‘பள்ளி, கல்லூரியில் நேரத்தை வீணாக்காதே’ - ஏ.ஆர். ரஹ்மானை இசைப் புயலாக மாற்றிய தாயின் தொலைநோக்கு

ஏ.ஆர். ரஹ்மான் 5 தேசிய விருதுகள், 2 ஆஸ்கார் விருதுகள் மற்றும் 2 கிராமி விருதுகள் உள்ளிட்ட பல விருதுகளைப் பெற்றுள்ளார். இதற்கு அவர் தனது பெற்றோருக்கு நன்றி சொல்ல வேண்டும். அவரது தந்தை ஒரு இசையமைப்பாளராக இருந்து சிறுவயதிலிருந்தே அவரை இந்தத் தொழிலைத் தொடர ஊக்குவித்தார். அதே சமயம், அவரது தாயார் கல்வியைத் தவிர்த்துவிட்டு தந்தையின் அடிச்சுவடுகளைப் பின்பற்றும்படி அவரை உற்சாகப்படுத்தினார்.

ஆங்கிலத்தில் படிக்க:

“என் தந்தை செய்ததை நான் முன்னெடுத்துச் செல்ல வேண்டும், பள்ளி, கல்லூரி மற்றும் எல்லாவற்றிலும் என் நேரத்தை வீணாக்கக் கூடாது என்று தொலைநோக்குப் பார்வையுடன் என் தாய் உணர்ந்தார். மற்ற பெற்றோர்கள் இருந்த விதத்திற்கு முற்றிலும் மாறாக அவர் இருந்தார். அது என்னை வியப்பில் ஆழ்த்தியது. உண்மையில், நான் எடுத்த ஒரு முடிவு என்னவென்றால், அவருக்காக ஒரு நினைவிடத்தை கட்ட வேண்டும் என்று நினைத்தேன். ஏனென்றால், எந்தத் தாயும் செய்யத் துணியாத ஒரு உள்ளுணர்வுடன் ஒரு முடிவை எடுத்த தைரியத்திற்காக அவர் அதற்குத் தகுதியானவர் என்று நான் நினைக்கிறேன்” என்று ஏ.ஆர். ரஹ்மான் கூறினார்.

நயன்தீப் ரக்ஷித்துக்கு அளித்த பேட்டியில், பல வருடங்களாக உடல்நலக் குறைவால் அவதிப்பட்ட அவரது பெற்றோர் இறந்தபோது, அது ஆச்சரியப்படும் விதமாக அவருக்கு ஒரு நிம்மதியாக இருந்தது என்று அவர் நினைவு கூர்ந்தார்.  “என் தந்தை இறந்தபோது நான் மிகவும் சிறுவனாக இருந்தேன். அவர் வேதனையில் இருந்தார். மக்கள் வேதனையில் இருக்கும்போது, அவர்களை இழக்கும்போது ஒருவித நிம்மதியை நீங்கள் உணர்கிறீர்கள்” என்று ஏ.ஆர். ரஹ்மான் ஒப்புக்கொண்டார்.

நோய்வாய்ப்பட்டிருந்த தனது தாயின் மெதுவான மரணத்தை விட, தனது ஒலிப்பதிவுப் பொறியாளரின் திடீர் மரணம் தனக்கு அதிக அதிர்ச்சியையும் வருத்தத்தையும் அளித்தது என்று அவர் கூறினார்.  “என் ஒலிப்பதிவுப் பொறியாளர் மாரடைப்பால் இறந்தார். 8 வருடங்களாக வேதனையுற்று பின்னர் இறந்த என் தாயைவிட அது எங்களை அதிகமாக பாதித்தது. அவர் இறந்தபோது, அவருக்காக நாங்கள் நிம்மதி அடைந்தோம். அவர் கிட்டத்தட்ட, 'நான் இனிமேலும் கஷ்டப்பட விரும்பவில்லை. தயவுசெய்து என்னை போக விடுங்கள்' என்று சொன்னது போல் இருந்தது. அப்போது நாங்கள் எதற்காக பிரார்த்தனை செய்வது என்று தெரியவில்லை. எது அவருக்கு நல்லதோ அதை கடவுளிடம் விட்டுவிட்டோம். எனவே வாழ்க்கை சிக்கலானது. ஆனால், மற்றவர்கள் எவ்வளவு கஷ்டப்படுகிறார்கள் என்று பார்க்கும்போது, என்னுடையது ஒன்றுமே இல்லை” என்று ஏ.ஆர். ரஹ்மான் மேலும் கூறினார்.

ரஹ்மானின் தந்தை ஆர்.கே. சேகர் தமிழ் மற்றும் மலையாளத் திரைப்படங்களில் இசையமைப்பாளராகவும் நடத்துனராகவும் இருந்தார். ஏ.ஆர். ரஹ்மான் சிறு வயதிலேயே தனது தந்தைக்கு உதவியாளராக இருந்தார். மேலும், நான்கு வயதில் பியானோ மற்றும் கீபோர்டு வாசிக்கக் கற்றுக்கொண்டார். ரஹ்மானுக்கு ஒன்பது வயதாக இருந்தபோது அவரது தந்தை இறந்துவிட்டார். எனவே குடும்பத்தை ஆதரிப்பதற்காக அவர் அடிக்கடி பள்ளிக்குச் செல்வதைத் தவிர்க்க வேண்டியிருந்தது. ரஹ்மானின் தாய் கரீமா பேகம் 2020-ல் காலமானார்.

இசைப் பயணத்தில், ரஹ்மான் தனது 'வொண்டர்மென்ட்' சுற்றுப்பயணத்தைத் தொடங்கவுள்ளார். முதல் இசை நிகழ்ச்சி மே 3-ம் தேதி மும்பை டி.ஒய். பாட்டீல் ஸ்டேடியத்தில் நடைபெறவுள்ளது. பிப்ரவரியில், சென்னையில் நடைபெற்ற எட் ஷீரனின் 'மேத்தமேடிக்ஸ் டூர்' இசை நிகழ்ச்சியில் அவருடன் இணைந்து மேடையில் பாடி ரஹ்மான் பார்வையாளர்களைக் கவர்ந்தார். ஆனந்த் எல் ராய் இயக்கும், பிளாக்பஸ்டர் திரைப்படமான ரஞ்சனா படத்தின் ஆன்மீகத் தொடர்ச்சியான 'தேரே இஷ்க் மேய்ன்' என்ற தனுஷ் மற்றும் கீர்த்தி சனோன் நடிக்கும் படத்திற்கும் அவர் இசையமைக்கவுள்ளார்.