சிங்கப்பூர் படிக்க போனவர் சினிமாவுக்கு வர காரணம் தனுஷ் தான்; அனிருத் பற்றிய ரகசியம் உடைத்த ஐஸ்வர்யா!

தென்னிந்திய திரையுலகில் முன்னணி இசையமைப்பாளர்களுள் ஒருவராக வலம் வருபவர் அனிருத்.  இவர் ஐஸ்வர்யா ரஜினிகாந்த் இயக்கத்தில் தனுஷ், ஸ்ருதிஹசன் நடிப்பில் வெளியான ‘3’ திரைப்படத்தின் மூலம் இசையமைப்பாளாராக அறிமுகமானார். தனது 17 வயதில்  'Why This Kolaveri' பாடல் மூலம் ஹிட் இசையமைப்பாளராக மாறினார். 

இசையமைப்பாளர் அனிருத், ஐஸ்வர்யா ரஜினிகாந்தின் உறவினர் முறை சகோதரர் ஆவார். தொடர்ந்து, அனிருத் இசையில் வெளியான பாடல்கள் ரசிகர்களை கவர்ந்தது. ரஜினி, கமல், விஜய், அஜித், சூர்யா என முன்னணி பிரபலங்கள் அனைவருக்கும் அனிருத் இசையமைத்துள்ளார்.

அனிருத்திற்கு சிவகார்த்திகேயன், கீர்த்தி சுரேஷ், விஜய், லோகேஷ் கனகராஜ், நெல்சன் திலீப்குமார் உள்ளிட்ட பல திரைப்பிரபலங்கள் நெருங்கிய நண்பர்களாக இருக்கின்றனர். ஷாருக்கான் நடிப்பில் வெளியான ‘ஜவான்’ திரைப்படம் மூலம் பாலிவுட்டிலும் அனிருத் கால் பதித்தார்.

தற்போது டாப் ஸ்டார்கள் படங்களுக்கு இசையமைக்கும் ராக் ஸ்டாராக மாறி இருக்கிறார். சிங்கிளாக இருக்கும் அனிருதை சுற்றி பல காதல் கிசுகிசுக்களும், திருமண வதந்திகளும் அவ்வப்போது பரவி வருகிறது.  இவர் அடுத்ததாக இயக்குநர் நெல்சன் இயக்கத்தில் உருவாகி வரும் ‘ஜெயிலர் 2’ திரைப்படத்திற்கு இசையமைத்து வருவதாக கூறப்படுகிறது.

இந்நிலையில், இசையமைப்பாளர் அனிருத்தை நடிகர் தனுஷ் தான் சினிமாத்துறையில் அறிமுகப்படுத்தியதாக இயக்குநர் ஐஸ்வர்யா ரஜினிகாந்த் தெரிவித்துள்ளார். இதுகுறித்து அவர் அளித்துள்ள பேட்டியில், “அனிருத் சினிமாவிற்கு வந்ததற்கும் எனக்கும் எந்த சம்பந்தமும் இல்லை. அனிருத் சினிமாவிற்கு வர காரணமே தனுஷ் தான்.

அவர்தான் அனிருத்திற்கு திறமை இருக்கிறது பயன்படுத்திக் கொள்ளலாம் என்றார். அனிருத்தின் பெற்றோர்கள் அனிருத்தை சிங்கப்பூர் அனுப்ப போகிறோம் என்று சொன்ன போது கூட இல்லை அனுப்ப வேண்டாம் அவருக்கு திறமை இருக்கிறது என்று தனுஷ் கூறினார்.

மேலும் கீபோர்ட் வாங்கி கொடுத்ததில் இருந்து சினிமாத் துறையில் அனிருத் வந்தது வரைக்கும் தனுஷ் தான் காரணம். தற்போது அனிருத் இவ்வளவு பெரிய இசையமைப்பாளராக இருக்கிறார் என்றால் அதற்கு அவர் திறமை தான் காரணம். அதற்காக நான் சந்தோஷப்படுகிறேன்” என்றார்.