தமிழில் நடித்தது சில படங்கள்; ஆனா இவரின் முதல் தமிழ் படம் பலருக்கு ஃபேவரெட்: இந்த சிறுமி யார் தெரியுமா?

தமிழ் சினிமா கண்டெடுத்த ஹீரோயின்களில் ஒருவராக இருந்து வரும் நடிகை தான் இவர், நிஜத்தில் அரச குடும்பத்தை சேர்ந்தவராக உள்ளார். கூரான பார்வையால் ரசிகர்களை கவர்ந்த கண்ணழகியாக திகழ்ந்தார்.

திரிபுரா மாநிலத்தை சேர்ந்த அரச குடும்ப பின்னணியில் இருந்து சினிமாவுக்கு வந்து தனக்கென பெயரும், புகழும் பெற்ற நடிகையாக வலம் வந்து கொண்டிருப்பவர் நடிகை ரியா சென்.

இவரது தாயார் மூன் மூன் சென், பாட்டி சுசித்ரா சென் ஆகியோரும் பழம்பெரும் நடிகைகளாகவே உள்ளார்கள். அதேபோல் சகோதரி ரைமா சென்னும் நடிகையாக உள்ளார். அந்த வகையில் ரியா சென் குடும்பத்தை அரச பின்னணி கொண்ட கலைக்குடும்பம் என்றே கூறலாம்.

சினிமா பின்புலம் கொண்ட குடும்பத்தில் பிறந்த ரியா சென், தனது தாயார் மூன் மூன் சென் ஒரு பிரபல நடிகையாவதால், வெறும் 5 வயதில் குழந்தை நட்சத்திரமாகவே திரையுலகில் காலடி எடுத்துவைத்தார்.

1991-ல் ஒரு இந்திப் படத்தில் குழந்தை வேடத்தில் அறிமுகமான அவர், பின்னர் ஒரு பெங்காலி படத்திலும் சிறுவயது கதாப்பாத்திரத்தில் நடித்தார்.

தமிழ் சினிமாவின் அழகுக் கதாநாயகி

தமிழ் சினிமாவில் அறிமுகம் பெற்றதும், பின்னர் ஒரு பிரபல நடிகையாக வலம் வந்தவர்களில் ஒருவர் ரியா சென். இயக்குநர் பாரதிராஜா, தனது மகன் மனோஜ் ஹீரோவாக அறிமுகமான 'தாஜ்மஹால்' திரைப்படம் மூலமாகவே ரியா சென் தமிழ் சினிமாவில் ஹீரோயினாக அறிமுகமானார்.

மிகுந்த ஒல்லியான தோற்றம் கொண்டிருந்தாலும், அவரது கண்களின் அழகு பார்வையாளர்களை ஈர்க்கும்படியானது. அதனால்தான், அவரது கதாப்பாத்திரத்துக்கு மச்சக்கன்னி என பெயரிடப்பட்டதாக சொல்லப்படுகிறது.

தாஜ்மஹால் திரைப்படம் பெரிய அளவில் வெற்றி பெறாதிருந்தாலும், ஏ.ஆர். ரஹ்மான் இசையில் உருவான பாடல்கள் இன்றைக்கும் கிளாசிக் ஹிட்களாக கருதப்படுகின்றன. இந்த படத்துக்குப் பிறகு, பிரசாந்த் ஜோடியாக குட்லக் படத்தில் நடித்தார் ரியா சென்.

ஆனால் அந்த படம் மற்றும் அவரது தொடர் முயற்சிகள் எதிர்பார்த்த அளவில் வெற்றி பெறாததால், ராசியில்லாத நடிகையாகவே அவர் பார்க்கப்பட்டார்.

பின்னர் அவர் பாலிவுட்டில் ‘ஸ்டைல்’ என்ற படத்தில் ஹீரோயினாக அறிமுகமானார். அந்த படத்தின் வெற்றி அவருக்கு பார்வையாளர்கள் மத்தியில் நல்ல கவனத்தைப் பெற்றுத் தந்தது. தொடர்ந்து பல இந்திப் படங்களில் நடித்தார்.

சுமார் நான்கு வருடங்களுக்குப் பிறகு, தமிழ் சினிமாவுக்கு மீண்டும் வந்து அரசாட்சி படத்தில் ஒரு ஐட்டம் பாடலுக்காக நடனம் ஆடி ரசிகர்களிடையே கிளுகிளுப்பூட்டினார்.

ஹாரிஸ் ஜெயராஜின் இசையில் வெளியான “இருபது வயது” என்ற உற்சாகம் மிக்க, பெப்பியான பாடல், புஷ்பா படத்தில் பிறகு வந்த “ஊ சொல்றியா” போன்ற பாடல்களுக்கு முன்னோடியாகச் சொல்லலாம்.

ரியா சென், இந்தி மற்றும் பெங்காலி போன்ற மொழிகளில் நடித்து வந்ததுடன், தெலுங்கு மற்றும் மலையாள திரைப்படங்களிலும் நடித்துள்ளார்.

இப்போது அவரது சிறு வயது புகைப்படம் ஒன்று இணையத்தில் வைரலாகி வருகிறது.