பெரிய ஏமாற்றம்... கூலி படத்தில் நடித்தது பற்றி மனம் திறந்த நடிகை; லோகியை வறுத்தெடுக்கும் நெட்டிசன்கள்!

இயக்குநர் லோகேஷ் கனகராஜ் இயக்கத்தில் சமீபத்தில் வெளியான திரைப்படம் ‘கூலி’. இந்த படத்தில் நடிகர் ரஜினிகாந்த் முதன்மை கதாபாத்திரத்தில் நடித்திருந்தார். மேலும், சத்யராஜ், கன்னட நடிகர் உபேந்திர ராவ், நாகார்ஜுனா, இந்தி நடிகர் அமீர்கான், மலையாள நடிகர் சோபின், ஸ்ருதிஹாசன் உட்பட பலர் நடித்திருந்தனர்.

அனிருத் இசையமைத்திருந்த இப்படத்தை சன் பிக்சர்ஸ் நிறுவனம் தயாரித்திருந்தது. லோகேஷ் கனகராஜ் மற்றும் ரஜினி கூட்டணியில் உருவான இப்படத்தின் மீதான எதிர்பார்ப்பு ரசிகர்கள் மத்தியில் அதிகமாக இருந்தது. ‘கூலி’ திரைப்படம் ஆகஸ்ட் 14-ஆம் தேதி திரையரங்குகளில் வெளியாகி கலவையான விமர்சனத்தை பெற்றது. 

மேலும், ரூ. 500 கோடிக்கு மேல் வசூலை குவித்தது. ‘கூலி’ திரைப்படத்தின் திரைக்கதையை இன்னும் மேம்படுத்தி இருக்கலாம் என்று ரசிகர்கள் கருத்து தெரிவித்து வந்தனர். அதுமட்டுமல்லாமல், இயக்குநர் லோகேஷ் கனகராஜ் முன்பு படத்தின் திரைக்கதையை சிறப்பாக எழுதி வந்த நிலையில் தற்போது நடிகர்களுக்காக எழுத ஆரம்பித்துவிட்டார் என்று ரசிகர்கள் விமர்சித்து வந்தனர். 

இந்நிலையில், ‘கூலி’ படத்தில் நடித்தது குறித்து நடிகை  ரெபா மோனிகா ஜான் மனம் திறந்துள்ளார். சமூக வலைதளத்தில் ரசிகர்களுக்கு பதிலளித்த அவர், ”நான் மிகவும் வருத்தமாகவும் ஏமாற்றமாகவும் இருக்கிறேன். நான் இன்னும் நிறைய கொடுத்திருக்க முடியும் என்பது எனக்குத் தெரியும், ஆனால் சில நேரங்களில் விஷயங்கள் நீங்கள் எண்ணியது போன்று நடக்காது.

இருப்பினும், தலைவர் ரஜினிகாந்துடன் பணிபுரியும் வாய்ப்பு கிடைத்ததில் நான் மகிழ்ச்சியடைகிறேன்" என்று கூறினார். ரெபா மோனிகா ஜானின் இந்த பதிவு சமூக வலைதளத்தில் வைரலாகி வருகிறது. நடிகை ரெபா மோனிகா ஜான் ‘கூலி’ திரைப்படத்தில் நடிகர் சத்யராஜிற்கு மகளாக நடித்திருப்பார்.

‘கூலி’ திரைப்படம் வெளியாகுவதற்கு முன்பு இவர் பல நேர்காணல்களில், ‘கூலி திரைப்படத்தில் என் கதாபாத்திரம் மிகவும் ஆச்சரியமாக இருக்கும். ரஜினி சாருடன் வரும் காட்சிகள் ரசிகர்களை உற்சாகப்படுத்தும்’ என்று குறிப்பிட்டிருந்தார். இதையடுத்து ‘கூலி’ திரைப்படம் வெளியான பின்னர் ரசிகர்கள் பலரும் ரெபா மோனிகா ஜானின் காட்சிகள் பெரிய அளவில் படத்தில் இல்லையே என்று ட்ரோல் செய்ததாக தகவல் வெளியாகியுள்ளது.