கோடிகளை குவிக்கும் கூலி... 10- வது நாளில் வசூல் இவ்வளவா?

நடிகர் ரஜினிகாந்தின் நடிப்பில், இயக்குநர் லோகேஷ் கனகராஜ் இயக்கத்தில் உருவாகியுள்ள 'கூலி' திரைப்படம், ஆகஸ்ட் 14ஆம் தேதி சுதந்திர தின விடுமுறையை முன்னிட்டு வெளியானது. இந்த பிரம்மாண்டப் படத்தில் ரஜினிகாந்துடன், அமீர்கான் சிறப்புத் தோற்றத்திலும், நாகார்ஜுனா, சத்யராஜ், உபேந்திரா, செளபின் சாஹிர், ஸ்ருதிஹாசன் என மிகப்பெரிய நட்சத்திரப் பட்டாளமே இணைந்துள்ளது. சன் பிக்சர்ஸ் நிறுவனம் தயாரித்த இந்தப் படத்துக்கு, அனிருத் இசையமைக்க, கிரிஷ் ஒளிப்பதிவு செய்துள்ளார்.

இந்த திரைப்படம் கலவையான விமர்சனங்களைப் பெற்றபோதிலும், 'கூலி' படம் ரசிகர்களின் ஆதரவுடன் தொடர்ந்து முன்னேறி வருகிறது. வார நாட்களில் ஓரளவு கூட்டம் இருந்த நிலையில், தற்போது விடுமுறை நாட்கள் வரத் தொடங்கியதும் ரசிகர்களின் கூட்டம் மீண்டும் அதிகரித்துள்ளது. குறிப்பாக, விடுமுறை தினமான சனிக்கிழமை அன்று திரையரங்குகளில் மக்கள் கூட்டம் அலைமோதியது.

'கூலி' திரைப்படம் வெளியான முதல் 7 நாட்களில் இந்தியா முழுவதும் ரூ.229.65 கோடி வசூல் செய்து சாதனை படைத்தது. இதில், தமிழ்நாட்டில் மட்டும் ரூ.150 கோடியும், தெலுங்கில் ரூ.52 கோடியும், இந்தியில் ரூ.26.05 கோடியும், கன்னடத்தில் ரூ.2.05 கோடியும் வசூலித்துள்ளது. படம் வெளியான 10வது நாளான சனிக்கிழமை அன்று, அதன் வசூல் மீண்டும் அதிகரித்து, ஒரே நாளில் ரூ.10 கோடி வரை ஈட்டியுள்ளது. இதன் மூலம், கடந்த 10 நாட்களில் இந்தியாவின் மொத்த வசூல் ரூ.245.50 கோடியைத் தாண்டியுள்ளது. படம் உலகளவில் ஏற்கெனவே ரூ.400 கோடிக்கும் மேல் வசூலித்துள்ளது.

சனிக்கிழமை அன்று காலை காட்சிகள் மந்தமாகத் தொடங்கினாலும், மதியம், மாலை மற்றும் இரவு நேரக் காட்சிகளில் ரசிகர்கள் கூட்டம் அதிகளவில் காணப்பட்டது. இருக்கைகள் நிரம்பிய சதவீதம் காலை 19.05% ஆக இருந்தது, மாலையில் 41% ஆகவும், இரவு நேரத்தில் 47.76% ஆகவும் உயர்ந்தது. குறிப்பாக, தமிழகத்தின் பல்வேறு நகரங்களில் 'கூலி' படத்திற்கு நல்ல வரவேற்பு கிடைத்துள்ளது. சென்னையில் 50.25%, கோவையில் 37%, மதுரையில் 26.25%, பாண்டிச்சேரியில் 33%, திருச்சியில் அதிகபட்சமாக 52.25% எனப் பல இடங்களில் இருக்கைகள் நிரம்பியிருந்தன. பெங்களூரிலும் 27.75% இருக்கைகள் நிரம்பிய காட்சிகள் ஓடின.

தெலங்கானா மற்றும் ஆந்திராவில் 'கூலி' படத்திற்கு மிகப்பெரிய வரவேற்பு கிடைத்துள்ளது. சென்னையில் தெலுங்கு பதிப்பை வெளியிட்ட திரையரங்குகளில் 67.67% இருக்கைகள் நிரம்பியிருந்தது, இது படத்தின் வெற்றிக்கு மேலும் ஒரு சான்றாக உள்ளது. அதிக வன்முறை காட்சிகள் இருப்பதால் 'A' சான்றிதழ் வழங்கப்பட்டிருந்தாலும், வேறு பெரிய படங்கள் எதுவும் வெளியாகாததால் 'கூலி' படத்திற்குத் தொடர்ந்து ரசிகர்கள் கூட்டம் அதிகரித்து வருகிறது. இன்று ஞாயிற்றுக்கிழமை விடுமுறை நாள் என்பதால், இன்றும் படத்தின் வசூல் அதிகரிக்கும் என எதிர்பார்க்கப்படுகிறது.