எனக்கு வேண்டாம், நான் நடிக்கல... தேவர் மகன் கதையில் நடிக்க மறுத்த சிவாஜி; ஒற்றை வார்த்தையில் செக் வைத்த கமல்!

தேவர் மகனைப் போலச் சர்ச்சைகளையும் பாராட்டுகளையும் ஒருசேர அதிகம் சம்பாதித்த இன்னொரு தமிழ்த் திரைப்படம் இருக்குமா என்று தெரியவில்லை. ‘தமிழ் சினிமாவில் மிக மிக நேர்த்தியாக எழுதப்பட்ட திரைக்கதைகளுள் முக்கியமானது தேவர் மகன்’ என்று அடிக்கடி பாராட்டுபவர் இயக்குநர் மிஷ்கின். பல இளம் இயக்குநர்களுக்குக் கூட இந்தப் படத்தின் திரைக்கதை ஒரு முக்கியமான பாடமாக இருக்கிறது.

இதன் மறுபுறத்தில் இதன் மீதான விமர்சனங்களும் கடுமையாக இருக்கின்றன. தென்மாவட்டங்களில் சாதிய வன்முறைகள் நிகழ்ந்ததற்கு ‘தேவர் மகன்’ ஒரு முக்கிய காரணியாக இருந்ததாகக் குற்றம் சாட்டப்படுகிறது. சாதியப் பெருமிதத்தைப் பேசிய படம், தமிழ் சினிமாவில் அரிவாள் கலாசாரத்தைத் துவக்கி வைத்த படம் என்றெல்லாம் கடுமையாக விமர்சிக்கப்படுகிறது.

தூவலூர் என்கிற கிராமம். அங்குள்ள இரண்டு பங்காளிக் குடும்பங்களுக்கு இடையே நீண்ட கால பரம்பரை விரோதம். மூத்தவரான பெரிய தேவர் சாதிப் பெருமிதம் கொண்டிருந்தாலும் ஊர் நலனைப் பிரதானமாக எண்ணுபவர். சாதிப் பாரபட்சமில்லாமல் மக்களை அணுகுகிறவர். ஆனால் இளையவரான சின்னச்சாமி தேவர் இதற்கு நேரெதிர். அண்ணன் மீதுள்ள பகைதான் இவருக்கு முக்கியம். இவரது மகனான மாயன், தந்தையை விடவும் சாதிய வெறி அதிகம் கொண்டவன். சாதியப் பெருமிதத்திற்காகவும் பங்காளிப் பகைக்காகவும் எந்த அழிவையும் செய்யத் துணிபவன்.

பெரிய தேவரின் மகன் சக்திவேல். லண்டனில் படித்து விட்டு தற்காலிகமாகத் தங்கும் நோக்கில் கிராமத்திற்கு வருகிறான். தனது காதலியைத் தந்தையிடம் அறிமுகப்படுத்தி திருமணத்திற்குச் சம்மதம் வாங்கி விட்டு அங்கிருந்து உடனே கிளம்பி விடுவதுதான் அவனது திட்டம். பெருநகரத்தில் தொடர் உணவகம் அமைக்கும் கனவுடன் இருக்கிறான். கிராமத்தில் நிகழும் சாதிய வன்முறைகளைக் கட்டோடு வெறுக்கிறான்.