'தம்பி அண்ணாமலை..'; அமரன் படத்தை பாராட்டிய பா.ஜ.க தலைவருக்கு கமல் நன்றி பதிவு

ராஜ்குமார் பெரியசாமி இயக்கத்தில் சிவகார்த்திகேயன் நடித்துள்ள படம் ‘அமரன்’. இப்படம் அக்.31 தீபாவளி தினத்தில் திரையரங்குகளில் வெளியானது. நடிகர் கமல்ஹாசனின் ராஜ்கமல் ஃபிலிம்ஸ் நிறுவனம் படத்தை தயாரித்துள்ளது. ஜிவி பிரகாஷ் குமார் இசையமைத்துள்ளார். தமிழகத்தை சேர்ந்த மறைந்த ராணுவ வீரர் மேஜர் முகுந்த் வரதராஜனின் வாழ்க்கையைத் தழுவி இப்படம் உருவாகியுள்ளது. இதில் சிவகார்த்திகேயன் மேஜர் முகுந்த் வரதராஜனாக நடித்துள்ளார். 

நடிகை சாய் பல்லவி கதாநாயகியாக நடித்துள்ளார். படம் வெளியாகி ரசிகர்கள், மக்களிடையே நல்ல வரவேற்பு பெற்று வருகிறது. இந்நிலையில் பாஜக தலைவர் அண்ணாமலை அமரன் படத்தை பார்த்து படக்குழுவினருக்கு பாராட்டு தெரிவித்துள்ளார்.

அவர் வெளியிட்ட X  பதிவில், "அமரன் படத்தை பார்க்கும் வாய்ப்பு கிடைத்தது. பல முக்கிய அம்சங்களில் இது மிக முக்கியமான படம். படத்தில், எனது காக்கி சீருடையை அணிந்து கொண்டிருந்த அந்த நாட்களை நான் நினைவுகூர முடிந்தது. 

மேஜர் முகுந்த் வரதராஜனின் வாழ்க்கை என்னென்றும் நமக்கு  உத்வேகம் தரும். 2014-ல் அவர் நம் தேசத்துக்காக உயிர் தியாகம் செய்தார். அப்போது நாம் எதையோ இழந்துவிட்டோம் என்று  உணர வைத்தது.

ராஜ்குமார் பெரியசாமி அவர்களின் அருமையான இயக்கம், சிவகார்த்திகேயன் அவர்களின் அதிசயமான நடிப்பு, அவருடைய நடிப்பில் இது மாபெரும் மாற்றத்தை நிகழ்த்தியிருக்கிறது. 

சாய்பல்லவி நன்கு நடித்துள்ளார், மனதில் கொள்ளும் இசையும், உணர்ச்சிமிகு காட்சியையும் ஒளிப்பதிவு தருகிறது. இந்த படத்தை உருவாக்கியதற்காக கமல்ஹாசன் அவர்களுக்கு சிறப்பு நன்றி. இந்திய ஆயுதப்படை வாழ்க!" என்று பதிவிட்டிருந்தார்.

இதற்கு பதிலளித்த நடிகர் சிவகார்த்திகேயன் தனது எக்ஸ் வலைதளத்தில், "அமரன் திரைப்படத்தை பார்த்து, குழுவைப் பாராட்டியதற்கு அண்ணன் அண்ணாமலைக்கு நன்றி" என்று பதிவிட்டிருந்தார். 

இந்நிலையில் அமரன் படத்தின் தயாரிப்பாளரும், ம.நீ.ம கட்சித் தலைவருமான கமல்ஹாசன் அண்ணாமலைக்கு நன்றி தெரிவித்துள்ளார்.

இதுதொடர்பாக அவர் தனது எக்ஸ் வலைதளத்தில், "தமிழக பாஜக தலைவர், தம்பி அண்ணாமலை அவர்கள் அமரன் திரைப்படம் அவருக்கு ஏற்படுத்திய உணர்வலைகளை நெகிழ்ச்சியுடன் பகிர்ந்துள்ளார். அவருக்கு என் நன்றி" என்று கமல்ஹாசன் பதிவிட்டுள்ளார்.

தமிழக பாஜக தலைவர், தம்பி @annamalai_k அவர்கள் அமரன் திரைப்படம் அவருக்கு ஏற்படுத்திய உணர்வலைகளை நெகிழ்ச்சியுடன் பகிர்ந்துள்ளார். அவருக்கு என் நன்றி. https://t.co/B8CGiTZ8E1

— Kamal Haasan (@ikamalhaasan) November 4, 2024