குட் பேட் அக்லி முதல் தி டிப்ளோமேட் வரை: இந்த வாரம் ஒடிடி தளத்தில் வெளியாகும் த்ரில்லர் படங்கள்!

ஒவ்வொரு வாரமும் திரையரங்குகளில் வெளியாகும் படங்களை போல் ஒடிடி தளங்களில் வெளியாகும் படங்களுக்கும் ரசிகர்கள் மத்தியில் நல்ல வரவேற்பும் எதிர்பார்ப்பும் இருந்து வருகிறது. அந்த வகையில், இந்த வாரம் மே 9, 2025 அன்று பல சுவாரஸ்யமான திரைப்படங்கள் மற்றும் தொடர்கள் பல்வேறு ஒடிடி தளங்களில் வெளியாகவுள்ளன. அவற்றில் சில முக்கியமான படங்களைப் பற்றி இங்கே பார்க்கலாம்:

தி ராயல்ஸ் (The Royals): பூமி பெட்னேகர் மற்றும் இஷான் கட்டார் நடிப்பில் உருவாகியுள்ள இந்த ரொமாண்டிக் காமெடி நாடகத் தொடர் நெட்ஃபிலிக்ஸில் வெளியாகிறது. இளவரசர் அவிராஜ் சிங் மற்றும் சுயம்புவான தொழில்முனைவோர் சோஃபியா சேகர் ஆகியோரின் எதிர்பாராத காதல் கதையை மையமாக வைத்து இந்த படத்தின் திரைக்கதை அமைக்கப்பட்டுள்ளது. அழிந்து வரும் மோர்பூர் அரண்மனையின் பாரம்பரியத்தை சோஃபியா காப்பாற்ற வேண்டிய சூழ்நிலையில், இருவரும் சந்திக்கிறார்கள். அதற்குப் பிறகு என்ன நடக்கிறது என்பது தான் இந்த படத்தின் திரைக்கதை.

கிராம் சிகித்ஸாலய் (Gram Chikitsalay): 'பஞ்சாயத்' புகழ் இயக்குனர்கள் இயக்கியுள்ள இந்த நகைச்சுவைத் தொடர் அமேசான் ப்ரைம் வீடியோவில் வெளியாகிறது. தொலைதூர கிராமமான பத்ஹ்கண்டியில் நடக்கும் கதையில், இளம் மற்றும் இலட்சிய மருத்துவர் டாக்டர் பிரபாத் கிராமத்தின் சேதமடைந்த ஆரம்ப சுகாதார நிலையத்தை புதுப்பிக்க முயற்சிக்கிறார். ஆனால், போலி மருத்துவர் சேதக் குமார் அவருக்கு மிகப்பெரிய சவாலாக இருக்கிறார். டாக்டர் பிரபாத் தனது இலக்கை அடைந்தாரா என்பது தான் மீதிக்கதை.

தி டிப்ளோமேட் (The Diplomat): திரையரங்குகளில் வெற்றி பெற்ற இந்த அரசியல் திரில்லர் திரைப்படம் நெட்ஃபிலிக்ஸில் வெளியாகிறது. பாகிஸ்தானில் உள்ள இந்திய துணைத் தூதர் ஜே.பி. சிங் என்பவரின் வாழ்க்கையைத் தழுவி எடுக்கப்பட்ட இந்த படத்தில், ஜான் ஆபிரஹாம் முக்கிய கதாபாத்திரத்தில் நடித்துள்ளார். உஸ்மா அகமது என்ற இந்தியப் பெண் பாகிஸ்தானிய கணவனிடமிருந்து தப்பித்து இந்தியா திரும்ப உதவ வேண்டிய சூழ்நிலையில் தூதர் பல்வேறு சவால்களை எதிர்கொண்டு எப்படி பிரச்னையை தீர்க்கிறார் என்பது தான் இந்த படத்தின் கதை.

போகுருபி (Bohurupi): பெங்காலி மொழியில் உருவாகியுள்ள இந்த ஆக்ஷன் திரில்லர் திரைப்படத்தை நந்திதா ராய் மற்றும் ஷிபோப்ரோசாத் முகர்ஜி இயக்கியுள்ளனர். தவறாக குற்றம் சாட்டப்பட்டு சிறையில் அடைக்கப்பட்ட பிக்ரம் பிரமானிக் என்ற பல வேடம் அணிபவனின் கதையை இந்த படம் சித்தரிக்கிறது. சிறையில் ஏற்பட்ட கொடுமைகளால் பழிவாங்க துடிக்கும் அவன், தொடர்ச்சியாக வங்கிக் கொள்ளைகளில் ஈடுபட்டு தப்பிக்கிறான். அவன் பிடிபடுவானா என்பது தான் இந்த படத்தின் மீதிக்கதை.

குட் பேட் அக்லி (Good Bad Ugly): அஜித் குமார் நடிப்பில் உருவாகியுள்ள இந்த தமிழ் ஆக்ஷன் காமெடி திரைப்படம் நெட்ஃபிலிக்ஸில் வெளியாகிறது. ரெட் டிராகன் என்ற பயமற்ற தாதா ஏ.கே., தனது குடும்பத்திற்காக குற்ற உலகை விட்டு விலகுகிறார். ஆனால், அவரது கடந்த காலம் அவரைத் துரத்துகிறது. தனது மகனைப் பாதுகாக்க அவர் மீண்டும் ஆயுதம் ஏந்துகிறார் இதனால் அடுத்து அவர் சந்திக்கும் பிரச்னைகள் என்ன என்பதை பற்றி திரைக்கதை அமைக்கப்பட்டுள்ள இந்த படம்,  மே 8ஆம் தேதி வெளியாகிறது.

அஸ்திரம் (Asthram): ஷாம், அரௌல் டி ஷங்கர் மற்றும் நிழல்கள் ரவி ஆகியோர் முக்கிய கதாபாத்திரங்களில் நடித்துள்ள திரைப்படம் 'அஸ்திரம்'. மருத்துவ விடுப்பில் இருக்கும் இன்ஸ்பெக்டர் அகிலன், தொடர்ச்சியாக நிகழும் வினோதமான தற்கொலைகளை விசாரிக்கத் தொடங்குகிறார். ஒவ்வொருவரும் பொதுவெளியில் தங்களைத்தானே கத்தியால் குத்திக்கொண்டு இறக்கிறார்கள். இளம் அதிகாரி சுமந்துடன் இணைந்து அகிலன் விசாரிக்கையில், இறந்தவர்கள் அனைவரும் சதுரங்க வீரர்கள் என்பது தெரிய வருகிறது. ஒரு மர்மமான புத்தகம் மற்றும் பழங்கால தற்கொலை சடங்குகள் இந்த வழக்கில் முக்கிய பங்கு வகிக்கின்றன. வழக்கு வெளிவரும்போது, புதிய திடுக்கிடும் உண்மைகள் வெளிச்சத்திற்கு வருகின்றன. இந்த திரில்லர் திரைப்படத்தை ஆஹா (Aha) ஒடிடி தளத்தில் பார்க்கலாம்.

ல்தகா சைஆ (Il Thaka Saiaa): சதா நாடார் மற்றும் மோனிகா செலினா ஆகியோர் இணைந்து இயக்கி நடித்துள்ள திரில்லர் திரைப்படம் 'இல் தாகா சையா'. ராம் என்ற புதுமணத் தம்பதி ஒரு அரண்மனைக்கு குடிபெயர்ந்த பிறகு அவனது வாழ்க்கை இருளடையத் தொடங்குகிறது. அவனுக்கு வரும் பயங்கரமான கனவுகள் நிஜமாக ஆரம்பிக்கின்றன. இதனால் அவர்களது திருமண வாழ்க்கையில் பதற்றம் ஏற்படுகிறது. திகிலூட்டும் தேஜா வூ (déjà vu) தருணங்கள் அதிகரிக்க, ராமின் நடத்தை விசித்திரமாக மாறுகிறது. வளரும் மர்மம் அவனது மனைவியை அவனிடமிருந்து விலக்குகிறது. தனிமையில் விடப்பட்ட ராம், இந்த வினோதமான நிகழ்வுகளின் பின்னணியில் உள்ள உண்மையை வெளிக்கொணர புறப்படுகிறான். இந்த படத்தை டெண்ட்கொட்டா (Tentkotta) ஒடிடி தளத்தில் பார்க்கலாம்.

இவை மட்டுமல்லாமல், வின்ஸ் வான் நடித்துள்ள நகைச்சுவை திரைப்படம் 'நான்னாஸ்' (Nonnas), ஜூடி ப்ளூமின் நாவலை அடிப்படையாகக் கொண்ட காதல் நாடகத் தொடர் 'ஃபாரெவர்' (Forever), ஸ்பானிஷ் ரொமாண்டிக் டிராமா 'பேட் இன்ஃப்ளுயன்ஸ்' (Bad Influence), ஆவணப்படம் 'எ டெட்லி அமெரிக்கன் மேரேஜ்' (A Deadly American Marriage) மற்றும் கார் பந்தய ஆவணத்தொடர் 'நாஸ்கார் ஃபுல் ஸ்பீட் சீசன் 2' (NASCAR Full Speed Season 2) போன்ற பல சுவாரஸ்யமான திரைப்படங்கள் இந்த வாரம் ஒடிடி தளங்களில் வெளியாக உள்ளது.