'பிளடி பெக்கர்' படம் வெற்றி பெறாதது ஏமாற்றம் தான்; ஆனா திரும்பவும் இதே மாதிரி கதையில் நடிப்பேன்: கவின் உறுதி

சீரியல் மூலம சின்னத்திரையில் அறிமுகமாகி, ஒரு சில திரைப்படங்களில் சிறிய கேரக்டரில் நடித்து தற்போது வளர்ந்து வரும் இளம் ஹீரோவாக உருவெடுத்துள்ள கவின், தனது பிளடி பெக்கர் திரைப்படம் எதிர்பார்த்த வெற்றியை பெறாதது ஏமாற்றம் அளிப்பதாக கூறியுள்ளார்.

இந்த செய்தியை ஆங்கிலத்தில் படிக்க இங்கே க்ளிக் செய்யவும்

தமிழில் லிஃப்ட் படத்தின் மூலம் அறிமுகமாகி அடுது்து டாடா என்ற வெற்றிப்பபடத்தை கொடுத்த கவின், ரசிகர்கள் மத்தியில் நல்ல வரவேற்பை பெற்று வரும் நிலையில், அடுத்து வெளியான அவரின் ஸ்டார் மற்றும் பிளடி பெக்கர் ஆகிய இரு திரைப்படங்களும் எதிர்பார்த்த வெற்றியைப் பெறவில்லை. அப்படங்களின் தோல்வி குறித்தும், அதிலிருந்து தான் கற்றுக்கொண்ட பாடங்கள் குறித்தும் கவின் சமீபத்தில் ஒரு பேட்டியில் மனம் திறந்து பேசியுள்ளார்.

ஸ்டார் மற்றும் பிளடி பெக்கர் படங்களின் வரவேற்பு குறித்து கேட்கப்பட்டபோது, 'பிளடி பெக்கர்' படத்திற்கு கிடைத்த வரவேற்பு மிகவும் ஏமாற்றமளித்தது என்று கவின் வெளிப்படையாக ஒப்புக்கொண்டார். சுதீர் சீனிவாசன் உடனான நேர்காணலில் அவர் கூறுகையில், 'ஸ்டார்' படத்திற்கு ஓரளவு விமர்சனங்கள் கிடைத்தாலும், அது தயாரிப்பாளருக்கு நல்ல லாபத்தைத் தந்தது. அதனால் நான் மகிழ்ச்சியாக இருக்கிறேன். ஆனால், 'பிளடி பெக்கர்' படத்தின் மீது எனக்கு அதிக எதிர்பார்ப்புகள் இருந்தன.

அந்தப் படத்திற்கு கிடைத்த மோசமான வரவேற்பு மிகவும் ஏமாற்றமளித்தது. என்னைத் தவிர, படத்தில் உழைத்த பல தொழில்நுட்பக் கலைஞர்களுக்கு அந்தப் படம் நல்ல வாய்ப்புகளைப் பெற்றுத் தரும் என்று நினைத்தேன். ஆனால் அது நடக்கவில்லை. 'பிளடி பெக்கர்' படத்தின் தோல்விக்கு பார்வையாளர்களின் ரசனையை குறை சொல்ல முடியாது. அதே சமயம் 'பிளடி பெக்கர்' படம் ஓடிடி-யில் வெளியான பிறகு கிடைத்த நல்ல விமர்சனங்கள், சரியான முடிவை எடுத்ததாக தனக்கு நம்பிக்கை அளித்ததாக கவின் கூறினார். 

ஒரு படத்தை திரையரங்கிற்காகவும், மற்றொரு படத்தை ஓடிடி-க்காவும் மட்டும் எடுக்க முடியுமா என எனக்குத் தெரியவில்லை. ஒரு நல்ல கதையைக் கேட்கும்போது, அது எப்படி ரசிகர்களைச் சென்றடையும் என்பதைப் பற்றி மட்டுமே சிந்திப்போம். ஓடிடி-யில் வெளியான பிறகு படத்திற்கு நல்ல விமர்சனங்கள் வந்தபோது, நாம் சரியான பாதையில் செல்கிறோம் என்பதை அது உணர்த்தியது.

பிளடி பெக்கர் படத்தில் நாம் செய்த தவறுகளை எல்லாம் சரி செய்து, படத்தின் இயக்குநர் சிவபாலன் முத்துகுமாருடன் இன்னும் சில வருடங்கள் கழித்து ஒரு புதிய படத்தில் இணைய விரும்புவதாக கூறிய கவின், 'பிளடி பெக்கர்' பெரிய வெற்றி பெறவில்லை என்றாலும், வித்தியாசமான கதையம்சம் கொண்ட படங்களில் நடிப்பதை நான் நிறுத்த மாட்டேன்” என்று அவர் உறுதியாகக் கூறினார். கவின் நடித்துள்ள கிஸ் திரைபபடம் வரும் செப்டம்பர் 19-ஆம் தேதி வெளியாக உள்ளது.