16 வயதில் அறிமுகம், பிரபல நடிகருக்கு மனைவி, காதலி, அம்மா கேரக்டரில் நடித்தவர்; ரஜினி மெகா ஹிட் பட இயக்குனருக்கு சகோதரி!

இந்திய சினிமா உலகில் மிக இளம் வயதிலேயே உச்ச நட்சத்திரமாக ஜொலித்த நடிகைகள் மிகச் சிலரே. இந்தி திரையுலகில், 16 வயதில் 'பாபி' படத்தின் மூலம் அறிமுகமான டிம்பிள் கபாடியாவுக்குச் சமமாக, மலையாள மற்றும் தமிழ்த் திரையுலகில் 16 வயதில் அறிமுகமாகிப் புகழ் பெற்றவர் சாந்தி க்ருஷ்ணா.

1981-ஆம் ஆண்டு பரதன் இயக்கத்தில் வெளியான 'நித்ரா' என்ற மலையாளத் திரைப்படத்தில் தனது 16-வது வயதில் அவர் அறிமுகமானார். மிக இளம் வயதிலேயே அவரது நேர்த்தியான, அதேசமயம் வலிமையான நடிப்புத் திறன் அனைவரையும் கவர்ந்தது. இது அவரது வாழ்க்கையில் ஒரு வெற்றிகரமான பாதைக்கு வழி வகுத்தது. தனது திறமையின் மூலம் மலையாளம் மற்றும் தமிழ் திரையுலகில் தனக்கென ஒரு தனி இடத்தைப் பிடித்தார். சாந்தி க்ருஷ்ணா தனது திரைப் பயணத்தில், மம்முட்டி மற்றும் மோகன்லால் போன்ற தென்னிந்தியாவின் முன்னணி நடிகர்களுடன் இணைந்து பல படங்களில் நடித்துள்ளார்.  

மோகன்லால் நடித்த 'விஷ்ணுலோகம்' திரைப்படத்தில், அவருக்கு ஜோடியாக நடித்த சாந்தி க்ருஷ்ணாவின் நடிப்பு பெரிதும் பாராட்டப்பட்டது. ஆனால், அதே ஆண்டு, 1994-ல், அவர் மோகன்லாலுக்கு மிகவும் மாறுபட்ட இரு வேடங்களில் நடித்தார். சத்யன் அந்திக்காடு இயக்கிய 'பிங்காமி' திரைப்படத்தில் மோகன்லாலின் அம்மாவாகவும், மோகன் இயக்கிய 'பக்ஷே' திரைப்படத்தில் மோகன்லாலின் மனைவியாகவும் நடித்து, தனது பன்முக நடிப்புத் திறனை வெளிப்படுத்தினார்.

'சகோரம்' படத்தில் அவரது சிறப்பான நடிப்பிற்காக, 1994-ஆம் ஆண்டுக்கான சிறந்த நடிகைக்கான கேரள மாநில திரைப்பட விருதை வென்றார். மேலும், ரஜினிகாந்தின் மெகா ஹிட் படமான 'பாபா' மற்றும் 'அழகிய தமிழ் மகன்' போன்ற படங்களை இயக்கிய பிரபல இயக்குநர் சுரேஷ் கிருஷ்ணாவின் சகோதரி என்பதும் குறிப்பிடத்தக்கது. திரைப்படங்களில் வெற்றி கண்ட சாந்தி க்ருஷ்ணாவின் தனிப்பட்ட வாழ்க்கை சவால்கள் நிறைந்ததாகவே இருந்தது. 1980-களில் நடிகர் ஸ்ரீகாந்த் என்பவரைத் திருமணம் செய்துகொண்டார்.

ஆனால், 12 ஆண்டுகள் மட்டுமே நீடித்த இவர்களது உறவு விவாகரத்தில் முடிந்தது. அந்தத் தருணத்தைப் பற்றி அவர் பேசுகையில், “அந்த வயதில் எனக்குக் காதல், திருமணம் எனப் பல கற்பனைகள் இருந்தன. என் குடும்பத்தினர் என் முடிவைக் கேள்வி கேட்டனர், ஆனால் நான் பிடிவாதமாக இருந்தேன். சிலர் மற்றவர்களின் அனுபவத்திலிருந்து கற்றுக்கொள்வார்கள், ஆனால் நான் என் சொந்த அனுபவத்திலிருந்துதான் கற்றுக்கொள்ள வேண்டியிருந்தது,” என்று கூறினார்.

1998-ல், அமெரிக்காவில் தொழிலதிபராக இருந்த பஜோர் சதாசிவன் என்பவரை அவர் மறுமணம் செய்துகொண்டார். இந்தத் தம்பதிக்கு இரண்டு குழந்தைகள் பிறந்தனர். துரதிர்ஷ்டவசமாக, 2016-ஆம் ஆண்டில் இந்தத் திருமணமும் விவாகரத்தில் முடிந்தது. தனது இரண்டாவது திருமணம் குறித்து அவர் பேசும்போது, “காலப்போக்கில் நான் என்னை முற்றிலும் இழந்துவிட்டேன். ஒரு பொம்மை போல, மற்றவர்களின் கட்டளைகளை மட்டுமே பின்பற்றி வாழ்ந்தேன். எனக்குச் சொந்தமாக எந்த வருமானமும் இல்லை, நான் முழுவதுமாக மற்றவர்களைச் சார்ந்திருந்தேன். என் அடையாளத்தை நான் இழந்துவிட்டேன்,” என்று மனம் திறந்து பேசினார்.

தற்போது தனியாக வாழும் சாந்தி க்ருஷ்ணா, தனிமையை ஒருபோதும் தான் விரும்பியதில்லை என்பதை ஒப்புக்கொள்கிறார். “நான் தனியாக இருக்க வேண்டும் என்று ஒருபோதும் விரும்பியதில்லை, ஆனால் என் இரண்டு திருமணங்களும் தோல்வியில் முடிந்துவிட்டன. சில சமயங்களில், அது என் தவறுதானோ என்று எண்ணி வருந்துவேன்,” என்று அவர் குறிப்பிட்டுள்ளார்.