புதிய கோணம், புதிய கதைக் களம்... வரிசை கட்டும் தமிழ் வெப் சீரிஸ்; விருந்து படைக்கும் சோனி!

சமீபகாலமாக மக்கள் திரையரங்குகளில் சினிமா படங்களை எப்படி கொண்டாடுகிறார்களோ அதேபோன்று வெப் தொடர்களையும் கொண்டாட ஆரம்பித்துள்ளனர். இதற்காகவே பல ஓடிடி தளங்களில் வித்தியாசமான கதைக்களத்தில் வெப் தொடர்களை உருவாக்கி ரசிகர்களை கவர்ந்து வருகிறது.

அந்த வகையில் தற்போது சோனி லவ் ஓடிடி தளம் ரசிகர்களுக்கு விருந்து படைக்கும் விதமாக ‘தீவினை போற்று’,  ‘சேதுராஜன் ஐபிஎஸ்’, ‘தி மட்ராஸ் மிஸ்டரி- ஃபால் ஆஃப் ஏ சூப்பர் ஸ்டார்’, ‘குற்றம் புரிந்தவன்’ போன்ற வெப் தொடர்களை இயக்கி வருகிறது.

‘தீவினை போற்று’  தொடரில் மலையாள நடிகை ஐஸ்வர்யா லட்சுமி முதன்மை கதாபாத்திரத்தில் நடித்துள்ளார். இவர் தனுஷ் நடிப்பில் வெளியான ‘ஜகமே தந்திரம்’, ‘கட்டா குஸ்தி’ போன்ற திரைப்படங்களில் நடித்துள்ளார். மேலும், மணிரத்னம் இயக்கத்தில் வெளியான ‘பொன்னியின் செல்வன்’ திரைப்படத்தில் முக்கிய கதாபாத்திரத்தில் நடித்திருந்தார்.

என்னதான் மலையாள நடிகையாக இருந்தாலும் தமிழில் இவருக்கு என்று ஒரு தனி ரசிகர் பட்டாளமே உள்ளது. தற்போது இவர் ‘தீவினை போற்று’ வெப் தொடரில் நடித்துள்ளார். இந்த வெப் தொடரை சதீஷ் ராஜ தர்மர்  இயக்குகிறார். மேலும், சத்யராஜ், கலையரசன்,பாக்யராஜ், விதார்த், ஸ்ருதி ஹரிஹரன் மற்றும் பலர் முக்கிய கதாபாத்திரட்தில் நடிக்கின்றனர். யாழி பிலிம்ஸ் நிறுவனம் தயாரிக்கும் இந்த வெப் தொடர் 1990-களில் நடக்கும் கதைக்களம் என்று கூறப்படுகிறது.

அடுத்ததாக, ’சேதுராஜன் ஐபிஎஸ்’ இந்த வெப் தொடரில் நடிகர் பிரபு தேவா முதன்மை கதாபாத்திரத்தில் நடிக்கிறார். இதனை இயக்குநர் ரஃபிக் இஸ்மாயில் இயக்கியுள்ளார். அரசியல் ரீதியான கொலை வழக்கை கண்டுபிடிக்கும் போலீசாக பிரபு தேவா நடித்துள்ளார்.

‘தி மட்ராஸ் மிஸ்டரி- ஃபால் ஆஃப் ஏ சூப்பர் ஸ்டார்’  இந்த வெப் தொடரை இயக்குநர் சூர்ய பிரதாப் இயக்கியுள்ளார். இதில் நடிகை நஸ்ரியா நசீம், நட்டி, சாந்தனு பாக்யராஜ் உட்பட பலர் முக்கிய கதாபாத்திரத்தில் நடித்துள்ளனர். நடிகை நஸ்ரியா நசீம் நீண்ட இடைவெளிக்கு பிறகு தமிழிக்கு  திரும்பியுள்ளார். இந்த வெப் தொடர் மூலம் அவர் தமிழ் வெப் தொடரில் அறிமுகமாகியுள்ளார். இந்த வெப்தொடர் 1940-களின் பின்னணியில் உருவாகியுள்ள கதை என்று கூறப்படுகிறது.

‘குற்றம்புரிந்தவன்’ வெப் தொடரில் நடிகர் பசுபதி முதன்மை கதாபாத்திரத்தில் நடித்துள்ளார். இயக்குநர் செல்வ மணி இயக்கியுள்ள இந்த வெப் தொடரில் விதார்த், லக்‌ஷ்மி பிரியா, சந்திரமெளலி மற்றும் பலர் முக்கிய கதாபாத்திரத்தில் நடித்துள்ளனர். இந்த வெப் தொடர் கிரைம் திரில்லராக உருவாகியுள்ளது. இப்படி வித்தியாசமாக கதைக்களத்தில் ரசிகர்களை ஈர்க்கும் வகையில் சோனி லவ் ஓடிடி தளம் பல்வேறு வெப் தொடர்களை இயக்கியுள்ளது. ஆனால் இந்த தொடர்களின் ரிலீஸ் தேதி இதுவரை அறிவிக்கப்படாத நிலையில் விரைவில் வெளியிடப்படும் என்று எதிர்பார்க்கப்படுகிறது.