'லோகா' படத்துக்கு டஃப் கொடுக்கும்... 7 சூப்பர் ஹீரோ படங்கள்; ஓ.டி.டி-யில் இருக்கு!

இயக்குநர் டொமினிக் அருண் இயக்கத்தில் கல்யாணி ப்ரியதர்ஷன் நடிப்பில் வெளியான திரைப்படம் ‘லோகா’. சூப்பர்  ஹீரோ கதைக்களத்தில் உருவான இப்படத்தை துல்கர் சல்மான் தயாரித்திருந்தார். ரூ. 30 கோடி பட்ஜெட்டில் எடுக்கப்பட்ட இப்படம் ரூ.300 கோடிக்கு மேல் வசூலை குவித்து வருகிறது.

மேலும், இப்படத்தின் அடுத்த பாகங்கள் விரைவில் வெளியாகவுள்ளதாக கூறப்படுகிறது. இந்நிலையில், ‘லோகா’ படத்திற்கு டஃப் கொடுக்கும் ஓ.டி.டி-யில் இருக்கும் ஏழு சூப்பர் ஹீரோ படங்கள் குறித்து பார்க்கலாம்.

கடந்த 1987-ஆம் ஆண்டு அனில் கபூர் மற்றும் ஸ்ரீதேவி முக்கிய  கதாபாத்திரத்தில் நடித்து வெளியான திரைப்படம் ‘மிஸ்டர் இந்தியா’.  கதையின் நாயகனான அருண் வர்மாவிற்கு தன்னை மறையவைக்கும் சக்தி கொண்ட ஒரு வாட்ச் கிடைக்கிறது இதன் மூலம் அவர் என்ன செய்கிறார் என்பதே கதை. இந்த படம் ஜீ5 ஓ.டி.டி தளத்தில் உள்ளது.

மலையாளத்தில் கடந்த 2021-ஆம் ஆண்டு டோவினோ தாமஸ் நடிப்பில் வெளியான திரைப்படம் ‘மின்னல் முரளி’. ஒரு சாதாரண இளைஞரான டோவினோ தாமஸை மின்னல் தாக்கியதில் அவருக்கு அபாரமான சக்தி கிடைக்கிறது. இதை வைத்து தனது நகரத்தை குற்றங்களில் இருந்து எப்படி பாதுகாக்கிறார் என்பதே கதை. இப்படம் நெட்பிளிக்ஸில் உள்ளது.

கடந்த 2003-ஆம் ஆண்டு வெளியான ‘கோய் மில் கயா’ என்ற திரைப்படத்தில் சீக்குவல்லாக வெளியான திரைப்படம் தான் ‘கிரிஷ்’. இயற்கைக்கு அப்பாற்பட்ட பல சக்திகளை கொண்ட கிரிஷ் என்ற இளைஞரை மையமாக வைத்து இந்த கதைக்களம் உள்ளது. இப்படம் அமேசான் பிரைமில் உள்ளது.

கடந்த 2024-ஆம் ஆண்டு வெளியான திரைப்படம் ‘ஹனுமான்’ . மரணத்தில் வாசல் வரை செல்லும் கதாநாயகன் அதன் மூலம் அளப்பறியா சக்தியை பெருகிறார். இதன் மூலம் தனது நகரத்தை எப்படி கெட்ட சக்திகளிடம் இருந்து காக்கிறார் என்பதே படத்தின் கதைக்களம். இப்படம் ஜியோ ஹாட்ஸ்டாரில் உள்ளது.

கடந்த 2011-ஆம் ஆண்டு வெளியான திரைப்படம் ‘சொக்கோமோன்’ (Zokkomon). கொடூர குணம் கொண்ட அத்தை மற்றும் மாமாவுடன் வசித்து வரும் சிறுவன் தனது சக்தியை கண்டுபிடித்து அவர்களுக்கு எப்படி பாடம் புகட்டுகிறான் என்பது குறித்த படம் தான் ‘சொக்கோமோன்’.  இந்த படம்  அமேசான் பிரைம் ஓ.டி.டி தளத்தில் உள்ளது.

‘ஏ ப்ளையிங் ஜாட்’  (A Flying Jatt) திரைப்படத்தில் தற்காப்பு கலை ஆசிரியர் ஒருவர் தன்னிடம் இருக்கும் சூப்பர் ஹீரோ பவரை வைத்து என்ன செய்கிறார் என்பது தான் கதைக்களம். இப்படம் ஜீ5 ஓ.டி.டி தளத்தில் உள்ளது.

கடந்த 2011-ஆம் ஆண்டு வெளியான திரைப்படம் ‘ரா ஒன்’. இந்த படத்தில் வீடியோ கேம் டெவலப் செய்யும் ஷாருக்கான் யாராலும் தோற்கடிக்க முடியாத ரா ஒன் என்ற வில்லனை டெவலப் செய்கிறார். அந்த வில்லன் நிஜ வாழ்க்கையில் வந்து என்ன செய்கிறான் என்பது தான் கதை. இந்த படம் அமேசான் பிரைம் ஓ.டி.டி தளத்தில் உள்ளது.