ரூ 25,000 கடனைக் திருப்பிக் கொடுக்க முடியாத அம்மா... ரூ 1,200 சம்பளத்துக்கு கார்மெண்ட்ஸ் வேலைக்கு சென்ற சூர்யா!

சரவணன் சிவகுமார் என்ற இயற்பெயர் கொண்ட நடிகர் சூர்யா, தற்செயலாக திரையுலகில் நுழைந்தார். நடிகர் சிவகுமாரின் மகனாக இருந்தாலும், சூர்யா ஒரு நாள் சொந்தமாக ஒரு தொழிற்சாலையைத் தொடங்க விரும்பியதால், அனுபவத்தைப் பெறவும், வணிகம் எப்படி நடக்கிறது என்பதைப் புரிந்துகொள்ளவும் ஒரு ஆடைத் தொழிற்சாலையில் பணியாற்றினார். வீட்டில் இருந்த ஒரு நிதி நிலைமை அவர் கேமராவுக்கு முன்னால் நடிக்க வேண்டிய கட்டாயம் ஏற்பட்டது, அவர் பின்வாங்கவில்லை. ஒரு நேர்காணலில், சூர்யா திரைப்படங்களில் சேரும் தனது திட்டமிடப்படாத முடிவிற்குப் பிறகு தொழிலில் உறுதியாக ஒட்டிக்கொண்டது எப்படி என்பதை வெளிப்படுத்தினார்.

ஆங்கிலத்தில் படிக்க: Suriya recalls mother being unable to repay Rs 25,000 loan, says he worked at garment factory for Rs 1,200 a month

சமீபத்தில் நடிகர் சூர்யா, பிங்க்வில்லாவுக்கு அளித்த பேட்டியில், “இது ஒரு நீண்ட கதையாக இருக்கும். நான் எப்படி உணர்கிறேன், எனக்கு என்ன அர்த்தப்படுகிறது என்பதை அவர்கள் (ரசிகர்கள்) தெரிந்து கொள்ள வேண்டும் என்று நான் விரும்புகிறேன். நான் ஒரு கார்மெண்ட்ஸ் தொழிலில் வேலை செய்து கொண்டிருந்தேன், முதல் 15 நாட்கள் நான் ஒரு பயிற்சியாளராக இருந்தேன். அந்த 15 நாட்களுக்கான எனது சம்பளம் ரூ.750. முதல் ஆறு மாதங்களுக்கு நான் ஒரு நடிகரின் மகன் என்பது அவர்களுக்குத் தெரியாது. அப்போது எனது மாதச் சம்பளம் ரூ.1,200. நான் கிட்டத்தட்ட மூன்று வருடங்கள் வேலை செய்தேன். இதற்குள் எனது சம்பளம் 8,000 ரூபாயாக உயர்த்தப்பட்டது.

அப்போது நடிகர் சூர்யா அந்த நாட்களை நினைவு கூர்ந்தார், “வீட்டில் ஒரு சூழ்நிலை இருந்தது. ஒரு நாள் காலை உணவு பரிமாறும் போது அம்மா சொன்னார். ‘நான் ரூ.25,000 கடன் வாங்கியிருக்கிறேன், உங்கள் அப்பாவுக்குத் தெரியாது.’ நான் மிகவும் அதிர்ச்சியடைந்தேன். நான், ‘என்ன சொல்கிறாய் மா? அப்பா ஒரு நடிகர். 25,000 கடன் வாங்க முடியாது. நமது சேமிப்பு என்ன ஆனது? நம்ம பேங்க் பேலன்ஸ் என்ன?’ அவர் சொன்னார், ‘அது ஒரு லட்சத்துக்கு மேல் இருந்ததில்லை.’ என்றார்.

தனது அப்பா பற்றி சூர்யா கூறும்போது, ​​“அப்பா எப்போதுமே அப்படித்தான். அவர் தனது சம்பளத்தைக் கேட்பதில்லை. தயாரிப்பாளர்கள் அவருடைய சம்பளத்தைத் தருகிற வரை அவர் காத்திருப்பார். அப்பா நிறைய படங்கள் அல்லது ப்ராஜெக்ட்கள் செய்யாத நேரமும் அது. கிட்டத்தட்ட 10 மாதங்கள் இடைவெளி இருந்தது. என் அம்மா 25,000 ரூபாய் கொடுக்க சிரமப்படுவதைப் பார்த்தபோது, ​​அது என்னை மிகவும் பாதித்தது. நான் என்ன செய்கிறேன்?’ என்று மனதுக்குள் நினைத்துக்கொண்டேன்.” என்று சூர்யா கூறினார்.

“அந்தக் கணம் வரை, நான் சொந்தமாக ஒரு தொழிற்சாலையைத் தொடங்க விரும்பினேன். என் அப்பா குறைந்தபட்சம் 1 கோடி ரூபாயை தொழிற்சாலையில் முதலீடு செய்வார் என்று எனக்குள் நினைத்துக் கொண்டேன். சொந்தமாக ஏதாவது தொடங்குவதற்கான அனுபவத்தைப் பெறுவதற்காக நான் தொழிற்சாலையில் வேலை செய்து கொண்டிருந்தேன். ஆனால், என் அம்மாவுடனான அந்த ஒரு உரையாடல் எல்லாவற்றையும் மாற்றிவிட்டது” என்று நடிகர் சூர்யா கூறினார்.

நடிகர் சிவக்குமாரின் மகன் என்ற காரணத்தால் சூர்யா நிறைய நடிப்பதற்கான வாய்ப்புகளைப் பெற்றதை நினைவு கூர்ந்தார். அப்போது அவர், “எனக்கு நிறைய சலுகைகள் கிடைத்தன. ஆனால், நான் ஒருபோதும் திரைப்படத் துறையின் ஒரு பகுதியாகவோ அல்லது ஃபேஸ் கேமராவாகவோ இருக்க விரும்பவில்லை. கேமராவை எதிர்கொள்வதற்கு ஐந்து நாட்களுக்கு முன்பு, நான் இதைச் செய்வேன் என்று நினைக்கவில்லை.” என்று கூறியுள்ளார்.

அரங்கில் இருந்த தனது ரசிகர்களைப் பார்த்து சூர்யா, “நான் பணத்துக்காக சினிமா இண்டஸ்ட்ரிக்கு வந்தேன். என் அம்மாவின் கடனை அடைக்க வேண்டும் என்ற நோக்கத்தில் தான் நான் இத்துறையில் நுழைந்தேன். அப்படித்தான் என் வாழ்க்கையை ஆரம்பித்தேன், அப்படித்தான் சூர்யா ஆனேன்” என்று அவர் நினைவு கூர்ந்தார். “நான் எனது முதல் ஷாட்டை நடித்தபோது, ​​​​செட் அருகே ஆயிரக்கணக்கான மக்கள் நின்றார்கள், நான் யார் என்று அவர்களுக்குத் தெரியாது, ஆனால், என் ஷாட்டுக்குப் பிறகு, அவர்கள் கூச்சலிடுவதையும் கைதட்டுவதையும் நான் கேட்டேன். அப்போதிருந்து, தலைமுறைகள் மாறின, பார்வையாளர்கள் மாறினர், ஆனால், நான் நிபந்தனையற்ற அன்பைப் பெறுகிறேன். அதனால், அவர்களுக்காகவே நான் தொடர்ந்து படங்களில் நடித்தேன். இப்போது, ​​49 வயதிலும், சிக்ஸ் பேக் தேவைப்படும் ஒரு படத்தை நான் செய்துள்ளேன்.” என்று கூறினார்.

சூர்யா தற்போது தனது பான்-இந்தியா படமான கங்குவா வெளியீட்டிற்கு தயாராகி வருகிறார். இப்படத்தில் நடிகர்கள் பாபி தியோல் மற்றும் திஷா பதானி ஆகியோர் நடித்துள்ளனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“