ஜான்வி கபூர் பெயரில் ப்ளு டிக் ட்விட்டர் கணக்கு: நிஜமா, போலியா?

சமூக ஊடகங்கள் ஆதிக்கம் செலுத்தும் உலகில், பல பிரபலங்கள் போலி கணக்குகளுக்கு இலக்காகிறார்கள். நடிகை ஜான்வி கபூர் சமீபத்தில் இதுபோன்ற ஒரு பிரச்சினைக்கு ஆளானார், அவரது பெயரில் ஏராளமான போலி ட்விட்டர் கணக்குகள் வெளிவந்தன. இருப்பினும், அவரது செய்தித் தொடர்பாளர் அவை போலி கணக்குகள் என்று தெரிவித்தார். 

மறைந்த நடிகை ஸ்ரீதேவியின் மகளான ஜான்வி கபூர் பாலிவுட்டில் ஹீரோயினாக நடித்து வருகிறார். ஜான்வி கபூர் கடைசியாக மிஸ்டர் அண்ட் மிஸஸ் மஹி படத்தில் ராஜ்குமார் ராவுடன் நடித்தார். அடுத்து, புராண இதிகாசமான கர்ணன் மற்றும் ஜூனியர் என்.டி.ஆருக்கு ஜோடியாக தேவராவில் ஜான்வி கபூர் நடிக்கிறார். உலாஜ், ராம் சரண் உடன் RC16, மற்றும் வருண் தவானுக்கு ஜோடியாக கரண் ஜோஹரின் சன்னி சன்ஸ்காரி கி துளசி குமாரி போன்ற படங்களிலும் ஜான்வி கபூர் நடித்து வருகிறார்.

இந்தநிலையில் சமூக ஊடகத்தளமான எக்ஸ் பக்கத்தில் ஜான்வி கபூர் பெயரில் ப்ளூ டிக் (அதிகாரப்பூர்வ கணக்கு என்பதற்கான குறியீடு) உடன் ஒரு கணக்கு செயல்பட்டு வந்தது. இந்தநிலையில், அந்த கணக்கு போலி என்று ஜான்வி கபூர் தரப்பில் தெரிவிக்கப்பட்டுள்ளது.

சமூக ஊடகங்களில் ஜான்வி கபூரின் பெயரைப் பயன்படுத்தி பல கணக்குகள் வெளிவந்தன, உண்மையில், ஜான்வியின் இந்த போலி கணக்குகளில் சிலவற்றில் சரிபார்ப்பு பேட்ஜ்கள் இருந்தன. அவை உண்மையானவை என்று ரசிகர்களை தவறாக வழிநடத்துகின்றன என்று ஜான்வி கபூர் தரப்பு ரசிகர்களை எச்சரித்துள்ளது. 

திங்களன்று, ஜான்வியின் செய்தித் தொடர்பாளர் இந்த பிரச்சினை குறித்து பேசி குழப்பத்தை நீக்கினார். ஜான்வி கபூரின் செய்தித் தொடர்பாளர் ஒரு அறிக்கையில், “டிஜிட்டல் உலகில், யாருடைய பெயரிலும் கணக்கை உருவாக்குவது மிகவும் எளிதானது. ஜான்வி கபூருக்கு ட்விட்டரில் அதிகாரப்பூர்வ கணக்கு இல்லை என்பதை இது தெளிவுபடுத்துவதாகும். இந்த போலி கணக்குகள் மூலம் வழங்கப்பட்ட எந்த தகவலையும் பயன்படுத்துவதைத் தவிர்க்கவும். உங்கள் புரிதலுக்கும் ஒத்துழைப்பிற்கும் நன்றி,” என்று தெரிவித்துள்ளார்.

சமூக ஊடகங்களுக்கு வரும்போது, ஜான்வி தனது தனிப்பட்ட மற்றும் திரைப்பட வாழ்க்கையைப் பற்றி தனது ரசிகர்களுக்குத் தெரிவிக்க இன்ஸ்டாகிராமை (Instagram) மட்டும் பயன்படுத்தி வருகிறார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“