வளாகங்களுக்கான வெஸ்டர்ன் ஆஸ்திரேலியப் பல்கலைக்கழகத்தின் திட்டங்களை விளக்கிய லிட்டில்ஃபேர், “வெஸ்டர்ன் ஆஸ்திரேலியப் பல்கலைக்கழகம் எதை வழங்க முடியும், அதில் எந்தெந்த இந்தியப் பகுதிகள் அதிகம் பயனடைய முடியும் என்பதில் கவனம் செலுத்துவது, நாங்கள் சாதிக்க முயற்சிக்கும் முக்கியமான பகுதியாகும்” என்று கூறினார்.
பல்கலைக்கழகம் முதல் ஆண்டில் சில நூறு மாணவர்களுடன் 'சிறிய அளவில்' தொடங்கத் திட்டமிட்டுள்ளது. இது 7 முதல் 10 ஆண்டுகளுக்குள் "பல ஆயிரம் மாணவர்களாகவும்", காலப்போக்கில் 10,000-க்கும் மேற்பட்ட மாணவர்களாகவும் உயரும் என்று லிட்டில்ஃபேர் கூறினார்.
தற்போது ஸ்டெம் மற்றும் வணிகப் படிப்புகளில் கவனம் செலுத்தினாலும், காலப்போக்கில் மனிதநேயம், கலைகள், சுகாதாரம் மற்றும் மருத்துவம் தொடர்பான படிப்புகளையும் சேர்க்கத் திட்டமிட்டுள்ளது. இளங்கலை மற்றும் முதுகலை என இரண்டு நிலைகளிலும் படிப்புகள் வழங்கப்படும்.
ஆராய்ச்சியின் வணிகமயமாக்கலில் இந்தியா சிறந்தது
இதுவே பல்கலைக்கழகத்தின் முதல் வெளிநாட்டு வளாகமாகும். மேலும், "உயர்கல்வியைத் தேடும் இளைஞர்கள் தொடர்ச்சியாக வளர்ந்து வருவதால்" இந்தியா வாய்ப்புகளை வழங்குவதாக லிட்டில்ஃபேர் கூறினார்.
ஆராய்ச்சியின் விளைவுகளைப் பொறுத்தவரை ஆஸ்திரேலியா சிறப்பாகச் செயல்பட்டாலும், ஆராய்ச்சியை வணிகமயமாக்குவதிலும் (commercialisation) மற்றும் அதைத் தயாரிப்புகள் மற்றும் சேவைகளாக மாற்றுவதிலும் அது சிறப்பாகச் செயல்படவில்லை என்று அவர் கூறினார்.
“இதற்கு நேர்மாறாக, அறிவுசார் சொத்துரிமை (intellectual property) மேம்பாட்டிலும், கண்டுபிடிப்புச் சூழல் அமைப்பின் மூலம் அறிவுசார் சொத்தை அடுத்த கட்டத்திற்குக் கொண்டு செல்வதிலும் இந்தியா உண்மையிலேயே சிறந்தது. எனவே, மாணவர்களுக்கு மட்டுமல்லாமல், மேற்கு ஆஸ்திரேலியாவின் நன்மைக்காகவும், இங்குள்ள சமூகங்களின் நன்மைக்காகவும் எங்கள் ஆராய்ச்சித் திட்டத்தை வழிநடத்தும் விதத்திலும் நாங்கள் ஈடுபட முடியும் என்று நம்புகிறோம்” என்று அவர் கூறினார்.
காலப்போக்கில், இந்தியா "சுற்றுப்புறப் பகுதிகளைச் சேர்ந்த மாணவர்களுக்கு ஒரு சர்வதேச இலக்காக" மாறக்கூடும் என்றும் அவர் நம்பிக்கை தெரிவித்தார்.
விசா கட்டுப்பாடுகளைச் சமாளித்தல்
பல நாடுகளில் விசா தொடர்பான கட்டுப்பாடுகள் உள்ள நிலையில், வெளிநாட்டுப் பல்கலைக்கழகங்கள் இந்திய மாணவர்களுக்காக வளாகங்களை நிறுவ முற்படுகின்றன. இது குறித்துப் பேசிய லிட்டில்ஃபேர், ஆர்வமுள்ள மாணவர்களின் மீது கவனம் செலுத்துவது ஒரு சிறந்த அணுகுமுறையாக இருக்கும் என்றார். மாணவர்களின் இருப்பிடத்திலேயே அவர்களுக்குக் கல்வியை வழங்குவது வரை இந்த ஆதரவு நீட்டிக்கப்படலாம் என்று அவர் கூறினார்.
“பிரபலமான மற்றும் தரமான பல்கலைக்கழகங்களுக்குச் சரியான அணுகுமுறை என்னவென்றால், உயர்தரக் கல்வியைப் பெறுவதற்கு ஆர்வமுள்ள மாணவர்களை நாம் எவ்வாறு ஆதரிக்கலாம் என்று கருதுவதே ஆகும். அதில் ஆஸ்திரேலியாவுக்குப் பயணம் செய்து படிக்க வாய்ப்பு கிடைப்பதும் அடங்கும். அதே சமயம், காலப்போக்கில், மாணவர்கள் இருக்கும் இடத்திலேயே அவர்களுக்குக் கல்வியை வழங்குவதும் இதில் அடங்கும் என்பதையும் நாங்கள் உணர்ந்துள்ளோம்” என்று அவர் கூறினார்.
மாணவர் விசா தொடர்பான கட்டுப்பாடுகள் ஆஸ்திரேலியப் பல்கலைக்கழகங்களில் ஏற்படுத்தும் தாக்கம் பற்றிக் கேட்டபோது, “ஆஸ்திரேலியா நீண்ட காலமாக சர்வதேச மாணவர்களுக்கும், குறிப்பாக இந்திய மாணவர்களுக்கும் மிகவும் பிரபலமான இடமாக இருந்து வருகிறது. உலகம் முழுவதும் உள்ள அரசாங்கக் கொள்கைகளில் ஏற்படும் மாற்றங்கள் நேர்மறையான விளைவுகளை ஏற்படுத்தும், அதே சமயம் மாணவர்களுக்கு அவ்வளவு நேர்மறையாக இல்லாத குறுகிய கால விளைவுகளையும் ஏற்படுத்தும்” என்று லிட்டில்ஃபேர் கூறினார்.
“ஆனால் எங்களுடன் வந்து படிக்க விரும்பும் அனைத்து சர்வதேச மாணவர்களுக்கும் சிறந்த கல்வியை வழங்குவதில் நாங்கள் உறுதியாக இருக்கிறோம். இங்கு இந்தியாவில் வளாகங்களைத் திறக்க நாங்கள் மிகவும் ஆவலுடன் காத்திருக்கிறோம். இது, ஆஸ்திரேலியாவுக்குப் பயணிக்கத் தேவையில்லாமல், UWA-இன் மிக உயர்ந்த தரத்திலான கல்வியைப் பெறுவதற்கான வாய்ப்பை மற்ற மாணவர்களுக்கு வழங்கும்” என்று அவர் தெரிவித்தார்.
இந்தியாவில் வளாகங்களைத் திறப்பதன் மூலம், “எங்கள் வளாகத்திற்குப் பல்வேறுபட்ட மாணவர்களை ஈர்ப்பதில் நாங்கள் மிகவும் ஆர்வமாக உள்ளோம், மேலும் அந்தத் தேவைகளுக்கு இடமளிக்கத் தேவைப்படும்போது அரசாங்கக் கொள்கைகளில் ஏற்படும் மாற்றங்களுடன் பணியாற்றவும் நாங்கள் தயாராக இருக்கிறோம்.”
இந்திய மாணவர்கள் மிகவும் விரும்பப்படும் இடம் ஆஸ்திரேலியா
வெஸ்டர்ன் ஆஸ்திரேலியப் பல்கலைக்கழகத்தில் இந்திய மாணவர்கள் சீன மாணவர்களுக்குப் பிறகு 2-வது பெரிய சர்வதேச மாணவர் குழுவாக உள்ளனர். 2024-25-ம் ஆண்டில், டிசம்பர் வரை, சீனாவுக்கு அடுத்தபடியாக இந்தியாவுக்கு ஆஸ்திரேலியா அதிக எண்ணிக்கையிலான மாணவர் விசாக்களை வழங்கியுள்ளது என்று அந்நாட்டின் உள்விவகாரத் துறைத் தரவுகள் காட்டுகின்றன.
இந்திய மாணவர்களுக்கான முதல் ஐந்து இலக்கு நாடுகளில் ஆஸ்திரேலியாவும் ஒன்றாகும். சமீபத்திய ஆண்டுகளில், ஆஸ்திரேலியா உட்படப் பல நாடுகள் மாணவர் விசாக்களுக்கான தேவைகளை குறைத்துள்ளன அல்லது தங்கள் நாடுகளில் உள்ள சர்வதேச மாணவர்களின் எண்ணிக்கையைக் கட்டுப்படுத்தி உள்ளன.
ஆஸ்திரேலியா கடந்த ஆண்டு சர்வதேச மாணவர்களுக்கான ஆங்கில மொழித் தேவைகளை அதிகரித்தது. இது கடந்த ஆண்டும், இந்த ஆண்டும் மாணவர் விசா செயலாக்கக் கட்டணத்தை உயர்த்தியுள்ளது. தற்போது இதன் தொகை 2,000 ஆஸ்திரேலிய டாலராக உள்ளது. இது இரண்டு உயர்வுகளுக்கு முன்பு 710 ஆஸ்திரேலிய டாலராக ஆக இருந்தது.
கோவிட்-19 க்குப் பிறகு அதிகரித்த வெளிநாட்டுக் குடியேற்றத்தை நிர்வகிக்க வேண்டியதன் அவசியத்தைச் சுட்டிக்காட்டி, 2025 ஆம் ஆண்டில் 2,70,000 மற்றும் 2026-ம் ஆண்டில் 2,95,000 என, புதிய சர்வதேச மாணவர்களின் எண்ணிக்கையிலும் நாடொரு வரம்பை விதித்துள்ளது. கல்வி நிறுவனங்களுக்குக் குறிப்பிட்ட சர்வதேச மாணவர் ஒதுக்கீடுகள் உள்ளன, மேலும் இந்த ஒதுக்கீட்டில் 80% பேருக்கு மாணவர் விசாக்கள் முன்னுரிமை மட்டத்தில் செயல்படுத்தப்படுகின்றன, அதன் பிறகு செயலாக்கம் வேகம் குறைகிறது.
Stay updated with the latest news headlines and all the latest Lifestyle news. Download Indian Express Tamil App - Android or iOS.