விக்ரம், அஜித்துக்கு ஜோடி; கடைசி தமிழ் படத்தில் பாலியல் தொழிலாளி: வடிவேலுக்கு ஜோடியான இந்த நடிகை யார் தெரியுமா?

திரைத்துறையில் ஒரு நடிகராக நுழைவதுதான் கடினமான காரியம் என்று பலர் நினைக்கிறார்கள். ஆனால், அங்கே நிலைத்து நிற்பது அதைவிடப் பெரிய சவால். அதுவும் பெண்களுக்கு அந்தச் சவால் இன்னும் அதிகம். பாலினப் பாகுபாடு, வயது குறித்த பயம், எனப் பல விஷயங்களை எதிர்கொள்ள வேண்டியிருக்கிறது. அதோடு, தனிப்பட்ட வாழ்க்கையிலும் பல போராட்டங்களைச் சந்திக்க நேரிடும். இந்தச் சவால்களை எல்லாம் எதிர்கொண்டு தன் பாதையில் பயணித்தவர் நடிகை சதா.

இந்த செய்தியை ஆங்கிலத்தில் படிக்க இந்த லிங்கை க்ளிக் செய்யவும்

ஒரு காலத்தில் தென்னிந்தியாவின் முன்னணி நடிகைகளில் ஒருவராக இருந்தவர், தெலுங்கு, தமிழ், கன்னடத் திரையுலகின் டாப் ஹீரோக்களுடன் நடித்தவர். ஆனால், கடந்த 10 ஆண்டுகளாக அவருடைய சினிமா வாழ்க்கை தலைகீழாக மாறியது. கடந்த 7 ஆண்டுகளில் அவர் வெறும் மூன்று படங்களில் மட்டுமே நடித்திருக்கிறார். சதா, முஸ்லிம் தந்தைக்கும் இந்து தாய்க்கும் பிறந்தவர். இவர்களின் காதல் திருமணத்தை இரு வீட்டாருமே ஏற்க மறுத்தனர். அதனால், கர்நாடகாவில் உள்ள பெல்காமிலிருந்து (பெலகாவி) மகாராஷ்டிராவில் உள்ள ரத்னகிரிக்குக் குடிபெயர்ந்தனர்.

இந்தத் தம்பதியருக்கு ஒரே மகள் சதா. அவருக்கு நடனம் என்றால் கொள்ளைப் பிரியம். பாலிவுட் நடிகை மாதுரி தீட்சித்தின் தீவிர ரசிகை. கல்லூரி விழாக்களில் மாதுரி தீட்சித் பாடல்களுக்கு நடனமாடாமல் இருக்க மாட்டார். 2005-ல் 'தி இந்து' பத்திரிகைக்கு அளித்த பேட்டியில், சதா தனது நடிப்புப் பயணத்தின் தொடக்கத்தைப் பற்றிக் குறிப்பிட்டிருந்தார். இன்ஜினீயரிங் படித்துக்கொண்டிருந்தபோது, தெலுங்குத் திரைப்படமான 'ஜெயம்' (2002) படத்தின் இயக்குநர்கள் சதாவைச் சந்தித்தனர்.

இயக்குநர் தேஜா இயக்கிய அந்தப் படத்தில் நிதின்னுக்கு ஜோடியாக நடித்தார் சதா. அப்படத்தின் வெற்றி, அவருக்குப் பல வாய்ப்புகளைப் பெற்றுத் தந்தது. மேலும், அப்படத்திற்காக அவர் சிறந்த நடிகைக்கான ஃபிலிம்பேர் விருதையும் வென்றார். 2003-ல் அல்லரி நரேஷ் நடிப்பில் வெளிவந்த 'ப்ராணம்', ஜூனியர் என்.டி.ஆர் நடிப்பில் வெளிவந்த 'நாகா' ஆகிய படங்களில் நடித்தார். அதே ஆண்டு, 'ஜெயம்' படத்தின் தமிழ் ரீமேக்கிலும் சதா நடித்தார். இதன் மூலம் தமிழ் திரையுலகில் அறிமுகமானார்.

இப்படத்திலும் ரசிகர்களின் மனதைக் கவர்ந்து, தென்னிந்தியா முழுவதும் பிரபலமானார். உடனடியாக பெரிய பட்ஜெட் படங்களில் நடிக்கும் வாய்ப்புகள் அவரைத் தேடி வந்தன. அடுத்த ஆண்டு, மனோஜ் மஞ்சுவுடன் 'தோங்கா தோங்கடி', மாதவனுடன் 'எதிரி', ஸ்ரீகாந்துடன் 'வர்ணஜாலம்' உள்ளிட்ட படங்களில் நடித்தார். 2005-ல், இயக்குநர் ஷங்கரின் இயக்கத்தில் வெளியான 'அந்நியன்' படத்தில் சதா நடித்தது, அவரது சினிமா வாழ்க்கையில் ஒரு பெரிய திருப்புமுனையாக அமைந்தது.

சைக்கலாஜிக்கல் த்ரில்லர் படமான இதில் நடிகர் விக்ரமுக்கு ஜோடியாக நடித்தார். இந்தப் படத்தின் வெற்றி, சதாவை முன்னணி நடிகை என்ற நிலைக்கு உயர்த்தியது. அடுத்த இரண்டு ஆண்டுகளில், அவர் அஜித்குமாருடன் 'திருப்பதி', பாலகிருஷ்ணாவுடன் 'வீரபத்ரா', சித்தார்த்துடன் 'சுக்கல்லோ சந்துருடு', ஆதித்யாவுடன் 'மோகினி 9886788888','உன்னாலே உன்னாலே', நிதின்னுடன் 'கிளாஸ்மேட்ஸ்' மற்றும் 'தக்கரி' போன்ற பல படங்களில் நடித்தார். ஆனால், அவற்றில் சில படங்கள் எதிர்பார்த்த வெற்றியைப் பெறவில்லை.

2008-ல், மலையாளத் திரைப்படமான 'நாவல்' மூலம் மலையாளத்தில் அறிமுகமானார். ஜெயராமுடன் இணைந்து நடித்த அந்தப் படம் பெரிய அளவில் கவனிக்கப்படவில்லை. 2009-ல் வெளியான அவரது இந்திப் படங்களான 'லவ் கிச்டி' மற்றும் 2010-ல் வெளியான 'க்ளிக்' ஆகியவையும் எதிர்பார்த்த வெற்றியைப் பெறவில்லை. இதனால் அவர் நடிக்கும் படங்களின் எண்ணிக்கையும் குறைந்தது. தொடக்கத்தில் ஆண்டுக்கு இரண்டு அல்லது மூன்று படங்களில் நடித்து வந்த சதா, 2015-ல் அந்த எண்ணிக்கையைக் குறைத்தார்.

அந்த ஆண்டு, வடிவேலுவுடன் நடித்த 'எலி' திரைப்படம் மட்டுமே வெளியானது. இந்தச் சமயத்தில், அவருடைய தாயாருக்கு புற்றுநோய் இருப்பது கண்டறியப்பட்டது. இதனால் சதா உணர்வுபூர்வமாகப் பாதிக்கப்பட்டார். தனது முழு கவனத்தையும் தாயாரின் உடல்நலத்திலும் சிகிச்சையிலும் செலுத்தினார். அதே நேரத்தில், திரையுலகிலிருந்து விலகி, தொலைக்காட்சி நிகழ்ச்சிகளில் நடுவராகக் கலந்துகொண்டார்.2018-ல் 'தி இந்து' பத்திரிகைக்கு அளித்த பேட்டியில், சில படங்களில் ஏன் நடித்தோம் என்று யோசித்ததாகவும், ஒரு நடிகையாக முதிர்ச்சியான கதாபாத்திரங்களில் நடிக்க விரும்புவதாகவும் தெரிவித்தார்.

View this post on Instagram

A post shared by Sadaa Sayed (@sadaa17)

மேலும், படம் வெற்றியடைந்தாலும் இல்லாவிட்டாலும், நடிப்புத் திறமைக்கு முக்கியத்துவம் உள்ள படங்களில் நடிக்க ஆசைப்பட்டதாகத் தெரிவித்தார். 2018-ல் வெளியான 'டார்ச்லைட்' படத்தில், பாலியல் தொழிலாளியாக சக்திவாய்ந்த கதாபாத்திரத்தில் சதா நடித்திருந்தார். ஆனால், அந்த வெற்றி அவருக்குத் தொடர்ந்து வாய்ப்புகளைப் பெற்றுத்தரவில்லை. அதன் பிறகு, அவர் தொடர்ந்து சின்னத்திரையில் பல நிகழ்ச்சிகளில் கலந்துகொண்டாலும், 2023-ல் தெலுங்கில் வெளியான 'அஹிம்சா' மற்றும் 'ஆதிகேசவ' ஆகிய இரண்டு படங்களில் மட்டுமே நடித்திருக்கிறார்.

சதா ஒரு விலங்கு நல ஆர்வலர். விலங்குகளைக் காப்பாற்றுவதிலும், அவற்றுக்கு ஆதரவளிப்பதிலும் கவனம் செலுத்துகிறார். ஃபெடரேஷன் ஆஃப் இந்தியன் அனிமல் ப்ரொடெக்ஷன் ஆர்கனைசேஷன்ஸ் (FIAPO) அமைப்புக்கும் ஆதரவு கொடுக்கிறார். அசைவ உணவுகளைத் தவிர்த்து, சைவ உணவுகளை மட்டுமே உட்கொண்டு வருகிறார். அண்மைக் காலத்தில், வனவிலங்கு புகைப்படக் கலைஞராகவும் தனக்கென ஒரு பெயரைப் பெற்றிருக்கிறார். தனது இன்ஸ்டாகிராம் பக்கத்தில், அவர் எடுத்த புகைப்படங்களைப் பகிர்ந்து வருகிறார்.