3 ரவுண்ட் போச்சு; இந்த போதை விட அந்த போதை அதிகமா இருக்கு: கமல்ஹாசன் படத்தை பாராட்டிய ரஜினிகாந்த்!

தமிழ் சினிமாவில் மிக முக்கியமான திரைப்படங்களின் பட்டியலை எடுத்துக் கொண்டால், அதில் நாயகன் படம் முதன்மையான இடத்தை பெறும் என்பதில் மாற்றுக் கருத்து இல்லை. அந்த அளவிற்கு நாயகன் திரைப்படத்தின் தாக்கம் அதிகமானது.

ஒரு தலைமுறை இளைஞர்கள் பாரதிராஜாவை பார்த்து இயக்குநர் ஆக வேண்டும் என்று ஆசை வந்ததாக கூறுவார்கள். அதற்கு அடுத்தபடியாக, மணிரத்னத்தை பார்த்து இயக்குநராக வேண்டும் என்று விரும்பியதாக சமகால இயக்குநர்கள் பலர் கூறி நாம் கேட்டிருப்போம்.

தற்போது வெற்றிகரமான இயக்குநர்களாக வலம் வரும் வெற்றிமாறன், லோகேஷ் கனகராஜ், கௌதம் வாசுதேவ் மேனன் உள்ளிட்ட எண்ணிலடங்காத பலருக்கு நாயகன் மிகவும் பிடித்தமான படமாக இருக்கிறது.

இப்படி சாமானியர்கள் தொடங்கி சினிமா ஆளுமைகள் வரை பலரை நாயகன் திரைப்படம் ஈர்த்துள்ளது. அப்படி இருக்கும் போது, நாயகன் திரைப்படம் தனக்கு எந்த அளவிற்கு ஒரு தாக்கத்தை கொடுத்தது என்று உச்ச நட்சத்திரமான ரஜினிகாந்த், இயக்குநர் பி. வாசுவிடம் ஒரு சம்பவத்தை நினைவு கூர்ந்துள்ளார்.

இதனை, ஒரு சினிமா தொடர்பான நேர்காணலின் போது இயக்குநர் பி. வாசு பகிர்ந்து கொண்டார். அதன்படி, "நாயகன் போன்ற ஒரு திரைப்படத்தில் நீங்கள் இன்னும் நடிக்கவில்லை என்று நடிகர் ரஜினிகாந்திடம் நான் கூறினேன். அதற்கு ரஜினிகாந்த் என்னிடம் ஒரு சம்பவத்தை பகிர்ந்து கொண்டார். அந்த வகையில், 'நானும், நாயகன் திரைப்படத்தை பார்த்தேன்.

அப்படத்தை பார்த்து விட்டு வந்து மூன்று ரவுண்ட் மது அருந்தினேன். உடனடியாக கமல்ஹாசனுக்கு போன் கால் செய்தேன். நான் அருந்திய மதுவை விட, வேலு நாயக்கரின் போதை அதிகமாக இருக்கிறது என்று கமல்ஹாசனிடம் கூறினேன்' என்று ரஜினிகாந்த் என்னிடம் தெரிவித்தார்" என பி. வாசு கூறியுள்ளார்.

பொதுவாகவே, ஒரு திரைப்படம் நன்றாக இருந்தால் அப்படத்தை எடுத்த இயக்குநர், தயாரிப்பாளர், நடிகர்களை அழைத்து பாராட்டும் குணம் ரஜினிகாந்திற்கு உண்டு என்பது அனைவரும் அறிந்ததே. சமீபத்தில் கூட டூரிஸ் ஃபேமிலி திரைப்படத்தின் இயக்குநரை நேரில் அழைத்து தனது வாழ்த்துகளை ரஜினிகாந்த் தெரிவித்தார். ஆனால், அந்த காலகட்டத்தில் கூட நாயகன் திரைப்படத்தை பார்த்து இப்படி ஒரு பாராட்டை ரஜினிகாந்த பகிர்ந்து கொண்டார் என்ற தகவல் ரசிகர்களுக்கு ஆச்சரியத்தை ஏற்படுத்தி உள்ளது.