'நாங்கள் சரியாகத்தான் செய்தோம்'... லண்டன் பல்கலை.யில் விசா ஒதுக்கீடு குறைவால் பாதிக்கப்பட்ட சர்வதேச மாணவர்கள் வேதனை

யுனிவர்சிட்டி காலேஜ் லண்டன் (UCL) பல்கலைக்கழகத்தில் இந்த கல்வி ஆண்டுக்கான சர்வதேச மாணவர்களுக்கான விசா ஒதுக்கீட்டு இடங்கள் (Visa Slots) காலியாகிவிட்டதால், கல்வி ஆண்டின் தொடக்கத்திலேயே பெரும் குழப்பம் நிலவுகிறது. அனைத்துத் தகுதிகளையும் பூர்த்தி செய்தும், குறிப்பாகச் சீனாவை சேர்ந்த நூற்றுக்கணக்கான மாணவர்கள் இப்போது தங்கள் படிப்பைத் தொடங்க முடியாமல் தவிக்கின்றனர். இந்நிலைமை நிதிச் சிக்கல்கள், விரக்தி மற்றும் குழப்பத்திற்கு வழிவகுத்துள்ளது. சில மாணவர்கள் தங்கள் சேர்க்கையை 2026 ஆம் ஆண்டு வரை ஒத்திவைக்க நேரிடலாம் என்றும் அறிவுறுத்தப்பட்டுள்ளனர்.

'தி கார்டியன்' அறிக்கையின்படி, சுமார் 200 சீன மாணவர்கள் உட்பட பலர் இந்தச் சிக்கலால் பாதிக்கப்பட்டுள்ளனர். வரும் கல்வி ஆண்டுக்கான விசா ஒதுக்கீட்டை யுனிவர்சிட்டி காலேஜ் லண்டன் தாண்டிவிட்டதால், இங்கிலாந்தில் படிப்பதற்கு அவசியமான முக்கிய ஆவணமாகிய 'படிப்புக்கான ஏற்பு உறுதிப்படுத்தல்' (CAS - Confirmation of Acceptance for Studies) ஆவணத்தை வழங்க முடியவில்லை என்று பல்கலைக்கழகம் மாணவர்களுக்குத் தெரிவித்துள்ளது. ஆரம்பத்தில், சிலர் தங்கள் சேர்க்கையை 2026 வரை ஒத்திவைக்க நேரிடலாம் என்று கூறப்பட்டதால், மாணவர்கள் மத்தியில் பெரும் குழப்பமும், விரக்தியும் ஏற்பட்டது.

'எதிர்பாராத தேவையின் எழுச்சி' என்று யுனிவர்சிட்டி காலேஜ் லண்டன் குற்றம் சாட்டுகிறது. சர்வதேச விண்ணப்பங்களில் எதிர்பாராத எழுச்சி ஏற்பட்டதே இந்தச் சிக்கலுக்குக் காரணம் என்று பல்கலைக்கழகம் கூறியுள்ளது. 'தி கார்டியன்' மேற்கோள் காட்டிய அறிக்கையில் UCL செய்தித் தொடர்பாளர், "நாங்கள் எதிர்பார்த்ததை விட அதிக விண்ணப்பங்களையும், சேர்க்கை ஏற்புகளையும் அனுபவித்துள்ளோம். இதன் விளைவாக, உள்துறை அமைச்சகம் (Home Office) எங்களுக்கு ஒதுக்கிய CAS எண்ணிக்கையை நாங்கள் மீறிவிட்டோம்," என்று விளக்கினார்.

கடந்த ஆண்டுகளின் தரவுகள் மற்றும் எதிர்பார்க்கப்படும் போக்குகளைக் கருத்தில் கொண்டே தாங்கள் திட்டமிட்டதாக UCL கூறியது. இருப்பினும், இந்த ஆண்டு சர்வதேச மாணவர்களிடமிருந்து ஏற்பட்ட எதிர்பாராத தேவையின் எழுச்சி, அதன் கணிப்புகளைத் தவறாக ஆக்கியுள்ளது.

இந்த செய்தியை ஆங்கிலத்தில் படிக்க

நிர்வாக ரீதியிலான இந்த தவறால், பாதிக்கப்பட்ட பல மாணவர்களுக்குக் கணிசமான நிதி மற்றும் உணர்ச்சி ரீதியான இழப்புகள் ஏற்பட்டுள்ளன. இந்த மாணவர்கள் ஏற்கெனவே விமான பயண ஏற்பாடுகள், விண்ணப்பக் கட்டணம் மற்றும் லண்டனில் தங்குவதற்கான செலவு என ஆயிரக்கணக்கான பவுண்டுகளைச் செலவழித்துள்ளதாகவும், அந்தச் செலவுகள் இப்போது கேள்விக்குறியாகியுள்ளதாகவும் அறிக்கை தெரிவிக்கிறது.

கல்விப் பருவம் தொடங்குவதற்கு வெறும் இரண்டு வாரங்களுக்கு முன்புதான் CAS ஆவணங்களை வழங்க முடியாது என்று UCL மின்னஞ்சல் அனுப்பியதாகச் சில மாணவர்கள் கூறியுள்ளனர். ஏற்கெனவே இங்கிலாந்தில் இருக்கும் ஒரு மாணவி, செல்லுபடியாகும் மாணவர் விசா இல்லாமல், தான் நாடு கடத்தப்படும் அபாயம் இருப்பதாகவும் கூறினார். விசா சிக்கல் தீர்க்கப்படும் வரை தொலைதூரக் கற்றல் (Remote Learning) விருப்பங்கள் ஆராயப்படுவதாகவும் UCL ஊழியர்கள் ஒரு தற்காலிகத் தீர்வை விரைவில் வழங்கக்கூடும் என்றும் மற்றொரு மாணவர் குறிப்பிட்டார்.

இந்த நிலைமை பல மாணவர்களை ஏமாற்றமடையச் செய்து, உதவியற்ற நிலையில் ஆழ்த்தியுள்ளது. பாதிக்கப்பட்ட ஒரு மாணவர், "நானும் எண்ணற்ற பிற மாணவர்களும் கடினமான விண்ணப்பச் செயல்முறையை மிகத் துல்லியமாகவும் கவனமாகவும் முடித்தோம். நாங்கள் ஒவ்வொரு காலக்கெடுவையும் பூர்த்தி செய்தோம், அனைத்து ஆவணங்களையும் சமர்ப்பித்தோம். இருப்பினும், கல்விப் பருவம் தொடங்குவதற்கு முன்பே எங்கள் சேர்க்கை உறுதி செய்யப்பட்டது."

"எந்தவொரு பல்கலைக்கழகமும் வரவேற்பதில் பெருமை கொள்ளும் சிறந்த விண்ணப்பதாரர்கள் நாங்கள். ஆனால், நாங்க எங்கள் படிப்புக்குத் தயாராவதற்குப் பதிலாக, எங்களால் தடுக்கவோ அல்லது கணிக்கவோ முடியாத ஒரு நிறுவனத் தோல்விக்காக இப்போது விலையை செலுத்திக் கொண்டிருக்கிறோம்," என்று அவர் வேதனையுடன் தெரிவித்தார்.

இங்கிலாந்து உள்துறை அமைச்சகம் UCL இன் நிலை குறித்து கருத்துத் தெரிவிக்க மறுத்துவிட்டது. தற்போதுள்ள கொள்கையின்படி, ஒவ்வொரு கல்வி ஆண்டிலும் தாங்கள் சேர்க்க எதிர்பார்க்கும் சர்வதேச மாணவர்களின் எண்ணிக்கையின் அடிப்படையில் பல்கலைக்கழகங்கள் ஆண்டுதோறும் CAS ஒதுக்கீட்டிற்காக விண்ணப்பிக்க வேண்டும்.

UCL இன் மொத்த மாணவர் எண்ணிக்கையான 52,000 பேரில், பாதிக்கும் மேற்பட்டவர்கள் சர்வதேச மாணவர்கள்தான். இதில் சுமார் 14,000 பேர் சீனாவைச் சேர்ந்தவர்கள் என்று அறிக்கை குறிப்பிடுகிறது. UCL-இன் இந்த நிலை, சர்வதேச மாணவர்களை வரவேற்பதற்கும், அதே சமயம் குடியேற்றக் கட்டுப்பாடுகளை நிர்வகிப்பதற்கும் இடையே இங்கிலாந்தின் உயர் கல்வி நிறுவனங்கள் சந்திக்கும் வளர்ந்து வரும் சிக்கலை உறுதிப்படுத்துகிறது. சர்வதேச மாணவர் சேர்க்கை ஒரு முக்கிய வருவாய் ஆதாரமாக இருப்பதால், பல்கலைக்கழகங்கள் தங்கள் விசா ஒதுக்கீட்டைச் சரியாக நிர்வகிக்க துல்லியமான கணிப்புகளை நம்பியிருக்கின்றன.