இன்று இட்லி கடை இசை வெளியீடு: மேடையில் இன்பன் உதயநிதி?

நடிகர், இயக்குநர், பாடலாசிரியர், தயாரிப்பாளர் என்ற பன்முகத்தன்மை கொண்ட நடிகர் தனுஷ் தவிர்க்க முடியாத நடிகராக வலம் வருகிறார். இவர் சினிமாத்துறையில் நுழைந்த ஆரம்ப காலத்தில் இவரது தோற்றத்தை வைத்து பலர் கேலி செய்தனர். ஆனால், திறமை இருக்கும் போது தோற்றம் பெரிய விஷயம் இல்லை என்பது போல் தன் திறமையால் மிக பெரிய உச்சத்தை எட்டியுள்ளார்.

52 படங்கள் நடித்துள்ள தனுஷ், ‘பா.பாண்டி’, ‘ராயன்’, ‘நிலவுக்கு என் மேல் என்னடி கோபம்’ போன்ற படங்களை இயக்கியும் உள்ளார். தற்போது ‘இட்லி’ கடை என்ற படத்தை இயக்கி நடித்துள்ளார். இந்த படத்தில் நித்யா மேனன் கதாநாயகியாக நடித்துள்ளார். இயக்குநர் பார்த்திபர் சிறப்பு தோற்றத்தில்  நடித்துள்ளார். மேலும், அருண் விஜய் , சத்யராஜ் மற்றும் ராஜ்கிரண் ஆகியோர் முக்கிய கதாபாத்திரத்தில் நடிக்கின்றனர். இவர்களின் கதாபாத்திர போஸ்டரை படக்குழு கடந்த சில நாட்களாக வெளியிட்டு வருகிறது.

‘இட்லிகடை’ திரைப்படத்தை ‘டான் பிக்சர்ஸ்’ நிறுவனம் தயாரித்துள்ளது. இந்த படத்திற்கு ஜி.வி.பிரகாஷ் இசையமைக்கிறார். இந்த படத்தின்  பாடல்கள் வெளியாகி ரசிகர்களை வைஃப்பாக்கி வருகிறது. ‘இட்லி கடை’ திரைப்படம் அக்டோபர் 1-ஆம் தேதி திரையரங்குகளில் வெளியாகவுள்ள நிலையில் இப்படத்தின் புரொமோஷன்களில் நடிகர் தனுஷ் அதிகம் கவனம் செலுத்தி வருகிறார். ‘கொடி’ படத்தின் போது புரொமோஷனில் முழு கவனம் செலுத்தியது போன்று ‘இட்லி கடை’ திரைப்படத்தின் புரொமோஷனிலும் தனுஷ் அதிக கவனம் செலுத்த வருவதாக கூறப்படுகிறது.

இசை வெளியீட்டு விழா முடிந்ததும் நடிகர் தனுஷ், மதுரை, கோவை மற்றும் ஹைதராபாத்தில் ப்ரீ ஈவண்ட் நிகழ்ச்சிகளை நடத்த உள்ளதாகவும் இதற்கான பணிகள் மும்முரமாக நடைபெற்று வருவதாகவும் தகவல் வெளியாகியுள்ளது. சமீபத்தில் தனது ரசிகர்களை சந்தித்து நடிகர் தனுஷ் புகைப்படம் எடுத்துக் கொண்டார். இதுவும் புரொமோஷனின் ஒரு யுக்தி என்று சொல்லப்படுகிறது. 

நடிகர் தனுஷ் தமிழ், இந்தி என பல மொழிகளில் பல படங்கள் கமிட்டான நிலையில் தற்போது ‘இட்லிகடை’ புரொமோஷனுக்காக அந்த படத்தின் கால்ஷீட்களை எல்லாம் தள்ளி வைத்திருப்பதாகவும் கூறப்படுகிறது. ‘இட்லி கடை’ திரைப்படத்தின் தமிழ்நாடு வெளியீட்டு உரிமையை ரெட் ஜெயண்ட் மூவிஸ் சார்பில் உதயநிதி பெற்றுள்ளார் என்று எதிர்பார்க்கப்பட்ட நிலையில் அனைவருக்கும் ஆச்சர்யத்தை ஏற்படுத்தும் வகையில் அவரது மகன் இன்பநிதி பெற்றுள்ளதாக அறிவிப்பு வெளியானது.  

திரைத்துறையில் அடியெடுத்து வைக்கும் இன்பநிதிக்கு நடிகர் தனுஷ் தனது வாழ்த்துகளையும் தெரிவித்திருந்தார். இந்நிலையில், ‘இட்லி கடை’ திரைப்படத்தின் இசை வெளியீட்டு விழா குறித்த அதிகாரப்பூர்வ அறிவிப்பு வெளியாகியுள்ளது. அதன்படி, இப்படத்தின் இசைவெளியீட்டு விழா சென்னை நேரு ஸ்டேடியத்தில் இன்று மாலை 5 மணிக்கு நடைபெறவுள்ளது.  இந்த அறிவிப்பை கேட்ட ரசிகர்கள் உற்சாகத்தில் உள்ள நிலையில் இந்த இசைவெளியீட்டு விழா இன்பநிதிக்கு அறிமுக விழாவாக இருக்கும் என்று சினிமா வட்டாரங்கள் தெரிவிக்கின்றன.

Murugan #IdliKadaipic.twitter.com/k1hwoK4XVa

— Dhanush (@dhanushkraja) September 13, 2025