துருக்கி கட்டமைப்பு, ரூ32 கோடி மதிப்பு; விராட் - அனுஷ்கா ஹாலிடே பங்களாவில் இத்தனை வசதியா?

மும்பைக்கு அருகிலுள்ள அழகிய கடற்கரை நகரமான அலிபாக், இப்போது இந்தியாவின் பணக்காரர்கள் மற்றும் பிரபலங்களின் மிகவும் விரும்பப்படும் விடுமுறை இடமாக மாறியுள்ளது. ஷாருக்கான், கௌரி கான், தீபிகா படுகோன், ரன்வீர் சிங் போன்ற பல நட்சத்திரங்கள் இங்கு சொகுசு பங்களாக்களை வைத்துள்ளனர். இந்த பட்டியலில், இந்திய கிரிக்கெட் அணியின் முன்னாள் கேப்டன் விராட் கோலி மற்றும் அவரது மனைவி, பாலிவுட் நடிகை அனுஷ்கா சர்மா ஆகியோரும் இணைந்துள்ளனர்.

இந்த செய்தியை ஆங்கிலத்தில் படிக்க இங்கே க்ளிக் செய்யவும்

சமூக வலைத்தளங்களில் விராட் - அனுஷ்காவின் அலிபாக் விடுமுறை இல்லத்தின் அழகான காட்சிகள் அவ்வப்போது வெளியாகி, ரசிகர்களை வியப்பில் ஆழ்த்தி வருகின்றன. விராட் மற்றும் அனுஷ்கா மும்பையிலிருந்து அலிபாக்கிற்கு படகில் செல்வதையும் அடிக்கடி காணலாம். இந்த அதிநவீன விடுமுறை இல்லத்திற்குள் ஒரு சிறிய பயணத்தை மேற்கொள்வோம்.

பிரம்மாண்ட வடிவமைப்பும் இயற்கை பொருட்களின் அழகும்

ஆர்கிடெக்சரல் டைஜஸ்ட் (Architectural Digest) கூற்றுப்படி, விராட்-அனுஷ்காவின் இந்த இல்லம் புகழ்பெற்ற சர்வதேச கட்டிடக்கலை நிறுவனமான ஸ்டீபன் அன்டோனி ஓல்ம்ஸ்டால் ட்ரூன் ஆர்கிடெக்ட்ஸ் (SAOTA) நிறுவனத்தால், பிலிப் ஃபோச்செ (Phillippe Fouche) தலைமையில் கட்டப்பட்டுள்ளது. 10,000 சதுர அடி பரப்பளவில் கட்டப்பட்டுள்ள இந்த ஆடம்பர வில்லா, பெரும்பாலும் இயற்கை பொருட்களால் ஆனது. பாறைக் கற்கள், விலையுயர்ந்த இத்தாலிய பளிங்குகள், ராவ் ட்ராவெர்டைன்ஸ் மற்றும் துருக்கிய சுண்ணாம்பு கற்கள் ஆகியவை வீட்டின் மதிப்பை அதிகரிக்கும் வகையில் பரவலாக பயன்படுத்தப்பட்டுள்ளன.

நான்கு படுக்கையறைகள் மற்றும் நான்கு குளியலறைகள் கொண்ட இந்த வில்லா, கலிபோர்னியா கொங்கன் (California Konkan) பாணியில் வடிவமைக்கப்பட்டுள்ளது. மர வேலைப்பாடுகள் மற்றும் பளிங்கு கற்களின் பயன்பாடு இந்த வீட்டிற்கு ஒருவித மண்ணின் மணத்தை அளிக்கிறது. மேலும், ஒரு பவுடர் ரூம் அற்புதமான பிங்க் ஓனிக்ஸ் மார்பிளால் அலங்கரிக்கப்பட்டுள்ளது, இது வீட்டின் அழகிற்கு மேலும் மெருகூட்டுகிறது.

இயற்கை ஒளியும் பசுமையும் நிறைந்த இல்லம்

இந்த இல்லம் உயரமான கூரைகள் மற்றும் திறந்தவெளி வடிவமைப்பைக் கொண்டுள்ளது. இதன் அனைத்து தளங்களிலும் இயற்கை மர வேலைப்பாடுகள் காணப்படுகின்றன. முடிந்தவரை அதிக இயற்கை ஒளியை வீட்டிற்குள் கொண்டு வர வேண்டும் என்ற நோக்கத்துடன் இந்த வீடு கட்டப்பட்டுள்ளது. ஏடி-க்கு (AD) அளித்த ஒரு பேட்டியில் விராட் கோலி, "மிகவும் சுவாரஸ்யமான அம்சம் என்னவென்றால், லிவிங் அறையில் உள்ள இரட்டை உயர கூரை, அது இயற்கை ஒளியை வரவேற்கிறது. அதிக ஒளி... அதன் ஆற்றல் சிறந்தது" என்று குறிப்பிட்டுள்ளார்.

இந்த வில்லாவில் வெப்பநிலை கட்டுப்படுத்தப்பட்ட நீச்சல் குளம், கஸ்டமைஸ் செய்யப்பட்ட சமையலறை, ஜாகுஸி, பரந்த தோட்டம், உள்ளக பார்க்கிங், பணியாளர் குடியிருப்புகள் மற்றும் பல அம்சங்கள் உள்ளன. இந்த வீடு தொழில்நுட்ப ரீதியாகவும் மிகவும் புத்திசாலித்தனமாக கட்டப்பட்டுள்ளது. சர்காடியன் லைட்டிங் (circadian lighting), எரிவாயு கசிவு கண்டுபிடிப்பான்கள் (gas leak detectors), மற்றும் காற்று மற்றும் நீர் வடிகட்டுதல் (air and water filtration) போன்ற பல வசதிகளை ஒரு அப்ளிகேஷன் மூலம் கட்டுப்படுத்தலாம்.

நீச்சல் குளத்திற்கு அருகில் பசுமையான சூழலுடன் கூடிய ஒரு தாழ்வாரம் உள்ளது. இது அனுஷ்கா மற்றும் விராட்டின் தாவரங்கள் மற்றும் விலங்குகள் மீதான உள்ளார்ந்த காதலுக்கு ஒரு சிறந்த எடுத்துக்காட்டாக உள்ளது. மேலும், லிவிங் அறையிலும் பல உட்புற தாவரங்கள் உள்ளன, அவை வீட்டிற்கு ஒரு அழகான காடு கருப்பொருளை சேர்க்கின்றன. தோட்டத்தில் உள்ள சாப்பாட்டு அறை விராட் கோலியின் விருப்பமான பகுதியாகும். "நான் ஒருபோதும் விடுமுறையில் இருப்பதில்லை. நான் எப்போதும் ஒரு குறிப்பிட்ட உணவு முறையிலும், காலை முதல் இரவு வரை ஒரு குறிப்பிட்ட பயிற்சி வழக்கத்திலும் இருப்பேன். இங்கு, நான் எழுந்ததும், ஓய்வெடுத்து, நிதானமாக, எலுமிச்சை நீர், ஒரு கப் காபி குடித்து, புத்துணர்ச்சியுடன் மீண்டும் தொடங்குவேன்," என்று அதே நேர்காணலில் விராட் கோலி வெளிப்படுத்தினார்.

விராட் கோலி-அனுஷ்கா சர்மாவின் அலிபாக் வீட்டின் செலவு

விராட் – அனுஷ்கா தம்பதியின் விடுமுறை இல்லம் 8 ஏக்கர் நிலப்பரப்பில் கட்டப்பட்டுள்ளது. இதை அவர்கள் 2022 இல் சுமார் 19 கோடி ரூபாய்க்கு வாங்கினர். தகவல்களின்படி, இந்த சொத்தின் கட்டுமானத்திற்காக விராட் சுமார் 10.5 கோடி முதல் 13 கோடி ரூபாய் வரை முதலீடு செய்துள்ளார். தற்போது இந்த வீட்டின் மதிப்பு 32 கோடி ரூபாய் என்று கூறப்படுகிறது.

ஒரு விடுமுறை இல்லத்தை கட்டியதன் பின்னணியில் தம்பதியின் நோக்கம், எந்த திட்டமும் இல்லாமல் ஓய்வெடுப்பதுதான். அதனால்தான் அவர்கள் வழக்கமாக வார இறுதி நாட்களை அங்கு செலவிட்டு மும்பைக்கு திரும்புகிறார்கள். இது குறித்து விராட்கோலி ஒரு பேட்டியில், "நான் ஒருபோதும் விடுமுறையில் இருப்பதில்லை. எப்படி ஓய்வெடுப்பது என்று எந்த திட்டமும் இல்லை. எதுவும் செய்யாமல் இருப்பது போதுமானது" என்று கூறியிருந்தார். அலிபாக்கில் உள்ள இந்த வீடு அவர்களுக்கு புத்துணர்ச்சி அளிக்கவும், இயற்கையில் மூழ்கவும் உதவுகிறது.

விராட் கோலி மற்றும் அனுஷ்கா சர்மா மும்பையில் சுமார் 7,171 சதுர அடி பரப்பளவு கொண்ட ஒரு வீட்டில் வசிக்கின்றனர், இதன் மதிப்பு 34 கோடி ரூபாய். கோலிக்கு குருகிராமில் 80 கோடி ரூபாய் மதிப்புள்ள பங்களாவும் உள்ளது. தற்போது, தங்கள் குழந்தைகள் வாமிகா மற்றும் அகாவுடன் தனிப்பட்ட வாழ்க்கையை வாழ, வெளிச்சத்தில் இருந்து விலகி, லண்டனின் நாட்டிங் ஹில் பகுதிக்கு குடிபெயர்ந்துள்ளதாக கூறப்படுகிறது.