நான் ஹீரோவா நடித்த படத்தில் கூட இந்த அனுபவம் கிடைக்கல; லோகா படத்தின் வசூல் குறித்து துல்கர் சல்மான் நெகிழ்ச்சி!

கடந்த வாரம் மலையாளத்தில் வெளியான லோகா சாப்டர் 1: சந்திரா திரைப்படம், அதன் புதுமையான கதைக்களம் மற்றும் நேர்மறையான பொழுதுபோக்கு காரணமாக ரசிகர்களை ஆச்சரியத்தில் ஆழ்த்தியுள்ளது. இப்படம் ஒரு மாபெரும் வெற்றியை நோக்கி நகர்ந்து கொண்டிருக்கிறது. ஆரம்பத்தில் சுமாரான வசூலுடன் தொடங்கிய இப்படம், விமர்சகர்களின் பாராட்டு மற்றும் பொதுமக்களின் ஆதரவு காரணமாக பெரும் வேகமெடுத்தது.

இந்த செய்தியை ஆங்கிலத்தில் படிக்க இங்கே க்ளிக் செய்யவும்:

தற்போதைய நிலவரப்படி, லோகா சாப்டர் 1: சந்திரா திரைப்படம் இந்தியாவில் மட்டும் ரூ. 46.14 கோடியும், உலக அளவில் ரூ. 101 கோடிக்கு மேலும் வசூலித்து, படக்குழுவுக்கு ஒரு மிகப்பெரிய மைல்கல்லை எட்டியுள்ளது. இதனிடையே, ஹைதராபாத்தில் நேற்று இரவு நடைபெற்ற வெற்றி விழாவில், படத்தின் தயாரிப்பாளரான துல்கர் சல்மான் பேசும்போது, இத்தகைய அமோக வரவேற்பை இன்னும் தன்னால் நம்ப முடியவில்லை என்று கூறியுள்ளார்.

இது குறித்து, சமூக வலைத்தளத்தில் ஒரு பயனர் பகிர்ந்துள்ள வீடியோவில், “உலகம் முழுவதும் உள்ள அனைத்து ரசிகர்களுக்கும், என்ன நடக்கிறது என்பதை நாங்கள் இன்னும் புரிந்துகொள்ள முயற்சிக்கிறோம். ஏனென்றால், எங்களுக்கு  லோகா சாப்டர் 1: சந்திரா எப்போதும் ஒரு சிறிய, உணர்வுபூர்வமான படம். ஒரு மிக மிக விலையுயர்ந்த திரைப்படம் போல் இருந்தது. ஆனால், தற்போது இது, நாடு முழுவதும், உலகம் முழுவதும் உள்ள அனைவரும் அதைப் பற்றி விவாதித்து, கொண்டாடுவது என்பது முன்னெப்போதும் இல்லாத ஒன்று,” என்று அவர் கூறினார்.

தொடர்ந்து, தனது சினிமா பயணத்தைப் பற்றி பேசுகையில், “நான் 40-க்கும் மேற்பட்ட படங்களில் நடித்துள்ளேன், ஆனால் ஒரு ஹீரோவாக என் படங்களில் இதுபோன்ற ஒரு வரவேற்பை நான் பார்த்ததில்லை. எனவே, இந்த அற்புதமான ரசிகர்களுக்கும், லோகா-வை தங்களின் சொந்தப் படம் போல ஏற்றுக்கொண்ட தெலுங்கு ரசிகர்களுக்கும் நன்றி. நீங்கள் என்னை ஏற்றுக்கொண்டது போலவே, இந்தப் படத்தையும் ஏற்றுக் கொண்டீர்கள். நான் இந்த ஊரை சேர்ந்தவன் என்று எப்போதும் உணர்கிறேன், இந்தப் படமும் இந்த ஊரை சேர்ந்தது என்று நினைக்கிறேன்,” என துல்கர் நெகிழ்ச்சியுடன் குறிப்பிட்டார்.

#Lokah - I have done 40+ films as a Hero & I haven't experienced this much response for any of my films as Hero, Lokah has blown across the country & world, Thanks to the audience for making it a huge success ~ dulquer ❤️ pic.twitter.com/iOPFnA4w9H

— ” (@dulQerist) September 3, 2025

கல்யாணி பிரியதர்ஷன் முக்கிய கதாபாத்திரத்தில் நடித்துள்ள இப்படம், ஒரு சர்ச்சையிலும் சிக்கியது. படத்தில் வரும் ஒரு குறிப்பிட்ட வசனம் கன்னட மொழி பேசும் சமூகத்தினரின் உணர்வுகளைப் புண்படுத்தியதாகக் கூறப்பட்டது. இதனால் சமூக வலைத்தளங்களில் கடுமையான விமர்சனங்கள் எழுந்தன. இதற்குப் பதிலளிக்கும் விதமாக, துல்கரின் தயாரிப்பு நிறுவனமான வேஃபேரர் பிலிம்ஸ், பொது மன்னிப்பு கோரி ஒரு அறிக்கையை வெளியிட்டது. மேலும், எதிர்காலத்தில் இத்தகைய தவறுகள் ஏற்படாமல் தவிர்க்கும் வகையில், சர்ச்சைக்குரிய வசனம் நீக்கப்படும் அல்லது திருத்தப்படும் என்றும் உறுதி அளித்தது குறிப்பிடத்தக்கது.