படத்தில் எனக்கு ஜோடி இல்ல, உண்மை கதை; திருப்பரங்குன்றம் தான் கதைக்களம்: எச்.ராஜா தகவல்!

‘கந்தன்மலை’ படத்தில் ஹீரோவாக அறிமுகமாகி இருக்கிறார் தமிழக பாஜகவின் மூத்த தலைவர் ஹெச்.ராஜா. அதில் அவருக்கு ஜோடியாக நடிக்கும் ஹீரோயின் குறித்து தகவல் வெளியாகியுள்ளது.

தமிழக பாஜகவில் மூத்த தலைவர்களில் ஒருவராக இருப்பவர் ஹெச்.ராஜா. முன்னாள் எம்எல்ஏவான இவர் தற்போது பாஜகவின் தேசிய செயற்குழு உறுப்பினராக உள்ளார்.

தற்போது அரசியலில் இருந்து சினிமாவுக்குள் அடியெடுத்து வைத்துள்ளார். அவர் நடிக்கும் ‘கந்தன்மலை’ படத்தை வீர முருகன் என்பவர் இயக்குகிறார். சிவ பிரபாகரன் - சந்திரசேகர் ஆகியோர் படத்தை தயாரித்துள்ளனர்.

சில நாட்கள் முன் இந்தப் படத்தின் ஃபர்ஸ்ட் லுக் போஸ்டர் வெளியானது. போஸ்டரில் ஹெச்.ராஜா முறுக்கு மீசை வைத்துள்ளார். கழுத்தில் ருத்ராட்ச மாலை, கையில் ருத்ராட்ச மாலை அணிந்துள்ளார்.

பின்னணியில் கோயிலின் நுழைவு வாயிலில் இருக்கும் கதவு தெரிகிறது. அந்த கதவின் வழியாக ஹெச்.ராஜா கூட்டமாக கோவிலுக்கும் நுழையும் வகையில் இந்த பர்ஸ்ட் லுக் போஸ்டர் வெளியிடப்பட்டது.

இரண்டு போஸ்டர்கள் வெளியாகியுள்ளன. மற்றொரு போஸ்டரில் நாற்காலியில் கழுத்தில் ருத்ராட்ச மாலைகளை அணிந்து கொண்டு உட்கார்ந்துகொண்டிருக்கிறார் ஹெச்.ராஜா.

முருகனின் அறுபடை வீடுகளில் ஒன்றாக திருப்பரங்குன்றம் மலையை தான் கந்தன் மலை என அழைப்பார்கள். அதனடிப்படையில் இந்தப் படம் திருப்பரங்குன்றம் முருகன் மலையை அடிப்படையாக கொண்டு உருவாகி இருப்பதாக கூறப்படுகிறது.

இதற்கிடையே, இந்தப் படம் தொடர்பாக இயக்குநர் வீரமுருகன் அளித்த பேட்டியில் படம் குறித்த தகவல்களை வழங்கினார். அதில், படத்தின் கதை ஹெச்.ராஜா எழுதியது.

அவரின் கதையில் அவரை நடிக்க வைத்தால் தான் மக்களிடம் சேரும் என்பதால் ஹெச்.ராஜாவை ஹீரோவாக நடிக்க வைத்தோம். மக்களை சாதி, மதத்தை காட்டி பிரிவினை செய்வது குறித்த விழிப்புணர்வு ஏற்படுத்தும் வகையில் கதை அமைந்திருக்கிறது.

படம் நிச்சயம் ஒரு சித்தாந்தத்தை பேசும். படத்தில் நடிக்க ஹெச்.ராஜாவுக்கு எந்த பயிற்சியும் கொடுக்கவில்லை. அவரின் மீசை செட் செய்யவே நேரம் எடுத்தது. மற்றபடி, எந்த பயிற்சியும் இல்லாமல் ஹெச்.ராஜா நடித்துச் சென்றார்.

படத்தில் ஹெச்.ராஜாவுக்கு ஒரு குடும்பம் உள்ளது. அவருக்கு ஹீரோயின் இருக்கு. அவருக்கு ஜோடியாக நடிக்க ஒருவரை தேர்வு செய்து வைத்திருந்தோம். ஆனால் படத்தின் ஷூட்டிங் போகும் போது ஹெச்.ராஜா அவரின் மனைவியை அழைத்து வந்தார்.

'ஹீரோயின் கேரக்டரில் வேறு யாரும் நடிக்க வேண்டாம், என் மனைவியே நடிக்கட்டும்' என்று கூறி அவரின் மனைவியை நடிக்க வைத்தார்.

படத்தில் ஹெச்.ராஜாவுக்கு பாடல் இருக்கிறது. சண்டை காட்சிகள் இருக்கிறது. படத்தின் தயாரிப்பாளர் அவர் தான். அவரே சில டயலாக் வேண்டும் என கேட்டு நடித்தார்.

படத்தில் ஃபைட் சீன் இருக்கிறது. இந்தப் படத்தின் போஸ்டர் ரிலீஸ் ஆனதும், ஹெச்.ராஜாவுக்கு பட வாய்ப்புகள் வந்துள்ளன. அடுத்து 2 படங்களில் நடிக்க கமிட் ஆகியிருக்கிறார்." என்று கூறியிருக்கிறார்.