'குட் பேட் அக்லி' இளையராஜா பாடல்களுக்கு இடைக்கால தடை; அஜித் படத்துக்கு ஐகோர்ட் வைத்த செக்!

இசையமைப்பாளர் இளையராஜா தொடர்ந்த வழக்கில், அஜீத் குமார் நடித்த 'குட் பேட் அக்லி' (GBU) திரைப்படத்தைத் திரையிட, வெளியிட, விநியோகிக்க அல்லது ஒளிபரப்ப மைத்திரி மூவி மேக்கர்ஸ் நிறுவனத்திற்கு சென்னை உயர் நீதிமன்றம் தடை விதித்துள்ளது. இந்தத் திரைப்படத்தில் இளையராஜா இசையமைத்த மூன்று பாடல்கள் அனுமதியின்றி பயன்படுத்தப்பட்டதாகக் கூறப்பட்ட புகாரின் பேரில் இந்தத் தடை உத்தரவு பிறப்பிக்கப்பட்டுள்ளது.

திங்கட்கிழமை (செப்டம்பர் 8, 2025) நீதிபதி என். செந்தில்குமார், இந்தத் தடை உத்தரவை பிறப்பித்தார். இசையமைப்பாளர் இளையராஜா தாக்கல் செய்த வழக்கு விசாரணையின் போது, தயாரிப்பு நிறுவனம் அளித்த பதில் திருப்தியளிக்காததால் இந்த இடைக்காலத் தடை விதிக்கப்பட்டுள்ளது. இசையமைப்பாளர் இளையராஜா, 'குட் பேட் அக்லி' திரைப்படத்தின் தயாரிப்பு நிறுவனமான மைத்திரி மூவி மேக்கர்ஸ் நிறுவனத்திற்கு, ஏப்ரல் 11, 2025 அன்று ஒரு சட்ட அறிவிப்பை அனுப்பியுள்ளார்.

அதில், 1996 ஆம் ஆண்டு வெளிவந்த 'நாட்டுப்புறப் பாட்டு' திரைப்படத்தில் இடம்பெற்ற "ஒத்த ரூபா தாரேன்", 1982 ஆம் ஆண்டு வெளியான 'சகலகலா வல்லவன்' திரைப்படத்தில் இடம்பெற்ற "இளமை இதோ இதோ", மற்றும் 1986 ஆம் ஆண்டு வெளியான 'விக்ரம்' திரைப்படத்தில் இடம்பெற்ற "என் ஜோடி மஞ்சக் குருவி" ஆகிய மூன்று பாடல்களின் காப்புரிமை தன்னிடமே உள்ளது என்றும், தனது அனுமதி இல்லாமல் இந்த பாடல்களை திரைப்படத்தில் பயன்படுத்தக் கூடாது என்றும் குறிப்பிட்டிருந்தார்.

இந்த சட்ட அறிவிப்பிற்கு மைத்திரி மூவி மேக்கர்ஸ் நிறுவனம் ஏப்ரல் 28, 2025 அன்று அளித்த பதிலில், தங்களுக்குத் தேவையான அனுமதி கிடைத்துவிட்டது என்று மட்டும் குறிப்பிட்டுள்ளது. ஆனால், யாரிடம் அனுமதி பெறப்பட்டது என்பது குறித்த எந்தவொரு விவரத்தையும் அந்தப் பதிலில் தெரிவிக்கவில்லை. இதனால், இளையராஜாவின் காப்புரிமை மீறப்பட்டுள்ளதாக நீதிபதி உறுதி செய்தார். இளையராஜா தனது மனுவில், தான் ஒரு இசையமைப்பாளர், நடத்துனர், பாடலாசிரியர் மற்றும் பாடகர் என்றும், 'மாஸ்ட்ரோ' மற்றும் 'இசைஞானி' என்ற பட்டங்களைப் பெற்றவர் என்றும் குறிப்பிட்டுள்ளார்.

மேலும், மேற்கூறிய மூன்று பாடல்களின் காப்புரிமை தன்னிடமே இருப்பதாகவும், தனது எழுத்துப்பூர்வமான ஒப்புதல் இல்லாமல் பாடல்களைப் பயன்படுத்தியது காப்புரிமை சட்டம் 1957-க்கு முற்றிலும் எதிரானது என்றும் குற்றம் சாட்டினார். இந்த வழக்கை விசாரித்த நீதிபதி, தயாரிப்பு நிறுவனத்தின் பதிலில் சரியான விளக்கம் இல்லாததால், இளையராஜாவின் கோரிக்கையை ஏற்று, இந்த இடைக்காலத் தடையை பிறப்பித்தார். இதன் மூலம், 'குட் பேட் அக்லி' திரைப்படம் மற்றும் அதில் இடம்பெற்ற பாடல்களை எந்தவொரு தளத்திலும் திரையிடவோ, விநியோகிக்கவோ, ஒளிபரப்பவோ மைத்திரி மூவி மேக்கர்ஸ் நிறுவனத்திற்குத் தடை விதிக்கப்பட்டுள்ளது.