அட்லீ - அல்லு அர்ஜுன் கூட்டணி... களமிறங்கும் விஜய் சேதுபதி; மீண்டும் வில்லன்?

'புஷ்பா 2'  வெற்றிக்குப் பிறகு தென்னிந்திய சினிமாவின் சூப்பர் ஸ்டார் நடிகர் அல்லு அர்ஜுன், தமிழ் சினிமாவின் முன்னணி இயக்குநரான அட்லீயுடன் கைகோர்த்துள்ளார். ஷாருக்கானின் 'ஜவான்' படத்திற்குப் பிறகு அட்லீ இயக்கும் அடுத்த படம் இது என்பதால், இந்த கூட்டணி இந்திய அளவில் பெரும் எதிர்பார்ப்பை ஏற்படுத்தியுள்ளது. குறிப்பாக, அல்லு அர்ஜுன் மற்றும் அட்லீயின் முதல் கூட்டணி என்பதால், படத்தின் ஒவ்வொரு தகவலும் ரசிகர்களின் கவனத்தை ஈர்த்து வருகிறது. இப்படத்தை பிரம்மாண்டமான முறையில் சன் பிக்சர்ஸ் நிறுவனம் தயாரிக்கிறது.

படத்தின் பட்ஜெட் குறித்த தகவல்கள் ஏற்கனவே பெரும் பரபரப்பை ஏற்படுத்தியுள்ளன. கிட்டத்தட்ட ரூ.600 கோடி பட்ஜெட்டில் உருவாகவிருக்கும் இப்படம், இந்திய சினிமாவின் மிக உயர்ந்த பட்ஜெட் திரைப்படங்களில் ஒன்றாக அமையும் என கூறப்படுகிறது. மேலும், ஹாலிவுட் தர தொழில்நுட்ப வல்லுநர்களைக் கொண்டு, இதுவரை இந்திய சினிமாவில் காணாத ஒரு கதைக்களத்துடன் அட்லீ இப்படத்தை உருவாக்கவுள்ளார்.

படத்தின் கதாநாயகி யார் என்பது குறித்து பல்வேறு தகவல்கள் வெளியாகி வருகின்றன. முதலில், நடிகை தீபிகா படுகோனே கதாநாயகியாக நடிக்கிறார் என்று அறிவிப்பு வெளியானது. இதைத் தொடர்ந்து, மிருணாள் தாகூர், ஜான்வி கபூர், ராஷ்மிகா மந்தனா மற்றும் பாக்ய ஸ்ரீ ப்ரோஸ் போன்ற முன்னணி நடிகைகளிடமும் படக்குழு பேச்சுவார்த்தை நடத்தி வருவதாக தகவல்கள் பரவி வருகின்றன.

இதற்கிடையில், இந்த பிரம்மாண்ட படத்தில் ஒரு முக்கிய நட்சத்திரம் சிறப்பு தோற்றத்தில் (கேமியோ ரோல்) நடிக்க உள்ளதாக ஒரு செய்தி வெளியாகியுள்ளது. அது வேறு யாருமல்ல, 'ஜவான்' படத்தில் மிரட்டலான வில்லனாக நடித்த நடிகர் விஜய் சேதுபதி. விஜய் சேதுபதியின் வருகை இந்தப் படத்திற்கு மேலும் பலம் சேர்க்கும் என்று எதிர்பார்க்கப்படுகிறது. 'ஜவான்' படத்தில் அட்லீயுடன் இணைந்து பணிபுரிந்த அனுபவம், மீண்டும் இக்கூட்டணி அமைய காரணமாக இருக்கலாம்.

அல்லு அர்ஜுன், அட்லீ, சன் பிக்சர்ஸ், மற்றும் விஜய் சேதுபதி ஆகியோரின் இந்த பிரம்மாண்ட கூட்டணி, இந்திய சினிமாவை அடுத்த கட்டத்திற்கு எடுத்துச் செல்லும் ஒரு புதிய அத்தியாயமாக இருக்கும் என்று ரசிகர்கள் ஆவலுடன் எதிர்பார்த்துக் கொண்டிருக்கின்றனர்.