ஒரு நாள்லாம் என்னால நடிக்க முடியாது; விஜய் படத்தை மறுத்த டெல்லி கணேஷ்: ஆனா இந்த காமெடி செம்ம ஹிட்!

கடந்த 1976-ஆம் ஆண்டு கே.பாலச்சந்தர் இயக்கத்தில் வெளியான ’பட்டினப்பிரவேசம்’ திரைப்படத்தின் மூலம் சினிமா உலகில் அறிமுகமானவர் டெல்லி கணேஷ். தொடர்ந்து, கமல், ரஜினி, விஜய்காந்த், விஜய், சூர்யா  உள்ளிட்ட பல முன்னணி நடிகர்களுடன் இணைந்து நடித்துள்ளார்.

தமிழ், தெலுங்கு, மலையாளம், இந்தி மொழி என  400-க்கும் மேற்பட்ட திரைப்படங்களில் நடித்துள்ள நடிகர் டெல்லி கணேஷ் நகைச்சுவை உட்பட எல்லா கதாபாத்திரங்களிலும் தனது அட்டகாசமான நடிப்பை வெளிப்படுத்தினார்.  தமிழ்நாடு அரசின் கலைமாமணி விருது பெற்றுள்ள டெல்லி கணேஷ் ஒரு காட்சி என்றாலும் அதை நேர்த்தியாக நடித்து ரசிகர்களின் கவனத்தை ஈர்க்கக் கூடிய வல்லமை படைத்தவர்.

நடிப்பு மட்டுமின்றி, சிறந்த டப்பிங் கலைஞராகவும் திரைத்துறையில் பங்களித்தார். 80 மற்றும் 90 காலக்கட்டத்தில் தங்கள் திரைப்படங்கள் தமிழில் மொழிமாற்றம் செய்யப்பட்டபோது மோகன்லால் மற்றும் சிரஞ்சீவி ஆகியோர் நடிகர் டெல்லி கணேஷ் தங்களுக்கு பின்னணி குரல் கொடுக்க வேண்டும் என விரும்பினர்.

இவர் விஜய் நடிப்பில் வெளியான ‘தமிழன்’ திரைப்படத்தில் ஒரே ஒரு காட்சிக்கு மட்டுமே வந்திருப்பார். அந்த காட்சி அன்று முதல் இன்று வரை பேசும் காட்சியாக அமைந்துள்ளது. இந்நிலையில், ‘தமிழன்’ திரைப்படத்தில் அந்த காட்சி தனக்கு எப்படி கிடைத்தது என்பது குறித்து டெல்லி கணேஷ் நேர்காணல் ஒன்றி தெரிவித்துள்ளார்.

அவர் பேசியதாவது, “விஜய் நடித்த ‘தமிழன்’ திரைப்படத்தில் எனக்கு சிகிரெட் பிடிப்பவர்களை கண்டாலே பிடிக்காது. அதனால் முதலில் சிகிரெட்டை நிறுத்து என்று நான் சொல்லும் காட்சி இருக்கும். அதற்கு முதலில் வேறு ஒருவரை போட்டு படமாக்கி இருக்கிறார் இயக்குநர். ஆனால், காமெடி ஒர்க்கவுட் ஆகவில்லை விஜய்க்கும் பிடிக்கவில்லை. அப்போது விஜய், டெல்லி கணேஷிடம் கேட்டுப்பாருங்கள் என்று சொல்லியுள்ளார். 

என்னை கூப்பிட்டார்கள் நான் எத்தனை நாள் வேலை என்றேன் ஒருநாள் வேலை என்றார்கள். ஒரு நாளை வேலை என்றால் வேண்டாம் என்று சொல்லிவிட்டேன்.  அப்போது என் பக்கத்தில் வைரம் கிருஷ்ண மூர்த்தி என்ற பழைய ஆர்ட்டிஸ் ஒருவர் இருந்தார். அவர் சொன்னார் ஒரு நாள் வேலை அதனால் வேண்டாம் என்றாயே அப்படி சொல்லக் கூடாது. அந்த கதாபாத்திரல் நீ நடிக்க வேண்டும் என்று கதாசிரியர், இயக்குநர் அல்லது ஹீரோ தான் சொல்லியிருப்பார் என்றார். அதன் பிறகே அந்த படத்தில் நான் நடித்தேன்” என்றார்.

நடிகர் டெல்லி கணேஷ் வயது மூப்பு காரணமாக கடந்த ஆண்டு  இயற்கை ஏய்தினார் என்பது குறிப்பிடத்தக்கது.