விஜய் முதல் ஷாருக்கான் வரை: முக்கிய நடிகர்களை பின்னுக்கு தள்ளிய அல்லு அர்ஜூன்; புஷ்பா 2 தான் காரணம்!

இந்திய திரையுலகில் தற்போது படங்களில் தயாரிப்பு பணிகளுக்கு ஆகும் செலவை விடவும், நடிகர்களின் சம்பளம் அதிகமாக இருக்கிறது. இதற்கு முக்கிய காரணம், கதையில் கவனம் செலுத்தாமல், நடிகர்களின் இமெஜ் மற்றும் அவர்களின் ரசிகர்களின் பலம் ஆகியவற்றை வைத்து படம் தயாரிக்க தீர்மானிப்பது தான் என்று பொதுவான பேச்சுக்கள் இருக்கிறது. ஒரு நடிகர் ஒரு பெரிய ஹிட் படம் கொடுத்துவிட்டால், அந்த படத்திற்கு வாங்கிய சம்பளத்தை விடவும், அவர் அடுத்து நடிக்கும் படத்திற்கு இரு மடங்காக சம்பளத்தை உயர்த்திவிடுவார்.

அதே சமயம் அவர் ஒரு முன்னணி நடிகராக இருந்தால், அவர் படம் வெற்றி பெறுகிறதோ இல்லையோ, படத்திற்கு படம் அவரது சம்பளம் மட்டும் அதிகரித்துக்கொண்டே இருக்கும். அந்த வகையில், இந்தியாவில் அதிகம் சம்பளம் வாங்கும் நடிகர்களில் பட்டியலில், தளபதி விஜய், பாலிவுட் நடிகர் ஷாருக்கான், தெலுங்கு நடிகர் பிரபாஸ் ஆகியோர் முன்னணியில் இருந்த நிலையில், தற்போது இவர்களை பின்னுக்கு தள்ளி தெலுங்கு நடிகர் ஒருவர் முன்னணியில் வந்துள்ளார். அவர் வேறு யாரும் இல்லை புஷ்பா படத்தின் நாயகன் அல்லு அர்ஜூன் தான்.

தெலுங்கு சினிமாவின் பிரபல தயாரிப்பாளர் அல்லு அரவிந்தின் மகனாக குழந்தை நட்சத்திரமாக அறிமுகமான அல்லு அர்ஜூன், தற்போது தெலுங்கு சினிமாவில் முன்னணி நடிகராக திகழ்கிறார். இவரது நடிப்பில் கடந்த 2021-ம் ஆண்டு புஷ்பா என்ற படம் வெளியானது. பான் இந்தியா படமாக வெளியான இந்த படம் பெரிய வெற்றிப்படமாக அமைந்து வசூலில் சாதனை படைத்தது. இயக்குனர் சுகுமார் இயக்கிய இந்த படத்தில் ராஷ்மிகா மந்தனா நாயகியாக நடித்திருந்தார். பகத் பாசில் ஒரு முக்கிய கேரக்டரில் நடித்திருந்தார்.

தற்போது இந்த படத்தின் 2-ம் பாகம் தயாராகி வரும் நிலையில், புஷ்பா 2: தி ரூல் என்ற இந்த படத்திற்காக அல்லு அர்ஜூன் ரூ300 கோடி ரூபாய் சம்பளம் பெற்றுள்ளதாக தகவல் வெளியாகியுள்ளது. இதன் மூலம், இந்தியாவிலேயே அதிக சம்பளம் வாங்கும் நடிகராக, தளபதி விஜய், ஷாருக்கான், மற்றும் பிரபாஸ் போன்ற நட்சத்திரங்களை பின்னுக்கு தள்ளி அல்லு அர்ஜூன் முதலிடத்தை பிடித்துள்ளார் சுகுமார் இயக்கிய புஷ்பா 1 பெரும் வெற்றி பெற்றது. இதன் தொடர்ச்சியான புஷ்பா 2: தி ரூல் டிசம்பர் 5ஆம் தேதி வெளியாக உள்ளது.

இந்த படத்தில் ராஷ்மிகா மந்தனா ஸ்ரீவல்லியாக மீண்டும் நடிக்கிறார், ஃபஹத் பாசில் ஐபிஎஸ் பன்வர் சிங் ஷெகாவத் வேடத்தில் நடிக்கிறார். நடிகை ஸ்ரீலீலாவும் சிறப்பு நடனமாடியுள்ளதாக தகவல் வெளியாகியுள்ளது.