86 வயது தாயார் மரணம்; நடிகை ராதிகா சோக பதிவு

மறைந்த நடிகர் எம்.ஆர்.ராதாவின் மனைவியும், நடிகை ராதிகா-நிரோஷா ஆகியோரின் தாயாருமான கீதா ராதா வயது மூப்பு மற்றும் உடல் நலக்குறைவு காரணமாக இன்று காலமானார். அவருக்கு வயது 86.

சென்னை போயஸ் கார்டன் இல்லத்தில் அவருடைய உடல் அஞ்சலிக்காக வைக்கப்பட்டுள்ளது. கீதா ராதா மறைக்கு திரைத்துறையினர் பலரும் இரங்கல் தெரிவித்து வருகின்றனர். மேலும் அவரது உடலுக்கு திரைத்துறையினர் பலர் அஞ்சலி செலுத்தி வருகின்றனர். மாலை 4.30 மணியளவில் பெசன்ட் நகர் மின் மயானத்தில் அவரது உடல் தகனம் செய்யப்பட உள்ளது.

தாயின் மறைவு குறித்து அறிக்கை வெளியிட்டிருக்கும் ராதிகா சரத்குமார், "மறைந்த நடிகவேள் எம்.ஆர்.ராதா அவர்களின் மனைவியும், எனது தாயார் திருமதி.கீதா ராதா (வயது 86) அவர்கள் இன்று (21.09.2025) மாலை மணிக்கு உடல் நலக்குறைவு மற்றும் வயது மூப்பு காரணமாக காலமானார் என்பதை வருத்தத்துடன் தெரிவித்துக் கொள்கிறோம். அவரின் உடல் இறுதி மரியாதை செலுத்துவதற்காக போயஸ் கார்டனிலுள்ள இல்லத்தில் வைக்கப்பட்டுள்ளது. அன்னாரது இறுதி சடங்கு மாலை 4.30 மணிக்கு மேல் பெசன்ட் நகர் மின்மயானத்தில் நடைபெறும் என்பதை தெரிவித்துக் கொள்கிறோம்." எனத் தெரிவித்திருக்கிறார்.

எம்.ஆர்.ராதாவுக்கு 3 மனைவிகள். அதில் 3-வது மனைவிதான் கீதா. இவரது மகள்கள்தான் நடிகை ராதிகா மற்றும் நிரோஷா. 2-வது மனைவி தனலட்சுமியின் மகன் ராதாரவி ஆவார். நடிகை ராதிகாவுக்கு பிரபலங்கள் பலரும் இரங்கல் தெரிவித்து வருகின்றனர்.

செய்தி: க.சண்முகவடிவேல்