தூனு துப்புன அந்த சீனுக்காக 20 முறை பீஸ்ட் படம் பார்த்த ரசிகர்; விடிவி கணேஷ் ஏர்போர்ட் அனுபவம்!

கெளதம் மேனன் இயக்கத்தில் சிம்பு - திரிஷா நடிப்பில் வெளியான ‘விண்ணைத் தாண்டி வருவாயா’ திரைப்படத்தின் மூலம் பிரபலமானவர் நடிகர் கணேஷ். ‘விண்ணைத் தாண்டி வருவாயா’ திரைப்படத்தில் ‘இங்க என்ன சொல்லுதூ ஜெசி ஜெசினு சொல்லுதா’ என்று நடிகர் கணேஷ் பேசியிருக்கும் டயலாக் இன்று வரை காதலர்களின் தாரக மந்திரமாக உள்ளது.

இந்த படத்தின் வெற்றிக்கு பிறகு நடிகர் கணேஷ், விடிவி கணேஷ் என்று ரசிகர்களால் அழைக்கப்பட்டார். பின்னர், தொடர்ந்து, தமிழில் பல முன்னணி நடிகர்களின் படங்களில் காமெடி கதாபாத்திரத்தில் நடித்து ரசிகர்கள் மத்தியில் தனக்கான இடத்தையும் பெற்றுக் கொண்டார். இவரது நடிப்பை தாண்டி இவரது குரல் தான் இவரை மக்கள் மத்தியில் பிரபலமடைய செய்தது.

தற்போது நடிகர் விடிவி கணேஷ், நடன இயக்குநராக இருந்து தற்போது இயக்குநராக மாறியுள்ள சதீஷின் ‘கிஸ்’ படத்தில் முக்கிய கதாபாத்திரத்தில் நடித்துள்ளார். இந்த படத்தின் நிகழ்ச்சி ஒன்றில் கலந்து கொண்ட நடிகர் விடிவி கணேஷ், தனது ரசிகர் ஒருவர் குறித்து மனம் திறந்துள்ளார்.

அவர் பேசியதாவது, ”பீஸ்ட் படத்தில் ஒரு லிப்ட் சீன் இருக்கும். அந்த லிப்டில் நானும் எனக்கு முன்னாடி சதீஷும் இருப்பார். அப்பறம் ஹீரோ, ஹீரோயின்லாம் இருப்பாங்க. காலையில இருந்து லிப்டி மேல போறதும் கீழ வறதுமா இருந்தது. அப்போது இயக்குநர் நெல்சனிடம் டேய் நெல்சா ஒரு டயலாக்காது குடுடா என்று கேட்டேன். இது விஜய் சார் காதில் விழுந்து விட்டது. அவர் நெல்சன் எதாது டயலாக் கொடுங்க என்றார். 

நெல்சனும் எதாது சொல்லுங்க என்றார். நான் எதாதுனா எப்படி சொல்ல முடியும் என்று சொல்லிவிட்டு சதீஷிடம் நீ எதாது சொல்லு நான் கவுண்டர் சொல்றேன் என்றேன். அவர் ஒரு டயலாக் சொல்லுவார் அதற்கு நான் ’யார்ரா நீ சாகும்போது கூட இப்படி ஒரு காமெடி பண்றியே தெய்வீக குழந்தடா நீ’ என்று சொல்லிவிட்டு ’தூ’ என்று சொல்வேன். 

அதை பார்த்துவிட்டு ஏர்போர்ட்டில் ஒருவர் என்னிடம் வந்து உங்க டயலாக் எங்க ஆளுங்களுக்கு ரொம்ப பிடித்துவிட்டது சார். அதிலும் நீங்க கடைசி ‘தூ’ என்று சொல்லும் சீனை பார்ப்பதற்காக மட்டுமே 20 முறை ‘பீஸ்ட்’ படத்தை பார்த்தேன்” என்றார்.