கமல்ஹாசன் கட்டிபிடித்ததால் 3 நாட்கள் குளிக்கவில்லை: 'தக் லைப்' நிகழ்ச்சியில் சிவராஜ்குமார் பேச்சு

சென்னையில் நேற்று நடைபெற்ற பிரம்மாண்டமான 'தக் லைப்' திரைப்படத்தின் இசை வெளியீட்டு விழா, தென்னிந்திய திரையுலகின் முக்கிய நட்சத்திரங்கள் பலரின் வருகையால் களைகட்டியது. இந்த நிகழ்வு, வெறும் திரைப்பட வெளியீட்டு விழாவாக மட்டுமின்றி, ஆழமான நட்பையும் பரஸ்பர அன்பையும் பகிர்ந்து கொள்ளும் பிரபலங்களின் உணர்வுப்பூர்வமான சந்திப்பாகவும் அமைந்தது.

இந்த செய்தியை ஆங்கிலத்தில் படிக்க:

குறிப்பாக, கன்னட திரையுலகின் சூப்பர் ஸ்டார் சிவராஜ்குமார் மற்றும் உலகநாயகன் கமல்ஹாசன் ஆகியோரின் கலந்துரையாடல் அனைவரையும் நெகிழ்ச்சியில் ஆழ்த்தியது. விழாவில் பேசிய சிவராஜ்குமார், கமல்ஹாசனுடனான தனது நீண்டகால நட்பை நினைவு கூர்ந்தார். தனது தந்தையும், புகழ்பெற்ற கன்னட நடிகருமான டாக்டர் ராஜ்குமார் முன்னிலையில் கமல்ஹாசனை முதன்முதலில் சந்தித்த தருணம் குறித்து நெகிழ்ச்சியாக பேசினார்.

மேலும், கமல்ஹாசனிடமிருந்து ஒரு கட்டிப்பிடிப்பைப் பெற்ற பிறகு மூன்று நாட்கள் குளிக்காமல் இருந்ததை அவர் நெகிழ்ச்சியுடன் குறிப்பிட்ட சிவராஜ்குமார், "ஒரு நாள், அவர் எங்கள் வீட்டிற்கு வந்து என் அப்பாவுடன் பேசிக் கொண்டிருந்தார். அப்போது நான் அமைதியாக அவரைப் பார்த்துக் கொண்டிருந்தேன். அவர் என்னைப் பார்த்து, நான் என் ராஜ்குமார் மகன் என்று அறிந்ததும், வந்து எனக்கு கை கொடுத்தார். நான் அவரை கட்டிப்பிடிக்கலாமா என்று கேட்டேன், அவரும் சந்தோஷமாக சம்மதித்தார்.  அவரை கட்டிப்பிடித்த பிறகு, மூன்று நாட்களுக்கு நான் குளிக்கவில்லை. அவரது வாசனையும், ஸ்பரிசமும் என் மீது இருக்க வேண்டும் என்று விரும்பினேன். நான் அவரது மிகப்பெரிய ரசிகன்," என்று சிவராஜ்குமார் கூறினார்.

மேலும், கமல்ஹாசன் படங்களின் முதல் நாள் முதல் காட்சியை (FDFS) தான் தவறவிட்டதே இல்லை என்றும் அவர் குறிப்பிட்டார். தொடர்ந்து பேசிய சிவராஜ்குமார், கடந்த ஆண்டு தனக்கு நடந்த புற்றுநோய் அறுவை சிகிச்சைக்குப் பிறகு கமல்ஹாசன் தொலைபேசியில் பேசியது, தனது தந்தையை ஆழமாக நினைவுபடுத்தியதாகவும், மிகுந்த மகிழ்ச்சியை அளித்ததாகவும் கூறினார்.

எனக்கு இன்னும் நினைவிருக்கிறது, கடந்த ஆண்டு டிசம்பரில் மியாமி நகரில் நான் அறுவை சிகிச்சைக்காக இருந்தேன். அதற்குப் பிறகு, கமல் சார் எனக்கு போன் செய்து பேசினார். அவர் அப்போது சிகாகோவில் இருந்தார். அது எனக்கு மிகுந்த சந்தோஷத்தை அளித்தது. அவர் என்னிடம், 'சிவண்ணா, உங்களிடம் பேசிய பிறகு என் கண்களில் கண்ணீர் வந்துவிட்டது என்று உங்களுக்குத் தெரியாது' என்றார். அதை என்னால் மறக்க முடியாது; அது என் அப்பாவுடன் பேசுவது போலவே இருந்தது," என்று சிவராஜ்குமார் உருக்கமாக தெரிவித்தார். 

சிவராஜ்குமாருக்கு சிறுநீர்ப்பை புற்றுநோய்க்கான அறுவை சிகிச்சை செய்யப்பட்டது குறிப்பிடத்தக்கது. இயக்குனர் மணிரத்னம் இயக்கத்தில் உருவாகியுள்ள 'Thug Life' திரைப்படம், 38 ஆண்டுகளுக்குப் பிறகு மணிரத்னம் மற்றும் கமல்ஹாசன் ஆகியோர் இணைந்து பணியாற்றும் முதல் படமாகும். இதற்கு முன்பு இவர்கள் 'நாயகன்' (1987) திரைப்படத்தில் இணைந்து பணியாற்றியிருந்தனர். இப்படம் உலகம் முழுவதும் ஜூன் 5ஆம் தேதி திரையரங்குகளில் வெளியாகவுள்ளது.