ஜெயிலர் 2 ரிலீஸ் எப்போது? ரஜினிகாந்த் கொடுத்த அப்டேட்

தமிழ் திரையுலகில் குறுகிய காலத்தில் முன்னணி இயக்குநர் என்ற இடத்தை பிடித்தவர் நெல்சன். இவர் ஆக்‌ஷன் மற்றும் டார்க் காமெடி படங்கள் இயக்குவதில் சிறந்து விளங்குகிறார். கடந்த 2018-ஆம் ஆண்டு நடிகை நயன்தாரா நடிப்பில் வெளியான ‘கோலமாவு கோகிலா’ என்ற திரைப்படத்தின் மூலம் நெல்சன் திரைத்துறையில் இயக்குநராக அறிமுகமானார்.

தொடந்து, சிவகார்த்திகேயன் நடிப்பில் ‘டாக்டர்’, விஜய் நடிப்பில் ‘பீஸ்ட்’ போன்ற படங்களை இயக்கி ரசிகர்கள் மத்தியில் தனக்கான இடத்தை பிடித்துக் கொண்டார். கடந்த 2023-ஆம் ஆண்டு நடிகர் ரஜினிகாந்த் நடிப்பில் ‘ஜெயிலர்’ திரைப்படத்தை இயக்கினார். இப்படத்தில் ரம்யா கிருஷ்ணன், சிவராஜ்குமார், விநாயக், வசந்த் ரவி, மிர்னா மேனன், யோகிபாபு உட்பட பலர் முக்கிய கதாபாத்திரத்தில் நடித்திருந்தனர்.

இந்த படத்திற்கு அனிருத் இசையமைத்திருந்தார். இப்படம் திரையரங்குகளில் வெளியாகி மிகப்பெரும் வரவேற்பை பெற்று ரூ.500 கோடிக்கு மேல் வசூலை குவித்தது. ‘ஜெயிலர்’ திரைப்படத்தில் ரஜினிகாந்த் - யோகிபாபு காமெடி செமயாக ஒர்க் அவுட் ஆனது. இதைத்தொடர்ந்து, ‘ஜெயிலர்’ படத்தின் இரண்டாம் பாகம் உருவாகி வருகிறது.

சன்பிக்சர்ஸ் தயாரிக்கும் இப்படத்திற்கு அனிருத் இசையமைக்கிறார். சமீபத்தில் நடிகர் ரஜினிகாந்த் ‘ஜெயிலர் 2’ படப்பிடிப்பிற்காக கேரளா சென்றார். இப்படத்தின் சில முக்கியமான காட்சிகள் பாலக்காடு பகுதியில் படமாக்கப்பட்டன. இதற்காக, நடிகர் ரஜினிகாந்த், இயக்குநர் நெல்சன் மற்றும் படக்குழுவினர் சில நாட்களுக்கு முன்பு விமானம் மூலம் கோவை வந்தடைந்து, பாலக்காடு சென்றனர். 

குறிப்பிட்ட அந்தக் காட்சிகளை படக்குழுவினர் வெற்றிகரமாகப் படமாக்கி முடித்த நிலையில், இன்று (செப்.24) நடிகர் ரஜினிகாந்தும், இயக்குநர் நெல்சனும் கோவை விமான நிலையம் வழியாகச் சென்னைக்குத் திரும்பினர். விமான நிலையம் வந்தடைந்த நடிகர் ரஜினிகாந்தை ரசிகர்கள் "தலைவா" என்று கோஷமிட்டு ஆரவாரத்துடன் வரவேற்றனர். 

இதைத்தொடர்ந்து, செய்தியாளர்களுக்கு பேட்டியளித்த நடிகர் ரஜினிகாந்த்,  ’ஜெயிலர் 2’ திரைப்படம் 2026-ஆம் ஆண்டு ஜூன் 12-ஆம் தேதி திரையரங்குகளில் வெளியாகும் என உறுதிப்படுத்தியுள்ளார். மேலும், தாதாசாகிப் பால்கே விருது வென்ற நடிகர் மோகன்லாலுக்கு வாழ்த்து தெரிவித்துள்ளார்.