300-க்கு அதிகமான படங்கள்; முதல் படத்துக்கு சம்பளம் ரூ.10: ஸ்ரீதேவிக்கு டஃப் கொடுத்த இந்த நடிகை சூப்பர் ஸ்டார்களுடன் நடித்தவர்!

இந்திய சினிமாவின் முன்னணி நடிகையாகத் திகழ்ந்த ஜெயபிரதா, தனது முதல் படத்தில் பெற்ற 10 ரூபாய் சம்பளத்தில் தொடங்கி, தனது திறமையால் பன்மொழிப் படங்களில் நடித்து வெற்றிப் பட நாயகியாக உயர்ந்தார். இவரது இயற்பெயர் லலிதா ராணி. ஆந்திரப் பிரதேசத்தின் ராஜமுந்திரியில் 1962-ல் பிறந்த இவர், முதலில் மருத்துவராக ஆசைப்பட்டார். ஆனால், விதி அவரை சினிமாவுக்கு அழைத்து வந்தது.

1974-ல் தெலுங்கில் ‘பூமி கோசம்’ படத்தின் மூலம் நடிகையாக அறிமுகமான ஜெயபிரதா, பிறகு கே. விஸ்வநாத் இயக்கிய 'சிரஞ்சீவி' மற்றும் 'சிரி சிரி முவ்வா' போன்ற படங்கள் மூலம் புகழ் பெற்றார். 1979-ல் 'சர்கம்' என்ற ஹிந்தி படத்தின் மூலம் பாலிவுட்டில் நுழைந்து, அமிதாப் பச்சன், தர்மேந்திரா போன்ற முன்னணி நடிகர்களுடன் நடித்து, இந்தி சினிமாவின் தவிர்க்க முடியாத நடிகையானார்.

தமிழில் கமல்ஹாசனுடன் இணைந்து நடித்த 'மன்மத லீலை' மற்றும் 'சலங்கை ஒலி' ஆகிய படங்கள் இவருக்கு தமிழ் ரசிகர்களிடையே பெரும் வரவேற்பைப் பெற்றுத் தந்தன. ரஜினி மற்றும் கமல் நடித்த 'நினைத்தாலே இனிக்கும்' படத்திலும் ஒரு பாடலுக்கு நடனம் ஆடினார். ஜெயபிரதாவின் சினிமா வாழ்க்கையில், நடிகை ஸ்ரீதேவியுடன் கடும் போட்டி நிலவியது. இருவரும் இணைந்து நடித்த 'மக்ஸாத்' போன்ற படங்களில் கூட, தனிப்பட்ட முறையில் இருவரும் பேசிக்கொள்வதில்லை என்று கூறப்பட்டது.

1986-ல் திரைப்படத் தயாரிப்பாளர் ஸ்ரீகாந்த் நஹாட்டாவைத் திருமணம் செய்துகொண்டார். இந்தத் திருமணம் விமர்சனத்துக்குள்ளானது. சினிமாவுக்குப் பிறகு அரசியலில் நுழைந்த ஜெயபிரதா, நாடாளுமன்ற உறுப்பினராகவும் பணியாற்றியுள்ளார். கலை மற்றும் அரசியல் என இரு துறைகளிலும் தனி முத்திரை பதித்தார் ஜெயபிரதா.

ஜெயபிரதா தனது திரைப்பயணத்தில் பல்வேறு விருதுகளைப் பெற்றுள்ளார். சிறந்த நடிகைக்கான பிலிம்பேர் விருதுகளையும், சிறந்த நடிகைக்கான பிலிம்பேர் தென்னிந்திய விருதுகளையும் வென்றுள்ளார்.