கவுண்டமணி ஹீரோ ஆனார், இங்க காமெடி வொர்க் அவுட் ஆகல; நான் நடிக்க வந்த காரணம்; இயக்குனர் சுந்தர்ராஜன் ஓபன் டாக்!

பிரபல திரைப்பட இயக்குனரான சுந்தர்ராஜன், தான் நடிகராக மாறியதற்கான சுவாரஸ்யமான காரணங்களையும், நடிகர் கவுண்டமணியின் திரைப்பயணத்தில் ஏற்பட்ட சில மாற்றங்களையும் சமீபத்தில் இண்டியாக்ளிட்ஸ்க்கு அளித்த பேட்டி ஒன்றில் வெளிப்படையாகப் பகிர்ந்து கொண்டார்.

சுந்தர்ராஜன் இயக்கிய 'பயணங்கள் முடிவதில்லை', 'நான் பாடும் பாடல்', மற்றும் 'வைதேகி காத்திருந்தாள்' ஆகிய வெற்றிப் படங்களில் கவுண்டமணி நடித்திருந்தார். இந்தப் படங்களில் கிடைத்த புகழ், கவுண்டமணியை ஹீரோவாக மாற்றியது. தேவர் ஃபிலிம்ஸ் தயாரிப்பில் வெளியான 'பணம் பத்தும் செய்யும்' திரைப்படத்தில் அவர் கதாநாயகனாக நடித்தார். இதன் பிறகு, சுந்தர்ராஜன் படங்களில் தொடர்ந்து காமெடி கதாபாத்திரங்களில் நடிக்க அவர் தயங்கினார். தனது படங்களில் கவுண்டமணிக்கு கிடைத்த சம்பளம் மற்றும் அந்தஸ்து ஆகியவை, அவர் ஹீரோவாக உயரக் காரணமாக இருந்திருக்கலாம் என்று சுந்தர்ராஜன் தெரிவித்தார்.

கவுண்டமணி விலகியதால், அவருடைய படங்களுக்கு பொருத்தமான நகைச்சுவை நடிகர் கிடைக்கவில்லை. ஜனகராஜ் போன்ற சில நடிகர்களை வைத்து முயற்சி செய்தபோதும், அது தனது எதிர்பார்ப்பை பூர்த்தி செய்யவில்லை என்று சுந்தர்ராஜன் கூறினார். இதுவே, அவரை ஒரு புதிய முடிவை எடுக்கத் தூண்டியது.

‘திருமதி பழனிச்சாமி’ திரைப்படத்தில் நகைச்சுவை நடிகர் பற்றாக்குறை ஏற்பட்டதால், தானே ஒரு பெட்டிக்கடைக்காரர் கதாபாத்திரத்தில் நடிக்கலாம் என்று சுந்தர்ராஜன் முடிவு செய்தார். அவர் எதிர்பாராத விதமாக, அவருடைய நடிப்புக்கு நல்ல வரவேற்பு கிடைத்தது. இதனால், பல தயாரிப்பாளர்கள் அவரைத் தேடி வந்து அடுத்தடுத்த படங்களில் நடிக்க வாய்ப்புகள் கொடுத்தனர்.

சூரியவம்சம் படத்தில் சரத்குமாரின் மாமா கதாபாத்திரத்தில் நடித்து நல்ல வரவேற்பைப் பெற்றார். மம்மூட்டி நடித்த மறுமலர்ச்சி படத்தில் ஒரு முக்கிய கதாபாத்திரத்தில் நடித்து கவனம் ஈர்த்தார். கமல்ஹாசன் நடித்த தாசாவதாரம் படத்தில் ஒரு சிறிய நகைச்சுவை கதாபாத்திரத்தில் நடித்திருந்தார். அம்பாசமுத்திரம் அம்பானி படத்திலும் நகைச்சுவை கலந்த ஒரு குணச்சித்திர வேடத்தில் நடித்தார்.

இயக்கம் என்பது ஒரு கடினமான வேலை என்றும், நடிப்பு என்பது அதற்கு மாறாக ஒரு சுலபமான வேலை என்றும் சுந்தர்ராஜன் இந்த பேட்டியில் குறிப்பிட்டார். தற்போது அவர் 'சிறகடிக்க ஆசை' என்ற சின்னத்திரை தொடரிலும் நடித்து வருவது குறிப்பிடத்தக்கது.