OTT: பட்ஜெட் ரூ. 40 கோடி; வசூல் ரூ. 500 கோடி... இளசுகளின் இதயத்தை கொள்ளை அடித்த 'சாயாரா' ஓ.டி.டி ரிலீஸ் அறிவிப்பு!

மோகித் சூரியின் இயக்கத்தில், அஹான் பாண்டே, அனீத் பட்டா உள்ளிட்ட பலர் முக்கிய கதாபாத்திரங்களில் நடித்த ஹிந்தி திரைப்படம் ‘சாயாரா’, கடந்த ஜூலை 18ம் தேதி திரையிடப்பட்டது. வெளியானதிலிருந்து இப்படம் விமர்சன ரீதியாகவும், வசூல் ரீதியாகவும் பெரிய வரவேற்பைப் பெற்று, கவனத்தை ஈர்த்தது. தற்போது, இப்படம் உலகம் முழுவதும் ரூ.507 கோடி வசூலை எட்டியுள்ளது என்று தயாரிப்பு நிறுவனம் அதிகாரப்பூர்வமாக அறிவித்துள்ளது. இதில், இந்தியாவில் மட்டும் ரூ.376 கோடி (நிகர வசூல் ரூ.308 கோடி) மற்றும் வெளிநாடுகளில் ரூ.131 கோடி வசூலாகியுள்ளது.

குறிப்பாக, இது ஒரு காதல் திரைப்படமாக இந்திய சினிமா வரலாற்றில் இதுவரை இல்லாத அளவுக்கு அதிக வசூல் செய்திருப்பது முதல்முறையாகும். இதன் மூலம் ‘சாயாரா’ ஒரு முன்னோடியான காதல் திரைப்படமாக திகழ்கிறது. 2025ஆம் ஆண்டு வெளியான இந்திய திரைப்படங்களில், ஹிந்தியில் வெளியான ‘சாவா’ சுமார் ரூ.800 கோடி வசூலுடன் முதலிடத்திலும், ‘சாயாரா’ ரூ.507 கோடி வசூலுடன் இரண்டாவது இடத்திலும் உள்ளது. மேலும், இந்திய சினிமாவில் ரூ.500 கோடி கிளப்பில் சேர்ந்த படங்களில் ‘சாயாரா’ தற்போது 26வது இடத்தில் உள்ளது.

இதுவரை அந்த பட்டியலில் பெரும்பாலும் ஆக்‌ஷன் மற்றும் பீங்க் கதைகளை மையமாகக் கொண்ட படங்கள் மட்டுமே இடம் பெற்றிருந்த நிலையில், ஒரு காதல் படம் இப்படிப் பெரிய சாதனையை நிகழ்த்தியிருப்பது மிகவும் குறிப்பிடத்தக்கது. சுமார் ரூ.50 கோடி செலவில் தயாரிக்கப்பட்ட இப்படம், அதன் முதலீட்டை பத்து மடங்கு மீட்டுத் தந்து வர்த்தக ரீதியாகவும், ரசிகர்களிடையே புகழ் பெற்றதுமாக உள்ளது.

‘சாயாரா’யின் இந்த வெற்றி, ஹிந்தி சினிமாவில் காதல் படங்களுக்கும் பரந்த அளவிலான இடமிருக்கிறது என்பதை நிரூபித்ததோடு, ஒரு சிறந்த கதை, நுட்பமான இயக்கம் மற்றும் திறமையான நடிப்புக்கு எப்போதும் பாராட்டு கிடைக்கும் என்பதையும் தெளிவாக காட்டியுள்ளது.

பெரும்பாலான திரைப்பட ஆர்வலர்கள் இந்த படத்தின் டிஜிட்டல் வெளியீட்டிற்காகக் காத்திருந்தாலும், தயாரிப்பாளர்கள் வெளியீட்டுத் தேதியை அதிகாரப்பூர்வமாக அறிவிக்கவில்லை. நெட்ஃபிளிக்ஸ் சாயாராவின் டிஜிட்டல் உரிமையைப் பெற்றுள்ளது, மேலும் படம் செப்டம்பர் 12, 2025 அன்று வெளியிடப்படும் என்று எதிர்பார்க்கப்படுகிறது. இருப்பினும், சாய்ராவின் அதிகாரப்பூர்வ ஓடிடி வெளியீட்டு தேதி இன்னும் அறிவிக்கப்படவில்லை.