நீ காலேஜ் போ... நான் பிளஸ் டூ பரிட்சை எழுத போறேன்; மகனுக்கு போட்டியாக படிப்பில் களமிறங்கிய முத்துக்காளை!

சமீபத்தில் நடிகர் முத்துக்காளை தன் மகன் வாசன் முரளியை கல்லூரியில் சேர்த்து விட்டு வந்த நிகழ்வு, பலரது கவனத்தையும் ஈர்த்துள்ளது. 'பையன் ஸ்கூலுக்குப் போறான், கொண்டு போய் விடுறதுக்கு...' என்ற கேலியான கேள்விக்கு அவர் அளித்த பதில், பலருக்கும் தெரியாத அவரது கல்விப் பயணத்தை வெளிப்படுத்தியுள்ளது.

முத்துக்காளையின் கல்வி வாழ்க்கை ஆறாம் வகுப்போடு முடிந்து போனது. இதற்கு இரண்டு காரணங்களைச் சொல்கிறார். ஒன்று, பள்ளிக் கட்டணம் 22 ரூபாய் கூட செலுத்த முடியாத குடும்பச் சூழல். மற்றொன்று, படிப்பு மீது இருந்த ஆர்வமின்மை. படிப்புக்கு விடை கொடுத்துவிட்டு, மளிகைக் கடையில் வேலைக்குச் சேர்ந்தார். காலை 7 மணி முதல் இரவு 11 மணி வரை கடினமாக உழைத்த அவரது மனம், மூன்று வருடங்களுக்குப் பிறகு படிப்புக்கு ஏங்கியது. ஆனால், ஆறாம் வகுப்பு படிக்க மீண்டும் பள்ளிக்குச் செல்வது அவமானமாகத் தோன்றவே, அதைத் தவிர்த்ததாகவும் அவர் கூறியுள்ளார். 

மளிகைக் கடை வேலையை விட்டுவிட்டு, பவர் லூம் தொழிற்சாலையில் வேலைக்குச் சேர்ந்தார். அப்போதுதான் அவருக்கு சினிமா ஆசை ஏற்பட்டது. 'ஆறாம் வகுப்பு படிச்சவன், மெட்ராஸ் போயி என்ன செய்யப் போறான்?' என்று சிலர் ஏளனம் பேசியது, அவரை உத்வேகப்படுத்தியது. அதை ஒரு சவாலாக ஏற்றுக்கொண்டு, டுட்டோரியலில் சேர்ந்து எட்டாம் வகுப்பு முடித்தார். அதோடு, கராத்தே போன்ற தற்காப்புக் கலைகளையும் கற்றுக்கொண்டார். சென்னைக்கு வந்த பிறகு, சினிமா வாய்ப்பு தேடிச் சென்ற இடங்களில் 'என்ன படிச்சிருக்கீங்க?' என்ற கேள்விக்கு 'எட்டாம் வகுப்பு' என்று சொல்ல வெட்கப்பட்டு, பின்னர் பத்தாம் வகுப்பு தேர்வு எழுதி தேர்ச்சி பெற்றதாக கூறினார்.

திறந்தவெளி பல்கலைக்கழகம் மூலம் பட்டப்படிப்பு பெற முடியும் என்பதை அறிந்து, பி.ஏ. வரலாறு படிப்பில் சேர்ந்து பட்டம் பெற்றார். சினிமாத் துறையில் அவருக்கு அங்கீகாரம் கிடைக்கத் தொடங்கியபோது, அவரது கல்விப் பயணம் மற்றவர்களுக்கு ஓர் உதாரணமாக மாறியது. இது படிப்பு மீதான அவரது காதலை மேலும் அதிகரித்தது. அதன் தொடர்ச்சியாக, முதுகலைப் பட்டமும் பெற்றார்.

அடுத்து முனைவர் பட்டம் பெற ஆர்வம் ஏற்பட்டது. ஆனால், அதிலும் ஒரு சிக்கல் இருந்தது. பத்தாம் வகுப்பு மட்டுமே முடித்துவிட்டு பட்டப்படிப்பு முடித்ததால், முனைவர் பட்டத்திற்கான குறைந்தபட்ச தகுதியான பன்னிரண்டாம் வகுப்பை அவர் முடிக்கவில்லை. எனவே, இப்போது முத்துக்காளை பன்னிரண்டாம் வகுப்பு படித்துக் கொண்டிருக்கிறார். அடுத்த மார்ச் மாதம் தேர்வு எழுத உள்ளார். மகன் கல்லூரிக்குச் செல்லும் இந்த நேரத்தில், தான் பன்னிரண்டாம் வகுப்பு படிப்பதை அவர் நெகிழ்ச்சியுடன் குறிப்பிட்டார். பன்னிரண்டாம் வகுப்பை முடித்துவிட்டு, முனைவர் பட்டம் பெற வேண்டும் என்பதில் அவர் உறுதியாக உள்ளார்.

தன் மகனிடம், "என் அப்பாவுக்கு என்னைப் படிக்க வைக்க அன்று காசு இல்லை. உன்னைக் கல்லூரியில் சேர்க்கும்போதும் என்னிடம் பணம் இல்லை. நான் சம்பாதித்த நல்ல மனிதர்கள் உதவியதாலும், நடிகர் சங்கம் மற்றும் சண்டைப் பயிற்சி கலைஞர்கள் சங்கம் பேசியதாலும் வேல்ஸ் பல்கலைக்கழகத்தில் உனக்கு இலவச இடம் கிடைத்தது. உன் பையன் படிக்கும்போது உன்னிடம் பணம் இருக்க வேண்டும். அப்போது இல்லாதவர்களுக்கு உதவ வேண்டும். அதற்காக நீ நன்றாகப் படிக்க வேண்டும்" என்று நெகிழ்ச்சியுடன் அறிவுறுத்தியுள்ளார்.

நடிகர் முத்துக்காளையின் இந்த வாழ்க்கை, பணம், வயது, சமூகச் சூழல் போன்ற தடைகளைத் தாண்டி, ஒரு மனிதன் தன் கனவுகளை அடைய முடியும் என்பதற்கு ஒரு சிறந்த எடுத்துக்காட்டு. அவரது கல்வி மீதான தணியாத வேட்கையும், அதை நோக்கி அவர் தொடர்ந்து பயணிக்கும் விடாமுயற்சியும் பலருக்கும் உத்வேகம் அளிக்கும்.